Lúkas 2 - Uhokri Gahegbetawni Nukune akak Sawmus

Jesus giwayvuka

¹ Avim ini hawkri minikwak amekene Sezar Awgustu wasavanaw giminkis madikte hiyeg adahan igkis tamakkiswiyes giwkis adahan pukuhpiye aysaw gikebikis.

² Ini pitatye akavuska ig keh adahan pukuhpiye hiyeg. Ig keh hene avim ini hawkri ku aysaw amekene Kirinu kumadukene hiyeg ayge Siriyamnaw.

³ Ayge nikwe madikte hiyeg atak ta avitit giwaxigkis ku kiney igkis wayvuka adahan igkis tamakkiswiyes giwkis atere.

⁴ Ig José tivikwata adahan ig tamakkiswiye giw. Ig tivik avititak paytwempu Nazaré ku pariye aynene Galileyamnaw. Ig tivik ta avitit Judeyamnaw, ta avitit paha paytwempu kewye Belém, ku kiney amekene Davi ig wayvuka. Ig atak atere mmanawa ig amekene Davi gihiwhi.

⁵ Ig atak tamakkiswiye giw gukak kiyavuno Mahi ku kakak ig kuwis ahegbet ginetni. Egme biwhkisno giwntak Uhokri Gitip.

⁶ Egkis danuh atere, eg kiyavuno Mahi gukaygavrik danuh adahan eg pamakutekwiyo.

⁷ Heneme yuma iwetrit ayge gudahan ariku payt danuhpenevwi givinkis. Ayteke nikwe egkis ute paha payt pak avin. Ayge eg sarayhe gukamkayh guhimnatine. Eg awasamkuhpig akak giybet. Eg haritasevgi amadgat pak amanarati.

Ahj hiyapkiswa ta gitkis muwtohvutnevwi

⁸ Aygenewa avit ini waxri pahabu muwtohvutne ayge amatmadga. Igkis ayge avuriwnes givigkis muwtoh hewke tiyegem.

⁹ Pahaye adahan pahavwi ahj Uhokri giwatni hiyapkiswe ta gitkis. Uhokri gibutni uguhpigkis. Igkis hiyapni hene, igkis avisasew ka aynsima.

¹⁰ Igme ahj awna gitkis: — Ka yi muwaka avis. Timapnabay nuwnuh. Nah ewkne yit kibeyne inetit. Ka aynsima batekka ay gidahankis madikte hiyeg.

¹¹ Mmanawa avimnewa inin yamnihten amadgat wayk kuwis. Ig wayvuka avit ini paytwempu ku kiney amekene Davi wayvuka. Igi Ukivarawiy Cristo, ig Uhokri gikanyan adahan yikumaduketni.

¹² Nah akkite yit ku samah yis hiyakgi. Yis utivginek awasamuk akak giybet ig harit amadga pak amanarati.

¹³ Pisenwa ner ahj giwn, pahaye adahan ka aynsima ahj inurikyenevwi hiyapkiswe ayge gihumwa. Igkis kibeyhenes Uhokri. Igkis awna:

¹⁴ — Kibeyne gidahan Uhokri ay inurik. Batekka ay gidahankis hiyeg ku pariye Uhokri gibetkivu ay amadga hawkri.

¹⁵ Pisenwa gibetkikis igkis tivik ta inurikut akiw. Igkisme muwtohvutnevwi hiyapni hene, igkis kinetihwa pawtak. Igkis awna: — Uyay atak ta avitit paytwempu Belém. Uyay iwasa ini ku pariye danuh wotwiy, ku pariye Uhokri akka wotwiy ku avim inin.

¹⁶ Igkis tivik kibehtenwa. Igkis danuh atere, igkis ivegvevgi. Ayteke igkis ute kiyavuno Mahi gikak José. Ayge igkis hiyap ner bakimni harit amadga pak amanarati.

¹⁷ Igkis hiyapni hene, igkis ekke ta gitkis madikte hiyeg ku pariye neras ahj kinetihwa gitkis gimin ner bakimni.

¹⁸ Igkis hiyeg time neras muwtohvutnevwi ginetnikis inakni, igkis wakaymnibdi ka aynsima.

¹⁹ Egme kiyavuno Mahi darihe inakni inetit ay gutiwrik. Eg takunipti ivegminano guhiyekemni nimin.

²⁰ Igkisme muwtohvutnevwi igkis diyuhe akiw. Igkis kibeyhenes Uhokri. Igkis awna: — Uhokri ka gabayisima ukakwiy. Kibeyne adahan madikte ku pariye hiyapkiska wotwiy ku avim inin. In inyewa ku samah ner ahj gakkan wotwiy.

Sarayhka giw Jesus

²¹ Ariwnteke ini pahay paka akiw, ahawkanavrik danuh adahan hiwhpiki bakimni givit. Ayge givit hiwhpika*. Nikwe ig sarayhka giw Jesus ku samah ner ahj kinetihwa gimin avim ini avit ginag biwhkisgi.

Mahi gikak José gekkepten gukamkayhkis ta git Uhokri

²² Ayteke ariwnteke ini ahawkanavrik danuh adahan eg kiyavuno Mahi makniw ariw ku samah eg pamakutak. Egkis hiyapni hene, egkis bayahminasevyos guvathawnikis ku samah amekene Moís gikumadukan awna. Nikwe egkis tivik atere ta avitit paytwempu Jerusalém. Egkis waxwe gukamkayhkis atere adahan egkis gekkepten ta givetunat Uhokri.

²³ Mmanawa Uhokri gikumadukan awna: “Madikte tinogben guhimnatinekis awayg igkis gidahanwa Kiyavwiye Uhokri.”

²⁴ Egkis danuh atere, egkis kakanhaw git Uhokri. Mmanawa Moís gikumadukan awna adahan hiyeg kakanhaw git Uhokri piyana akebi ugus ba piyana akebi tukwayan ku kavim tino pamaktak.

Simeyawh kinetihwa gimin Jesus

²⁵ Ayge avit ini paytwempu Jerusalém pahavwi awayg giw Simeyawh. Ig kibeyne awayg. Ig waditye. Ig wahepnenekwa ner pahavwi ku pariye nehmnikuhpiye adahan ikeviye gawaygikis gihiyegavu izhaewyenevwi. Ig Uhokri Gitip aynenekwa givit.

²⁶ Ig Uhokri Gitip kuwis akka git ku avit ig miya ig hiyepnete Cristo danuh atan amadgat inin.

²⁷ Avim ini hawkri ig Uhokri Gitip awahkiswig parak ta arikut ini leglis kewye Uhokri Givin. Ig danuh atere. Ayteke Jesus ginag gikak José egkis hawata danuh atere. Egkis waxwe Jesus atere adahan egkis gekkepten ta git Uhokri ku samah gikumadukan awna.

²⁸ Ig amekene Simeyawh hiyapni hene, ig iwe bakimni ta giwanmakut. Ig kabayha Uhokri. Ig awna:

²⁹ — Kuri Kiyavwiye, nah ahegbet adahan nah miya akak madikte nubetki. Hiyawa pis iwevun nah pibuk amadgatak inin. Mmanawa kuwis in danuh ku samah pis awna nutuh minikwak.

³⁰ Kuwis nah hiyap wamnihtenuh akakwa nuwtyak. Nah hiyap ner ku pariye pis

³¹ ahegbete adahan gamnihtenkis madikte hiyegviyenevwi amadga inin hawkri.

³² Ig humawnek kewa paha abukribe adahan ig uguhne gihiyekemnikis neras hiyeg kane judeyenevwima. Ig humawnek pihiyegavu izhaewyenevwi gikiytanikisnek.

³³ Eg ginag gikak José egkis timapni hene, egkis wakaymni adahan inakni iwit ku pariye ig amekene Simeyawh awna gimin bakimni.

³⁴ Ayteke ig amekene Simeyawh kiye Uhokri gudahankis. Pisenwa ig awna ta gut Jesus ginag: — Kibeyne. Kiyavwiye Uhokri ikiswanaw gidahan ner pikamkayh adahan ig humaw areketni Uhokri gihiyekemni ta gitkis hiyeg izhaewyenevwi. Aysawnemenek ka aynsima hiyeg tukuhwevwa giw pikamkayhnek. Amun ini nikwe igkis biyukapnek. Heneme ka aynsima hiyeg akiw kamaxwevyes givititnek. Igkis danuh ta git Uhokrinek.

³⁵ Mmanawa ig hiyapkisnek ku pariye hiyakemniki ayemewnene ay avit hiyeg giyaknikis. Pisme kiyavuno, pis kayahnek abet pihiyekemni ka aynsima.

Ana kinetihwa gimin Jesus

³⁶ Ku samah ig awnempiye inakni iwit, pahavu tino danuh atere. Guw Ana. Eg pahavu Uhokri gawneve. Eg amekene Fanuwew gikamkayh, eg aseryano. Eg kiyaparuvyo kuwis. Eg kigihgunyo adahan ntewnehkerbu kamukri.

³⁷ Ayteke eg madankup adahan ka aynsima kamukri akiw, ntewnehkerbu akak pahak arawna madikwa akebi akak paxkabu akiw (84). Eg misakwa ayge ariku ini leglis kewye Uhokri Givin. Avanenekwa eg maxhawno adahan eg kiyeno Uhokri gihiyekemni. Avanenekwa eg piriyepkawno ta git Uhokri. Avanenekwa eg kibeyhene ig*.

³⁸ Eg danuh atere, eg utevgikis ayge. Eg hiyapni hene, eg kabayha Uhokri. Han pitatit eg kinetihwano gimin Jesus ta gitkis neras jerusalémyenevwi ku pariye wahepnenevwi gamnihtenkis.

³⁹ Egme ginag Mahi gikak gaymuhten José egkis pisenwa akak madikte ku pariye Uhokri gimawkan ta gutkis, egkis tivik. Egkis diyuhe ta avitit guwaxigkis Galileyamnaw ta avitit ini paytwempu Nazaré.

⁴⁰ Ayteke ariwnteke ini ig bakimni aymuhwe. Ig kawih Uhokri gihiyekemni kabayntiwa. Ig humaw hiyakemniye hiyeg. Ig Uhokri ka gibetkisima gikak.

Jesus barew gitakwayisa

⁴¹ Mpuse pahak kamukri hiyeg judeyenevwi fetya adahan ignes kiyenes ku samah minikwak Uhokri wiwhkiswiye amekenegben giwakutakis hiyeg ejituyenevwi. Jesus ginag gikak José egkis inpawa atak ta avitit paytwempu Jerusalém adahan egkis mpiyasene ini fet atere.

⁴² Ig Jesus barew gitakwayisa kuwis madikawkubu kamukri akak pikana arawna (12) gaw, egkis tivik gikak ta avitit Jerusalém ku samah inpawa egkis keh.

⁴³ Amavya fet ig Jesus ginag gikak José egkis diyuhpiyokis akiw. Igme Jesus misekwe ayge Jerusalém egkis ka hiyaknima.

⁴⁴ Egkis guvewkankiskam ku ig ayge gibetkis neras ku pariye diyuhpiyevwi. Nikwe egkis wewnokis pahay hawkri. Ayteke egkis ivegevgi guvuwiwkis gukebyuvwikis, guvuwiwkis guhiyaknivukis.

⁴⁵ Heneme egkis ka utivgi. Ayteke nikwe egkis diyuhe ta avitit Jerusalém. Egkis danuh atere, egkis ivegevgi muwapuw akiw.

⁴⁶ Abet amamnampiye hawkri egkis utevgi aynte ariku ini leglis kewye Uhokri Givin. Ig bat ayge giyegbikis pahabu kannuhekevutnevwi. Ig timepne giwnkis ig gayapminetnikis ayge.

⁴⁷ Madikte timepnevwi ayge igkis wakaymnibdi awaku ku samah ig kaytwa giwnkis akak kibeyne hiyakemniki.

⁴⁸ Eg ginag gikak gaymuhten José egkis hiyavgi ayge, egkis wakaymni. Eg ginag awna git: — Bakimni, mmahka pis arehwa ukakuh hene? Nah gikak pig usuh ka aynsima kiyimwih unaktin pikak adahan pivegepten muwapuw.

⁴⁹ Igme kaytwa guwn: — Mmahki yis ivegvan muwapuw? Mmah yis ka hiyaknima ku nah nubetki misakwa ay givineku Niguh?

⁵⁰ Egkisme ka pukuha inakni giwn.

⁵¹ Ayteke ig tivik guhaptikis ta avitit paytwempu Nazaré. Ayge ig kumadukasewne ta gutkis. Egme kiyavuno Mahi darihe inakni giwn ay gutiwrik. Eg takunipti ivegminano guhiyekemni nimin.

⁵² Igme bakimni aymuhwe hiyakemniye. Mpuse hawka ig imuw. Uhokri batek gikak ka aynsima. Hawata madikte hiyeg hawata igkis batek gikak.