SOFONÍAS 3 - Diospa Simin Qelqa

Jerusalenpa imaynachus qhepaman kananmanta

¹ ¡Ay Jerusalén llaqtamanta! Payqa manan Diosta kasunchu, payqa qhellin, runa alqochaqmi.

² Manan Diospa rimasqanman kasukunchu, manataqmi anyaykusqantapas hap'ikunchu, manan Señor Diosman hap'ipakunchu, manan Diosninman asuykunchu.

³ Kamachikuqninkunaqa qaparishaq leonkunan, juezninkunaqa tuta puriq lobokunan, paykunaqa manan tutamantapaq huk tullullatapas puchunkuchu.

⁴ Profetankunaqa anchaykachaqkunan, siminku mana hunt'aq runakunan. Sacerdotenkunaqa Dios yupaychana wasitan qhellichanku, Diospa kamachisqan simitan waqllichinku.

⁵ Señor Diosqa chay llaqta ukhupin kashan, payqa chaninpunin, manan ima mana allintapas ruwanchu, sapa paqarmi runakunapaq chaninkaqta ruwan, sapa paqarmi payqa hunt'allanpuni, chaypas millay runaqa manan p'enqarikunchu.

⁶ Señor Diosmi nin: Hatun suyukunatan chinkachirqani, hatunkaray torrenkunatan kumparqani, callenkunatan ch'inman tukuchirqani, manan pipas chaykunanta purinñachu. Llaqtankuqa thunisqan kashan, manañan ima runapas kapunchu.

⁷ Yuyarqanin: Jerusalenqa manchakuwanqapunichá, anyaykusqaytaqa hap'ikunqapunichá, nispa. Chay hina kaqtinqa tiyananqa manan thunisqachu kanman, tukuy chaykunamantaqa manan muchuchiymanchu karqan, paykunataq ichaqa tukuy ruwayninkupi waqlliyta munashallarqanku, nispa.

⁸ Señor Diosmi nin: Chayrayku suyaykuwaychis, hatun suyukuna huchachanay p'unchayta suyaykuychis. Yuyaykunin hatun suyukunata llaqtakunata huñuykuyta, paykunaman tukuy k'arak phiñakuyniyta chayachinaypaq. Rawrariq phiñakuyniymi kay pachantinta ruphaykunqa.

⁹ Chay tiempo chayamuqtinmi, hatun suyu runakunaq sonqonta mosoqyachisaq, hinan llapallan ñoqa Señor Diosmanta mañakamuwanqaku, llapallan huk-nisqa serviwanqaku.

¹⁰ Yupaychawaqniy runakunaqa Etiopía suyu mayukunaq chimpanmanraqmi ch'eqechisqa karqan, chaymantapachan ofrendakunata apamuwanqaku.

¹¹ Llaqtalláy, chay p'unchaypiqa manan p'enqachisqachu kanki ñoqa contra sayarispayki ruwasqaykikunamanta, chaypachan qan ukhumanta wikch'usaq kusisqa k'ankaykachaqkunata, manañataqmi hayk'aqpas ch'uya orqoypi anchaykachankiñachu.

¹² Qan ukhupin k'umuykukuqkunata wakchakunata qhepachisaq, paykunan ñoqa Señor Diosman hap'ipakamuwanqaku.

¹³ Israel llaqtamanta puchuqkunaqa mana chaninta manan ruwanqakuchu, manan llullakunqakupaschu, manan astawanpas q'otunqakuchu. Paykunaqa mikhunqakun, samakunqakun, manataqmi imapas mancharichiqninku kanqachu, nispa.

Jerusalenmanta kusisqa takina

¹⁴ Sión llaqta, takiykuy, Israel runakuna kusisqa qapariy, Jerusalén llaqta, q'ochukuy, tukuy sonqo kusikuy.

¹⁵ Señor Diosmi manaña muchuchisunkiñachu, awqaykikunatapas wikch'upunmi. Israelpa reynin Señor Diosmi qanwan kashan, manan ima mana allinkaqtapas manchakunkiñachu.

¹⁶ Chay p'unchaymi Jerusalenta ninqaku: Sión llaqta, ama manchakuychu, makiykipas ama pisi kallpayachunchu.

^17-18 Apu Señor Diosniykiqa qanwanmi kashan, payqa kallpasapallañan, qespichisunkin. Payqa qan hawan kusisqa q'ochukunqa, munakuspasuykin kawsarichisunki, fiesta p'unchaykunapi hinan takispa qanmanta kusikunqa, nispa. Señor Diosmi nin: Chaypachan ñoqaqa llakipi kasqaykita karunchasaq, ancha p'enqachisqa kasqaykita chinkachisaq.

¹⁹ Llapa sarunchaqniykikunatan muchuchisaq, wist'uspa puriqkunatan qespichisaq, ch'eqechisqa runaykunatan pusakampusaq, pisichasqa kasqaykichis llapa suyukunapitaq yupaychasqa mentasqa kankichis.

²⁰ Chay p'unchaykunapin ñoqa pusakampusqaykichis, chay p'unchaykunapin ñoqa huñukampusqaykichis, qhawashaqtiykichismi wakmanta t'ikarichisqaykichis, hinan kay pachantinpi mentasqa yupaychasqa kankichis, nispa. Señor Diosmi chayta nin.