DANIEL 3 - Diospa Simin Qelqa

Qorimanta llut'asqa runata Nabukodonosorpa yupaychachisqan

¹ Rey Nabukodonosormi qorimanta llut'asqa runata ruwachirqan, chaypa sayayninmi kinsa chunka metro karqan, anchontaq kinsa metro. Chaytan Babilonia nisqa provinciapi Dura nisqa pampapi sayachirqan.

² Hinaspan rey Nabukodonosorqa waqyachimurqan suyupi kamachikuqkunata, prefectokunata, provinciapi kamachikuqkunata, yuyaychaqkunata, qolqe waqaychaqkunata, llapa juezkunata, llapa provinciapi oficialkunatawan, paypa sayarichisqan llut'asqa runata ch'allanaman hamunankupaq.

³ Hinaqtinmi chay llapa runakunaqa huñukamurqanku rey Nabukodonosorpa sayarichisqan llut'asqa runata ch'allanapaq, llut'asqa runaq ñawpaqenpitaq sayasharqanku.

⁴ Willakuqtaq kunkayoqta willakurqan: Uyariychis, llaqtakuna, hatun suyukuna, ima rimaytaña rimaqkunapas. Reymi kamachisunkichis:

⁵ Pututuq, qenaq, arpaq, tawtinkuq, zampoñaq, llapa tocanaq waqasqanta uyarispaykichismi qonqorikunkichis, yupaychankichis rey Nabukodonosorpa ruwachisqan qorimanta llut'asqa runata.

⁶ Pillapas mana qonqorikunqachu, manataq yupaychanqapaschu chayqa, rawrashaq horno ukhumanmi kaq rato wikch'uykusqa kanqa, nispa.

⁷ Chaymi pututuq, qenaq, arpaq, tawtinkuq, zampoñaq, llapa tocanaq waqasqanta uyarispa, llapa llaqtakuna, hatun suyukuna, ima rimaytaña rimaqkunapas qonqorikurqanku, hinaspan rey Nabukodonosorpa sayarichisqan qorimanta llut'asqa runata yupaycharqanku.

⁸ Chaypachan Babilonia wakin qharikunaqa rispa Judío qharikunata ch'ataspa,

⁹ rey Nabukodonosorta nirqanku: —¡Wiñaypaq reyqa kawsachun!

¹⁰ Qanmi, reyniyku, kamachikurqanki pututuq, qenaq, arpaq, tawtinkuq, zampoñaq, llapa tocanaq waqasqanta uyarispa llapa runa qonqorikunanpaq, qorimanta llut'asqa runata yupaychanankupaq.

¹¹ Kamachikullarqankitaqmi pipas mana qonqorikuqqa manataq yupaychaqqa rawrashaq horno ukhuman wikch'uykusqa kananpaq.

¹² Chaypas Judío wakin qharikunan mana manchakusunkikuchu, manan diosniykikunata yupaychankuchu, manan qorimanta llut'aspa sayarichisqayki runatapas adorankuchu, paykunatan churarqanki Babilonia nisqa provinciapi kamachikunankupaq: Shadrakta, Meshakta, Abed-negotawan, nispa.

¹³ Hinaqtinmi Nabukodonosorqa sinchi k'arak phiñasqa kamachikurqan Shadrakta, Meshakta, Abed-negotawan apamunankupaq. Chaymi chay qharikunaqa reypa ñawpaqenman apamusqa karqanku.

¹⁴ Hinan Nabukodonosorqa paykunata tapuykurqan: —Shadrak, Meshak, Abed-nego, ¿cheqachu qankunaqa diosniykunata mana yupaychankichis, ruwachisqay qorimanta llut'asqa runatapas mana yupaychankichis?

¹⁵ Kunanqa pututuq, qenaq, arpaq, tawtinkuq, zampoñaq, llapa tocanaq waqasqanta uyarispa qonqorikuspaykichis, ruwachisqay llut'asqa runata yupaychaychis. Mana chayqa, kunanpachan rawrashaq horno ukhuman wikch'uykusqa kankichis. Chhaynaqa, ¿ima diostaq qankunata kacharichisunkichisman ñoqaq atiyniymanta? nispa.

¹⁶ Shadrakwan Meshakwan Abed-negowantaq rey Nabukodonosorman kutichirqanku: —Manan kaymantaqa qanman kutichinaykuraqchu.

¹⁷ Rawrashaq hornoman wikch'uykuwankiku chayqa, yupaychasqayku Diosniykuqa atiyniyoqmi chaymanta qespichiwanankupaq, paymi makiykimanta qespichiwanqaku.

¹⁸ Manaña qespichiwanqaku chaypas, yachay reyniyku, manan diosniykikunataqa yupaychasaqkuchu, manataqmi qorimanta llut'aspa sayarichisqayki runamanpas qonqorikusaqkuchu, nispa.

¹⁹ Hinaqtinmi Nabukodonosorqa sinchi k'arakta phiñakurqan, uyanpas kullimanraq tukurqan Shadrak, Meshak, Abed-nego contra, hinaspan kamachikurqan hornoqa parinanmantapas qanchis kutitawanraq astawan parinanpaq.

²⁰ Ejercitonpi allin kallpasapa wakin qharikunatataq kamachirqan Shadrakta, Meshakta, Abed-negotawan t'eqespa rawrashaq hornoman wikch'uykunankupaq.

²¹ Hinan chay qharikunaqa llaqollantin, pantalonnintin, uma k'uyunantin, p'achantin t'eqesqa, qanqeshaq hornoman wikch'uykusqa karqanku.

²² Reyqa usqhaylla hunt'akunanpaqtaq mat'irqan, sinchita parichisqanku hawan nina qanqeyqa Shadrak, Meshak, Abed-nego wikch'uykuqkunata rupharparirqan.

²³ Chay kinsantin qharikunataq rawrashaq horno ukhuman t'eqesqapacha chayarqanku.

²⁴ Hinamantataq rey Nabukodonosorqa utirayarqan, hinaspan qonqaylla sayarispa yuyaychaqnin runakunata tapurqan: —¿Manachu kinsa qharita t'eqesqatakama nina ukhuman wikch'uykurqanchis? nispa. Paykunataq kutichirqanku: —Arí, hinapunin, reyniyku, nispa.

²⁵ Reytaq nirqan: —¡Qhawariychis! Ñoqan rikushani paskasqa tawa qharikunata, nina ukhupi mana imanasqalla purishaqta, tawakaq runaqa dioskunaq churinmanmi rikch'akunpas, nispa.

²⁶ Hinaspanmi Nabukodonosorqa rawrashaq horno punkuman asuykuspa kunkayoqta waqyakurqan: —¡Shadrak, Meshak, Abed-nego, Qollana Diospa kamachinkuna, lloqsimpuychis, hampuychis! nispa. Hinan kinsantinku nina ukhumanta lloqsimpurqanku.

²⁷ Chaymi suyupi kamachikuqkuna, prefectokuna, provinciapi kamachikuqkuna, reypa yuyaychaqninkunapas chay qharikunata qhawanankupaq huñukamurqanku. Chaykunaq cuerpontan ninaqa mana imanallasqapaschu, uma chukchankutapas manan chheqchirillasqapaschu, p'achankutapas manan qompirillasqapaschu, manan nina-ninallapas asnasqakuchu.

²⁸ Chaypachan Nabukodonosorqa kunkayoqta nirqan: ¡Yupaychasqa kachun Shadrakpa, Meshakpa, Abed-negoqpapas Diosninqa! Paymi angelninta kachamurqan, hinaspan payman hap'ipaykukuq kamachinkunata qespichirqan. Manataq reypa kamachikusqanta hunt'arqankuchu, wañuymanpas qarakurqanku Diosninkumanta wak diosman manapuni qonqorikushaspa yupaychashaspa.

²⁹ Chaymi kamachikuni, pipas k'aminman Shadrakpa, Meshakpa, Abed-negoqpas Diosninta chayqa, tawaman llik'isqa kachun, wasinpas thunisqa kachun, may llaqtamantapas, suyumantapas, rimaymantapas payqa kachun. Manan wak diosqa kanchu kay Dios hina qespichiyta atiqqa, nispa.

³⁰ Hinaspanmi reyqa Babilonia nisqa provinciapi hatuncharqan Shadrakta, Meshakta, Abed-negotawan.