Ester 2 - Ñawpaq Testamento Apurímac Llaqtanchispaq Este nisqa Lawpaq

Reina kananpaq Esterta akllasqankumanta

¹ Huk tiempo pasaruqtinmi, rey Asueropa phiñakuyninqa thañiruran. Hinaqtinmi payqa yuyariran Vastimanta, mana allin ruwasqanmanta hinallataq Vastipa contranpi decretota qosqanmantapas.

² Hinaqtinmi reyta serviqnin autoridadkunaqa khaynata niranku: —Reynillayku, qanpaqyá manaraq hayk'aqpas qariwan puñuq allin buenamoza sipaskunata mashkamuchunku.

³ Reynillayku, qan kikiykiyá runakunata akllay, sapankama gobiernasqayki provinciakunamanta buenamoza sipaskunata Susa llaqtaman apamunankupaq. Chay sipaskunataqa apamunanku warmikunapaq kasqan palacio wasimanmi. Hinaspa qanpa warmiykikunata cuidaq *eunuco Hegai confiasqayki runa chay sipaskunata cuidachun. Hinaspayá chay sipaskunataqa tratamientota ruwachun, saynapi aswan más buenamoza kanankupaq.

⁴ Hinaspayá qanpa agradoykipaq hina kaq allinnin buenamoza sipasta akllay, saynapi Vastipa rantinta reina kananpaq, nispa. Chay autoridadkunapa nisqankuqa allinmi reypaqqa karan. Hinaqtinmi reyqa chay nisqankuman hina ruwaran.

⁵ Susa llaqtapin Mardoqueo sutiyoq Judá nacionniyoq runa tiyaran. Payqa Benjamín ayllumantan karan. Payqa Jairpa wawanmi karan. Jairtaq Simei sutiyoq runapa wawan karan. Simeitaq Cispa wawan karan.

⁶ Paytaqa Babilonia nacionta gobiernaq rey Nabucodonosormi ñawpaqtaraq Judá nacionta gobiernaq rey Jeconiastawan kushkata Jerusalén llaqtamanta presota apachiran.

⁷ Mardoqueopaqa karanmi huk priman. Chay primanpa sutinmi karan Hebreo rimaypi Hadasa. Huknin sutintaqmi karan Ester. Payqa allin buenamoza sipasmi karan. Mardoqueoqa chay primantan ususinta hina uywakuran tayta-maman wañukapuqtin huérfana qepasqanrayku.

⁸ Reypa kamachisqan decreto willasqa karuqtinmi, Susa llaqtapi reypa tiyasqan palacio wasiman ashka sipaskunata pusamuranku. Hinaspan reypa warminkunata cuidaq Hegai sutiyoq confiasqan runaman entregaranku, saynapi chay sipaskunata cuidananpaq. Saynallataqmi Estertapas reypa palacio wasinman apamuranku. Hinaspan warmikunata cuidaq Hegai sutiyoq runaman entregaranku cuidananpaq.

⁹ Esterqa Hegaipa agradonpaq hinan karan. Chaymi Hegaiqa sumaq q'apaq perfumekunawan Esterta llusispa tratamientota ruwachiran hinallataq allin kaq mikhunakunata mikhuchiran. Hinaspan Hegaiqa palacio wasipi qanchis allin kaq sipaskunata akllaran Esterta atiendenankupaq. Hinaspan Estertaqa kamachiran chay sipaskunawan kushka reypa palacio wasinpi allinnin kaq cuartokunapi tiyanankupaq.

¹⁰ Esterqa manan willakuranchu may nacionmantas kasqantaqa hinallataq ima ayllumantas kasqantapas. Saynataqa ruwaran Mardoqueopa kamachisqanman hinan.

¹¹ Mardoqueoqa sapa p'unchawmi reypa warminkunapa tiyasqanku palacio wasipa pationpi kay lawman waq lawman purikacharan. Saynataqa ruwaran Ester imaynas kashan chayta hinallataq imaynatas tratashanku chaytawan yachananpaqmi.

¹² Chay sipaskunaqa costumbrenkuman hinan, reypa ñawpaqninman haykunankupaq llapallanku watantin hunt'a sumaqllataña allichakuranku. Soqta killan mirra nisqa aceitewan cuerponkuta sumaqta llusikuranku; soqta killataqmi sumaq mishk'i q'apaq perfumekunawan cuerponkuta llusikuranku. Chaymantañan llapallan sipaskunaqa turno tupasqanman hina ch'ulla-ch'ullallamanta rey Asueropa ñawpaqninman riranku.

¹³ Mayqen kaq sipasmanchus tupan reypa ñawpaqninman rinanpaq chayqa, chay sipasmanmi astawanraq allichakunanpaq tukuy ima mañakusqanta qoranku, saynapi warmikunapa palacio wasinmanta reypa palacio wasinman rinanpaq.

¹⁴ Reypa palacionmanqa tutayaykuqtinmi sipasqa riran. Hinaspan chay sipasqa paqarisnintin p'unchaw huk sapaq wasimanña apasqa karan. Hinaspan reypa warminkunata cuidaq eunuco Saasgaz sutiyoq runaman cuidananpaq entregaranku. Chayman apasqa kaq sipaskunaqa manañan reypa ñawpaqninmanqa kutirankuñachu. Aswanqa reypa agradonpaq hina kaq sipasllañan sutinmanta waqyachiqtin kutiran.

¹⁵ Chaymantan reypa ñawpaqninman haykunanpaq Esterman turno tuparan. Esterqa wañuq Abihail sutiyoq runapa ususinmi karan. Abihailtaq Mardoqueopa tion karan. Ichaqa payqa manan ni imatapas mañakuranchu. Aswanmi payqa reypa warminkunata cuidaq eunuco Hegaipa nisqallanta aparan. Hinaspapas Esterqa palaciopi llapallan kaqkunapa confianzantan ganarukuran.

¹⁶ Rey Asuero qanchis wataña gobiernashaqtinmi, Tebet nisqa chunka kaq killapi Estertaqa rey Asueropa palacionman pusaranku.

¹⁷ Hinaqtinmi rey Asueroqa Estermanta anchata enamorakuran. Rey Asueroqa manan ni mayqen warmimantapas saynata enamorakuspaqa khuyakuranchu. Esterqa rey Asueropa sonqontan suwaruran. Chaymi rey Asueroqa Esterpa umanman coronata churaykuran, Vastipa rantinta reina kananpaq.

¹⁸ Chaymantan rey Asueroqa Esterpa sutinpi huk hatun fiesta ruwachiran. Hinaspan waqyachimuran llapallan autoridadkunata hinallataq serviqninkunatapas. Hinaspapas enteron gobiernasqan nacionpin pagananku impuestokunatapas rebajaran. Saynallataqmi allin sonqoyoq kasqanrayku ashka regalokunatapas runakunaman qoran.

Reypa contranpi hatarinankupaq planeasqankuta Mardoqueo uyarisqanmanta

¹⁹ Manaraq hayk'aqpas qariwan puñuq sipaskunata ishkay kaq kutipi huñumushaqtinkun, Mardoqueoqa *reypa palacionman haykuna punkupi tiyasharan.

²⁰ Esterqa Mardoqueopa kamachisqanman hinan, secretopi hap'ispa mana willakuranchu may nacionmanta kasqanta hinallataq ima ayllumanta kasqantapas. Saynataqa ruwaran Mardoqueopa nisqankunata kasukuspanmi, imaynan Mardoqueo uywashaqtin kasukuran chay hinata.

²¹ Chay p'unchawkunapin Mardoqueoqa reypa palacio wasinpa punkunpi tiyasharan. Hinaspan payqa uyariran, reypa palacionpa punkunta cuidaq *eunuco runa Bigtán hinallataq eunuco Terespiwan ancha phiñasqa kasqankurayku, rey Asuerota wañuchinankupaq planeasqankuta.

²² Chay uyarisqantan Mardoqueoqa reina Esterman willaran. Reina Esterñataqmi Mardoqueopa sutinpi chay willasqanta reyman willaran.

²³ Hinaqtinmi reyqa chay asuntomanta averiguanankupaq kamachiran. Chaymi allinta tapukachakuspanku cheqaqpuni chay planeasqanku kasqanta yacharuranku. Chaymi reyqa chay ishkaynin eunuco runakunata k'aspipi seq'ospa wañuchinankupaq kamachiran. Tukuy chaykuna pasasqantaqa reypa ñawpaqninpin escribiranku reypa imayna gobiernasqanmanta willakuq libropi.