Daniel 4 - Ñawpaq Testamento Apurímac Llaqtanchispaq Este nisqa Lawpaq

Rey Nabucodonosorpa locoyasqanmanta

¹ *Rey Nabucodonosormi kay pachapi llapallan llaqtakunaman, llapallan *nacionkunapi tiyaq runakunaman hinallataq tukuy clase rimaykunapi rimaq runakunamanwan khaynata escribiran: —Hawkayay qankunawan kachun.

² Hatu-hatun Atiyniyoq Dios noqapa favorniypi señalkunata hinallataq milagrokuna ruwasqantan qankunamanqa ancha kusikuywan willasqaykichis.

³ ¡Paypa señalkuna ruwasqanqa ancha hatunmi! Paypa milagrokuna ruwasqanqa ancha admirakuypaqmi. Paypa gobiernasqanqa wiña-wiñaypaqmi. Paypa atiyninqa wiña-wiñaypaqmi.

⁴ Noqa rey Nabucodonosorqa *palacio wasiypin hawkalla kasharani. Hinaspapas noqapaqa tukuy imaymi kapuwaran.

⁵ Ichaqa huk tutan camaypi puñushaspay anchapas mancharikuypaq sueñokurani. Chaykunapi yuyaymanasqaymi hinallataq *visionpi rikusqaykunanmi noqataqa hukmanyachiwaran.

⁶ Hinaqtinmi noqaqa kamachirani, Babilonia nacionpi llapallan yachayniyoq runakuna ñawpaqniyman hamunankupaq, saynapi noqapa sueñokusqay ima ninantas nin chayta willawanankupaq.

⁷ Hinaqtinmi chay layqa ruwaq runakuna, Caldea lawmanta ch'askakunata qawayta yachaq runakuna hinallataq watuq runakunapas hamuranku. Paykunamanmi sueñokusqayta willarani. Ichaqa chay sueñokusqay ima ninantas nin chaytaqa manan willawaytaqa atirankuchu.

⁸ Chaymantan Danielpas noqapa ñawpaqniyman hamullarantaq. Payqa diosniypa sutin hina Beltsasar sutiwan sutichasqan karan. Paypiqa ch'uya dioskunapa espiritunmi kasqa. Paymanmi sueñokusqayta khaynata willarani:

⁹ “Beltsasar, qanqa yachayniyoq runakunapa jefenmi kanki. Noqaqa yachanin ch'uya dioskunapa espiritun qanpi kasqanta. Noqaqa yachallanitaqmi ima pakasqa kaqkunapas qanpaqqa manan sasachu kasqanta. Chaymi noqaqa sueñoyniypi rikusqayta willasqayki, saynapi chay sueñokusqay ima ninantas nin chayta willaykuwanaykipaq.

¹⁰ Noqaqa camaypi puñushaspaymi kay visionta rikurani: Kay pachapa chawpinpin huk hatunkaray sach'a kashasqa.

¹¹ Chay sach'aqa astawanraq wiñaspan, anchatapuni rakhuyaran. Puntanpas cielokamaraqmi chayasqa. Chaymi chay sach'ataqa enteron kay allpa pachamanta rikumuranku.

¹² Chay sach'aqa anchapas rap'isapallañan kasqa. Rurunkunapas ashkallañan kasqa. Chay sach'amantaqa llapallan runakunan mikhusqaku. Salqa animalkunapas chay sach'apa sikinpin llantukusqaku. Ramankunapipas alton phawaq animalkunan thapachakusqaku. Chay sach'amantan llapallan kawsaqkunaqa mikhusqaku.

¹³ Chaymantataqmi camaypi puñushaspa visionkunapi rikurani, huk vigilaq ch'uya *ángel qonqayllamanta hanaq pachamanta uraykamushaqta.

¹⁴ Hinaspan chay angelqa altota qaparispa khaynata niran: ‘Chay sach'ata wit'uspa k'umpaychis. Ramankunatapas kuchuychis. Rap'inkunatapas wikhaychis. Rurunkunatapas ch'eqechiychis. Chay sach'apa sikinpi llantukuq animalkunapas ayqekuchunku. Ramankunapi thapachakuq alton phawaq animalkunapas ayqekuchunku.

¹⁵ Ichaqa k'ulluntapas hinallataq saphinkunatapas allpallapi saqeychis. Hierromanta hinallataq broncemanta cadenawan watasqata saqeychis. Chaytaqa campopi pastokuna ukhupi saqeychis. Chaypa hawanman shulla shullamuchun. Hinaspa campopi animalkunawan hinallataq pastokunawan kushka kachun.

¹⁶ Paypa yuyayninqa chinkapuchun. Hinaspa animalpa yuyaynin hina yuyayniyoq kachun. Payqa qanchis wata sayna yuyayniyoq kachun.

¹⁷ Chay kamachikuy sentenciataqa angelkunan tanteaspanku churaranku. Chaytaqa ch'uya angelkunan rimariranku, saynapi llapallan kay pachapi kawsaqkuna hinallataq nacionkunata gobiernaqkunatapas Tukuy Atiyniyoq Señor Dios gobiernasqanta yachanankupaq. Payllan pi munasqanta gobiernananpaqqa churan. Payllan sumaq sonqoyoq runatapas huk nacionta gobiernananpaq churan’, nispa.

¹⁸ Noqa rey Nabucodonosormi chay hinata sueñokurani. Saynaqa Beltsasar, kunanyá ima ninantas nin chay sueñokusqay chayta willaykuway. Kay gobiernasqay nacionpi yachayniyoq runakunaqa ima ninantas nin chay sueñokusqay chaytaqa manan willawayta atinkuchu. Ichaqa qanmi chaytaqa willaykuwayta atinki, ch'uya dioskunapa espiritun qanpi kasqanrayku”, nispa.

¹⁹ Chaymi Beltsasarwan sutichasqa Danielqa mancharikuspa unay rato yuyaymanaspa utilayaran. Hinaqtinmi rey Nabucodonosorqa khaynata niran: —Beltsasar, amayá sueñokusqaywanqa nitaq ima ninantas nin chay sueñokusqay chaywanpas mancharikuychu, nispa. Hinaqtinmi Belsasarqa khaynata niran: —Reynilláy, chay sueñokusqaykiqa enemigoyki runakunapaqyá kachun. Chay sueñokusqaykikuna ima ninantas nin chaypas, mana allinkuna ruwasuqniyki munaq runakunapa contranpiyá kachun.

²⁰ Qanqa hatunkaray rakhu sach'atan rikuranki. Chay rikusqayki sach'apa puntanqa cielokamaraqmi chayasqa. Chay sach'ataqa tukuy enteron allpa pachamantan rikumusqaku.

²¹ Chay sach'apa rap'inkunaqa sumaqllañan kasqa. Hinaspapas anchallatañan rurusqa. Chay sach'apa ruruntaqa ashkallaña runakunan mikhusqaku. Chay sach'apa sikinpitaqmi salqa animalkunapas llantukusqaku. Ramankunapipas alton phawaq animalkunan thapachakusqaku.

²² Reynilláy, chay sach'aqa qanmi kanki. Qanqa wiñaruspan ancha atiyniyoqman tukuranki. Hatunchakuyniykipas cielokamaraqmi chayarun. Qanpa gobiernoykipas tukuy enteromanmi ayparun.

²³ Reynilláy, qanqa rikullarankitaqmi hanaq pachamanta vigilaq ch'uya ángel uraykamusqantapas. Paymi khaynata kamachiran: Chay sach'ata wit'uspa chinkachiychis. Ichaqa k'ullunta hinallataq saphintapas allpallapi saqeychis. Fierromanta hinallataq broncemanta ruwasqa cadenawan wataspa purunpi pastokuna ukhupi saqeychis. Hinaspa shulla shullamuspa apiyachun. Hinaspa qanchis wata campopi animalkunawan kushka tiyaspa campopi pastota mikhuspa kawsachun, nispa.

²⁴ Reynilláy, sueñokusqayki ima ninantas nisqanqa hinallataq Tukuy Atiyniyoq Señor Dios qanpa contraykipi kamachisqanpas kaymi:

²⁵ Reynilláy, runakunapa kasqanmantan wikch'usqa kanki. Hinaspan salqa animalkunawan kushka kawsanki; torokuna hinan pastota mikhunki; shullan apiyasunki. Saynataqa qanchis wata enteron kawsanki, Tukuy Atiyniyoq Señor Dioslla kay enteron pachata gobiernaq kasqanta reconocenaykikama. Payllan kay pachapi gobiernaq kananpaqqa munasqanman hina pitapas churan.

²⁶ Reynilláy, qanqa uyarillarankitaqmi k'ullutaqa saphintinta allpallapi saqeychis nispa kamachikuytapas. Chaypa ima ninantas nin chayqa, kaymi: Señor Dios kay enteron pachata gobiernaq kasqanta reqsikuqtiykiñan gobiernoykitaqa kaqmanta kutichipusunki.

²⁷ Saynaqa reynilláy, kay consejasqaytayá uyariykuway: Amaña huchallikuychu; aswanqa allin kaqkunataña ruway. Mana allin ruwaykunata saqespa wakcha runakunata khuyapayay. Ichapas qanqa hawkalla unayta kawsakuwaq, nispa.

²⁸ Rey Nabucodonosortaqa Danielpa willasqanman hinan pasaran.

²⁹ Danielpa willasqanmanta chunka ishkayniyoq killaña pasaruqtinmi, rey Nabucodonosorqa Babilonia nacionpi palacio wasipa altosninpi purishaspa,

³⁰ khaynata niran: —Qawariychis kay Babilonia hatun llaqtata. Noqan kay llaqtataqa gobiernasqay nacionpa capitalnin kananpaq atiyniywan hatarichirani, saynapi ancha importante kasqayta rikuchinaypaq, nispa.

³¹ Rey Nabucodonosor chay rimasqanta manaraq rimaytapas tukushaqtinmi, hanaq pachamanta khayna rimay uyarikuran: —Rey Nabucodonosor, qanpa contraykipin huk decreto kashan. Gobiernasqayki nacionpiqa manañan gobiernankiñachu.

³² Qanqa runakuna ukhumantan wikch'usqa kanki. Hinaspan salqa animalkunawan kushka kawsaspa torokuna hina pastota mikhunki. Saynataqa qanchis wata enteron kawsanki, Tukuy Atiyniyoq Señor Dioslla kay enteron pachata gobiernaq kasqanta reconocenaykikama. Payllan kay pachapi gobiernaq kananpaqqa munasqanman hina pitapas churan, nispa.

³³ Chay ratollan rey Nabucodonosorpa contranpi hanaq pachamanta rimarimusqanqa cumplikuran. Hinaqtinmi chay reyqa runakunapa kasqanmanta wikch'usqa kaspa torokuna hina pastota mikhuran. Cuerpontapas shullan apiyaran. Pelonkunapas ankapa phurun hinaraqmi wiñaran. Sillunkunapas alton phawaq animalkunapa hinaraqmi wiñaran.

Rey Nabucodonosorpa sanoyasqanmanta

³⁴ (*Rey Nabucodonorqa khaynatan nillarantaq:) —Sentenciawasqan tiempo cumplirukuqtinmi, noqa Nabucodonosorqa cielota qawarirani. Hinaspan kaqmanta yuyayniyman kutispa, razonniypiña karani. Hinaqtinmi noqaqa Tukuy Atiyniyoq Señor Diosta alabarani. Noqaqa wiña-wiñaypaq kawsaq Diostan yupaycharani. Noqaqa wiña-wiñaypaq kawsaq Diosmanmi graciasta qorani. Paypa gobiernonqa wiña-wiñaypaqmi takyan. Payqa wiña-wiñaypaq runakunapa mirayninkunata gobiernaqmi.

³⁵ Paypa ñawpaqninpiqa kay pachapi runakunaqa manan imapashchu kanku. Señor Diosqa ima munasqantan hanaq pachapi kaqkunawanpas hinallataq kay pachapi kaqkunawanpas ruwan. Paypa atiyninpa contranpiqa manan pipas sayarinmanchu. Imapas ruwasqanmantaqa manan pipas cuentataqa mañanmanchu.

³⁶ Noqaqa yuyayniymanmi kutirirurani. Hinaqtinmi hatunchasqa kayniypas, importante kayniypas, sumaqllaña k'anchariyniypas noqaman kutinpuran. Chaymi consejeroykunapas, noqata serviwaqniy runakunapas mashkawaqniy hamuranku. Gobiernanaypaqpas kaqmantan tronoypi tiyaykurani. Hinaspan ñawpaq gobiernasqaymantaqa aswan más atiyniyoqraq karani.

³⁷ Chaymi noqa Nabucodonosorqa hanaq pachamanta gobiernaq Reyta alabani, hatunchani hinallataq yupaychani. Paypa tukuy ima ruwasqanpas hinallataq justicia ruwasqanpas cheqaqpunin. Payqa hatunchakuqkunatapas k'umuykachachinmi, nispa.