Daniel 5 - Ñawpaq Testamento Apurímac Llaqtanchispaq Este nisqa Lawpaq

Perqapi escribisqata rikhurisqanmanta

¹ *Rey Belsasarmi huk hatun convidoman *nacionpi serviqnin waranqa autoridadkunata invitamuran. Hinaspan reyqa chay runakunawan kushka mach'anankama ashka vinota tomaran.

² Rey Belsasarqa vinowan mach'aruspanmi papan Nabucodonosor Jerusalén *templomanta apachimuqan qorimanta vasokunata hinallataq qolqemanta vasokunatawan apamunankupaq kamachiran, saynapi reypas, importante kaq autoridadkunapas, casarakusqan warminkunapas hinallataq mana casarakuspalla tiyasqan warminkunapas chay vasokunapi tomanankupaq.

³ Chaymi Jerusalén llaqtapi Diospa templonmanta apamusqanku qorimanta vasokunata apamuranku. Chay vasokunapin reypas, importante kaq autoridadkunapas, casarakusqan warminkunapas hinallataq mana casarakuspalla tiyasqan warmikunapas tomaranku.

⁴ Llapallankun vinota tomaspanku alabaranku qorimanta, qolqemanta, broncemanta, hierromanta, k'aspimanta hinallataq rumimanta ruwasqa dioskunata.

⁵ Hinaqtinmi qonqayllamanta huk runapa makin rikhurispa dedonkunawan *palacio wasipa estucasqa kaq perqapi escribiyta qallariran. Chay perqaqa k'anchaq candelabropa ñawpaqninpin karan. Chaymi reyqa chay escribiq makita rikuspa,

⁶ anchata mancharikuqtin uyanraq q'elluyaran. Hinaspan mana imatapas piensayta atispa hukmanyaran hinallataq mana kallpayoqman tukuran. Chaymi moqonkunapas manchakuymanta khatatataspa takanakuranraq.

⁷ Chaymi mancharikuymanta altota qaparispa waqyachimuran Babilonia nacionpi kaq watuqkunata, ch'askakunata qawaspa suerte qawaqkunata hinallataq layqa runakunatapas. Hinaspan chay yachaysapa runakunata khaynata niran: —Pipas kay perqapi escribisqakunata leespa ima ninantas nin chayta willawanqa chayqa, reypa sumaq morado capanwanmi p'achachisqa kanqa. Saynallataqmi kunkanmanpas qori collarwan churasqa kanqa. Hinaspapas payqa kay nacionpi gobiernaqkunamanta kinsa kaq importante autoridadmi kanqa.

⁸ Hinaqtinmi chay yachayniyoq runakunaqa reypa ñawpaqninman hamuranku. Ichaqa manan mayqenninkupas chay reypa rikusqan escribisqakunata leeytaqa atirankuchu; nitaqmi ima ninantas nin chayta willaytapas atirankuchu.

⁹ Chaymi rey Belsasarqa anchata mancharikuran. Hinaqtinmi uyanpas q'elluyaranraq. Saynallataqmi reyta gobiernayta yanapaq autoridadninkunapas manan ni ima ruwaytapas atirankuchu.

¹⁰ Hinaqtinmi reypa qaparisqanta hinallataq chaypi autoridadkunapa qaparisqankuta reyna uyariruspa, banquete ruwasqanku salaman haykuran. Hinaspan khaynata niran: —¡Reynilláy, wiñaypaqmi kawsanki! ¡Ama mancharikuychu; amataqyá uyaykipas q'elluyachunchu!

¹¹ Kay gobiernasqayki nacionpin huk runa kashan. Paypiqa ch'uya dioskunapa espiritunmi kashan. Papayki Nabucodonosorpa tiemponpin payqa reqsichikuran allin yachayniyoq kasqanta hinallataq dioskuna hina allin yachayniyoq kasqanta. Chaymi papaykiqa churaran llapallan yachayniyoqkunapa, adivinaqkunapa, layqakunapa, ch'askakunata qawaspa suerteta qawaq runakunapa jefen kananpaq.

¹² Chay runapa sutinmi Daniel. Paytan rey Nabucodonosorqa suticharan Beltsasarwan. Payqa ancha yachayniyoq, allin yuyayniyoq hinallataq sueñokunapa ima ninantas nin chaymanta willakuq runan. Hinaspapas payqa mana entiendenakunata explicaqmi hinallataq sasa tapukuykunatapas contestaqmi. Saynaqa chay Danielta waqyachimuy. Paymi chay perqapi rikusqayki escribisqakunapa imas ninantas nin chaytaqa willasunki, nispa.

¹³ Hinaqtinmi Danieltaqa reypa ñawpaqninman pusaramuranku. Chaymi reyqa Danielta khaynata tapuran: —¿Qanchu Daniel kashankí? ¿Qanchu Judá nacionmanta papaypa apachimusqan runakunamanta huknin kaq preso kashankí?

¹⁴ Noqaqa uyarinin dioskunapa espiritun qanpi kasqanta. Saynallataqmi uyarini qanqa allin entiendeq, allin yuyayniyoq hinallataq ancha yachayniyoq kasqaykimantapas.

¹⁵ Kunanmi ñawpaqniyman waqyachimurani yachayniyoq runakunata, layqakunata, watuqkunata, saynapi kay perqapi escribisqakunata leespanku, ima ninantas nin chayta willawanankupaq. Ichaqa manan ni mayqenninkupas ima ninantas nin chaytaqa niwayta atirankuchu.

¹⁶ Ichaqa noqan uyarini mana pipa entiendey atisqan escribisqakunapa ima ninantas nin chaykunamanta willakusqaykita hinallataq sasa tapukuykunatapas contestasqaykita. Saynaqa sichus waq perqapi escribisqakunata leeyta atinki hinallataq ima ninantas nin chaytapas willawanki chayqa, sumaq morado p'achawanmi p'achachisqayki. Saynallataqmi qorimanta collarwan kunkaykimanpas walqachisqayki. Hinaspan nombrasqayki, gobiernasqay nacionpi kinsa kaq importante autoridad kanaykipaq, nispa.

¹⁷ Hinaqtinmi Danielqa khaynata contestaran: —Reynilláy, regaloykikunaqa qanpaqyá kachun; otaqyá chay regalokunataqa hukman qoy. Noqaqa chay escribisqakunata leespan ima ninantas nin chayta willasqayki.

¹⁸ Reynilláy, alto cielopi tiyaq Señor Diosmi papayki Nabucodonosorta churaran, kay hatun nancionta gobiernananpaq, saynapi hatunchasqa kananpaq, atiyniyoq kananpaq hinallataq allin reqsisqa kananpaq.

¹⁹ Sayna atiyniyoq kananpaq Dios permitiqtinmi llapallan nacionkuna, llaqtakuna hinallataq tukuy clase rimaykunapi rimaq runakunapas ñawpaqninpi khatatataranku. Saynapin payqa pi munasqanta wañuchiran; pi munasqantataqmi permitiran kawsananpaq. Pi munasqantan hatuncharan; pi mana munasqantataqmi humillaran.

²⁰ Ichaqa sonqonpin payqa anchata hatunchakuran; saynallataqmi uman oqarisqaman tukuran. Chayraykun payqa rey kasqanmanta qarqosqa karan. Saynallataqmi ancha importante runa kayninpas qechusqa karan.

²¹ Chaymantan paytaqa runakunapa kasqanmanta qarqosqa karan. Chaypin payqa animalkuna hina piensayniyoqña karan. Payqa salqa asnokunawan kushkañan tiyaran. Saynallataqmi torokuna hinaña pastota mikhuran. Cuerpontapas shullan apiyaran. Payqa saynan karan Hatu-hatun Dios llapallan nacionkuta kamachiq kasqanta asta reconocenankama, saynallataq pitachus gobiernaq kananpaq churasqanta yachanankama.

²² Saynaqa, Nabucodonosorpa wawan rey Belsasar, qanpas sayna kasqanta yachashaspaykin mana humillakurankichu.

²³ Aswanqa hanaq pachapi kaq Señor Diospa contranpi hatarispaykin uma oqarisqallaña karanki. Hinaspan Señor Diospa templonmanta apamusqanku vasokunata apachimuranki. Chaypin qanpas hinallataq autoridadniykikunapas, casarakusqayki warmiykikunapas hinallataq mana casarakuspalla tiyasqayki warmikunapas ch'uya Diospaq sapaqchasqa vasokunapi vinota tomarankichis. Saynallataqmi qanqa qolqemanta, qorimanta, broncemanta, hierromanta, k'aspimanta hinallataq rumimanta dioskunata yupaycharanki. Chay dioskunaqa manan rikunchu; manan uyarinchu; nitaqmi imatapas yachanchu. Ichaqa vidayki Diospa makinpi kashaqtinpas hinallataq kawsayniykipi tukuy ima ruwasqaykipas pay munaqtin ruwasqa kashaqtinpas, qanqa manan Señor Diostaqa hayk'aqpas yupaycharankichu.

²⁴ Chayraykun Señor Dios chay makitaqa rikhurichiran perqapi escribinanpaq.

²⁵ Chay escribisqaqa: MENE, MENE, TEKEL, UPARSIN nishanmi.

²⁶ Reynilláy, waq escribisqakunaqa khayna ninantan nin: MENE niqqa: Diosmi gobiernasqayki p'unchawkunata yupan. Hinaspan tukukuyninmanña chayarachin, nispa.

²⁷ Reynilláy, TEKEL niqqa khayna ninantan nin: Diosmi huk balanzapi pesasuranki. Hinaspan mana llasasqankichu imaynan llasanaykita hinaqa, nispa.

²⁸ Reynilláy, UPARSIN niqñataqmi khayna ninanta nin: gobiernasqayki nacionmi ishkayman partisqa kanqa. Hinaspan entregasqa kanqa Media nacionman hinallataq Persia nacionmanwan, nispa.

²⁹ Hinaqtinmi rey Belsasar apurayllaman kamachiran reypa sumaq morado p'achanwan Danielta p'achachinankupaq hinallataq qorimanta collarwanpas kunkanman churanankupaq. Saynallataqmi kamachiran, gobiernasqan nacionpi autoridadkunamanta kinsa kaq importante autoridad kananpaq.

³⁰ *Babilonia nacionpa reynin Belsasarqa chay tutallan wañuchisqa karan.

³¹ Hinaqtinmi Media nacionta gobiernaq rey Darío Babilonia naciontaqa hap'ikuran. Rey Darioqa soqta chunka ishkayniyoq watanpiñan kasharan.