DANIEL 3 - KÜMÜTSE Naga Bible (BSI)

Suna Anguowa Khurü üta Azahkütsü

¹ Kajiwa Nebukhadnezzar nüh suna anguo küsü ma kümsie apienyo rorake thi aküji apienyo türo sanü Babilon nyuji vü Dura kütake vü saküto ke.

² Jüti küsa vü kajiwa Nebukhadnezzar nüh wuori küze nü küsara küketeri, küketeriri, kümkhrüri, zhüphiekütsüri, künyirhieküsatheri, shethuokütsüri, sathuokütsüri, thi nyujiri vü aküjiri tü sezhuhnü kajiwa Nebukhadnezzar nüh anguo sakütoke küsa kümthü vü ru üti küza küze.

³ Jükenüh küsaraküketeri, küketeri, kümkhrüri, zhüphiekütsüri, künyirhieküsatheri, shethuokütsüri, sathuokütsüri, thi nyujiri vü aküji aveh tü kajiwa Nebukhadnezzar nüh anguo sakütoke küsawa müthü nti sezhuh khe. Mari tü Nebukhadnezzar nüh anguo sakütoke küsawa atüvü tsie nü,

⁴ zie nü zhüchüh taji, nohri tü zhütsümthuoh, O anyiri, akuoküjiri, thi azhüküpapari,

⁵ nohri tü arütsü khi, pilechu, topito, mürülihuke nü kükhuri, atakhu, thi küreihi zah küsüküsü nga künara thuoüji, nohri tü kajiwa Nebukhadnezzar nüh shie küsa suna atsowa vü küngie tsuo nü khurü naveh;

⁶ thi thari nüh tsuo zeh nü mükhurü nüh sanaveh ünüh müküzhike wie thuoh nüh anyih juphierake nü peh küveh lovü shohjakem naveh, ti küza.

⁷ Jükenüh anyiri aveh tü arütsü khi, pilechu, topito, mürülihuke nü kükhuri, atakhu, thi küreihi zahri jikhi aveh küünara vü anyiri aveh akuoküjiri, thi azhü küpapa küphrari aveh küngie tsuo nü kajiwa Nebukhadnezzar nüh suna atso shie küsawa khurü khe.

Azhü mküüna kenüh Daniel Fü Küche Phraküümsü

⁸ Jükenüh jüma tsotha vü Khaldea wuori atüvü tsezhuru nü taji Judahri phrahtemsü.

⁹ Mari nüh kajiwa Nebukhadnezzar vü, “O Kajiwa, küsuokürho rholuo!

¹⁰ Noh, O kajiwa nüh küphrake küsü sasa vehthuoh, jüma tü anyiri küsüküsü nga arütsü khi, pilechu, topito, mürülihuke nü kükhuwa, atakhu, thi küreihizah jikhi aveh künara thuoüji tsuo zeh nü suna atsowa khurü naveh;

¹¹ thi thari nüh tsuo zeh nü mükhurü nüh sa naveh ünüh anyih juphierake küveh lovü shojake naveh ta küza.

¹² Noh nüh Judahri wuori Babilon nyuji kütsazari anyiehvü chieke kümri: Shadrak, Meshak, thi Abednego. Anyi hamari tü, O kajiwa, nohvü aluoveh müthse nüh sam; mari tü noh nyiazara kütsü müsanüh sam, nyutü noh nüh shiekütoke küsa suna atsowa mükhurü nüh sam,” ti küza.

¹³ Jüti küsa vü Nebukhadnezzar tü luovehküzühshe nü müküüzhira arüküshu shu taji Shadrak, Meshak thi Abednego sieru üti azhütsü. Thinü anyi hamari küche tü kajiwa atüvü sieru.

¹⁴ Nebukhadnezzar nüh mari küche vü, “O Shadrak, Meshak, thi Abednego, nohri küche tü eh nyiazari akütsü müsa nyutü hi nüh suna atso khake küsawa mükhurü ta küsa jüma tü azhütsa ülo?

¹⁵ Khinyi mükütüküzü nohri küche nüh arütsü khi, pilechu khi, topito, mürülihuke nü kükhu khi, atakhu, thi küreihizah jikhi aveh künara thi küche taji hi nüh saküsa vü tsuo zeh nü anguowa khurü thuoüji mhie thi mhie sheh naveh, thitü mükütüküzü nohri küche nüh mükhurü thuoüji nohri küche tü anyih juphierake küveh lovü müküzhike wiethuoh nüh shohjakewie nathuoh; thi eh ke vünüh nohri küche vizhu na küsa thawa lo?” ti küza.

¹⁶ Shadrak, Meshak thi Abednego nüh Kajiwa vü, “O Nebukhadnezzar, akero hama kenüh noh vü moma rületsü sa.

¹⁷ Mükütüküzü jüüta wie ketünga hiri Saküüwuowa, hiri nüh ma kütsü sakütsewa nüh anyih juphierake küvehwa vünüh hiri vizhura wie naveh; ma nüh noh ke vünüh hiri vizhura wie naveh, O kajiwa.

¹⁸ Thitü jüüta nyu thuoüji, noh tü thsüluo, O kajiwa, hiri tü noh nyiazari kütsü küsawa nyu, nyutü noh nüh shie küsa suna anguowa kükhurüwa nyu,” ti rületsü.

Daniel Füri Küche Küüsüm nta Küsa

¹⁹ Jüti küsa vü Nebukhadnezzar tü aheze sheh nü ma nüh küphra, atso tü Shadrak, Meshak, thi Abednego vü anyieh küpa satewa. Ma nüh anyih küju wa tü türükeri anyiehvü nüh aküsa sa üta azah tsü.

²⁰ Thi ma nüh ma thopahiri akükhra anyi wuori vü Shadrak, Meshak, thi Abednego kho nü anyih juphierake küveh lovü khajake üti azah tsü.

²¹ Jüti sanü anyi hamari nüh mari kruzhu, küüzhuthsü mari lüwe, thi mari thsünyawari vünüh pheh nü anyih juphierake küveh vü khajakem,

²² küpakenühnyunü kajiwa azah tü khosheh küm kenüh, thi anyih juphierake küvehwa tü sa sheh, jüti küsa vü, anyihzhu nüh Shadrak, Meshak thi Abednego khaküthseri tü kürüke tetu.

²³ Thi anyi hamari küche, Shadrak, Meshak, thi Abednego tü kho nü anyih juphierake küveh lovü tetu.

²⁴ Thinü kajiwa Nebukhadnezzar tü krüngo nü shiti jotesüra. Ma nüh ma zhüphiekütsüri vü, “Hiri tü anyi küche kho nü anyih lovü khamjake ülo?” ti küza. Mari nüh kajiwa vü, “Azhütsa lie, O kajiwa,” ti rületsü.

²⁵ Ma nüh, “Thinü hi tü anyi müzü lerie nü anyih zhila vü tseküveh ngu veh nü, thi mari tü münomna müveh nü; thi müzüawa tso thuoüji nyiazara tso küsü kümjie nü,” ti rületsü.

Anyi Kücheri tü Küshum nü Khaketsüküm

²⁶ Jüti küsa vü Nebukhadnezzar tü anyih juphierake küveh mükhie kütuohvü ru taji, “Shadrak, Meshak, thi Abednego, kümsie Tsa Saküüwuowa sieperi teshuhru luo, thi havü ra luo,” ti küza. Thinü Shadrak, Meshak, thi Abednego tü anyih lovü nüh tsezhu teru.

²⁷ Thi küsaraküketeri, aküjutsari, kümkhrüri, thi kajiwa zhüphiekütsüri tü sezhuh nü anyihwa tü anyi jümara satsa vü akükhra küsü nga mükünyie ngu ra; mari asheh tü mümro wie, mari kruzhu tü mürake, thi mari küche rügivü anyih rhe wie nga müpe wie.

²⁸ Nebukhadnezzar nüh, “Shadrak, Meshak, thi Abednego Saküüwuowa tü akütsia küvüwa saluo, ma nüh ma zhülewa küze nü ma sieperi ma vü alehkünori vizhu nü kajiwa nüh azhütsü tü müjuju sam, thi mari tü mari satsa vi nü nyiaza küpara kütsü küsa thi kükhurü nyiehvü nüh mari mpa mari Saküüwuowa vü mari satsa tsü.

²⁹ Jükenüh hi nüh küphrake sa veh: Anyi küsüküsü nga, akuoküji küsüküsü nga, nyutü azhü küpapa küphra küsüküsü nga Shadrak, Meshak, thi Abednego Saküüwuowa vü azhüphra küümsü küsüküsü nga sathuoüji asatsa mahnyomahnyo vünüh shohthuo shohthuoja naveh, thi ma zhehri tü ferieja küümsüm naveh; küpakenühnyunü hakümjie vünüh vizhu na küsa nyiaza küsü nga mükünyieluo kenüh,” ti küza.

³⁰ Jüsevü kajiwa nüh Shadrak, Meshak, thi Abednego tü Babilon nyuji vü khaketsüm.