Daniel 12 - Ñawpaq Testamento Apurímac Llaqtanchispaq Este nisqa Lawpaq

Tukukuy tiempomanta

¹ Chay tiempopin *nacionniykita cuidaq *ángel Miguel hatarimunqa. Chay tiempopiqa ancha ñak'ariykunan kanqa. Sayna ñak'ariyqa nacionkuna hatarichisqa kasqanmanta asta kunankamapas manan hayk'aqpas karanchu. Ichaqa chay p'unchawkunapin Israel nacionniyoq runakunaqa librasqa kanqaku. Sayna librasqaqa kanqaku llapallan sutinku libropi escribisqa kaqkunan.

² P'ampasqa kaqkunamantapas ashka runakunan kawsarimunqaku. Wakinmi kawsarimunqa wiñaypaq kawsanankupaq. Wakintaqmi kawsarimunqa wiña-wiñaypaq p'enqaypi kanankupaq.

³ Yachayniyoq runakunaqa hanaq pacha cielo hinan k'ancharinqaku. Justiciata ashka runakunaman yachachiqkunapas ch'askakuna hinan, wiña-wiñaypaq k'ancharinqaku.

⁴ Ichaqa Daniel, kay profecía willasqaytayá secretopi hap'iy. Kay librotaqa allinta sellaspayá tukukuy p'unchawkama waqaychay. Ashka runakunan yachayta mashkaspanku, kay lawman waq lawman purinqaku”, nispa.

⁵ Chaymantan noqa Danielqa qawarispay ishkay runakunata rikurani. Huknin kaqmi mayupa kay law patapi sayashasqa; huknin kaqñataqmi mayupa waq law chimpanpi sayashasqa.

⁶ Huknin kaqmi mayu hawapi sayaq linomanta p'achayoqta khaynata tapuran: “¿Hayk'a tiempotaq faltan kay admirakuypaq kaqkuna cumplikunanpaqrí?” nispa.

⁷ Hinaqtinmi chay mayu hawanpi sayaq linomanta p'achayoqqa makinkunata altoman oqariran. Hinaspan wiñaypaq kawsaq Diospa sutinpi juraspa khaynata niran: “Kaykunaqa cumplikunqa kinsa wata partenmantan, Señor Diospa ch'uya llaqtan manaña defendekuyta atiqtin”, nispa.

⁸ Chay runapa nisqanta uyarishaspaypas noqaqa manan entienderanichu. Hinaspan khaynata tapurani: “Señorníy, ¿kaykuna tukukuqtinri imataq pasanqa?” nispa.

⁹ Hinaqtinmi payqa khaynata contestawaran: “Daniel, ripullayña. Kay willasqaykunaqa tukukuy tiempokaman wishq'asqaña hinallataq sellasqaña kashan.

¹⁰ Ashka runakunan chay ñak'ariykunawan limpiasqa, yuraqyachisqa hinallataq ch'uyanchasqa kanqaku. Ichaqa mana allinkunata ruwaq malvado runakunaqa hinallan mana allinkunata ruwaspa kawsanqaku. Hinaspapas paykunaqa manan ni imatapas entiendenqakuchu. Aswanqa yachayniyoq runakunallan chaykunataqa entiendenqa.

¹¹ Saynaqa pasanqa Señor Diosman sapa p'unchaw lliwta k'anaspa sacrificio ofrendata ofreceyta dejasqankumanta hinallataq Señor Diospa templonpi millakuypaq kaqkunata ofreceyta qallarisqankumantapachan. Chaykunaqa pasanqa waranqa ishkay pachak esqon chunka p'unchawmi.

¹² ¡Ancha kusisqan kanqaku waranqa kinsa pachak kinsa chunka pishqayoq p'unchawkama suyaqkunaqa!

¹³ Ichaqa Daniel, qanqa wañunayki p'unchawkaman hawkalla kawsakunki. Hinaspan samakunki. Ichaqa qepa p'unchawkunapitaqmi premioykita chashkinaykipaq hatarimunki”, nispa.