MATIUS 3 - BUKI SUSI Wahasa ngu Taghul᷊andang l᷊ou-l᷊ou

Nasi i Yohanes Mananahani

¹ Su tempo e'e i Yohanes Mananahani nusumongo su tana l᷊inggi su Yudea dang nanita nunasi.

² Angkunge, “Putobati bou apang dosa ngi kumu, ual᷊ingu Mawu Ruata seng maehong mamarenta kere Ratu!”

³ I Yohanes i'i taumata ko niul᷊i i nabi Yesaya uare, “Pia taumata ko kakihae su tana l᷊inggi, ‘Sadiaiko l᷊al᷊eng guna ngu Mawu, pakateneko l᷊al᷊eng guna ngi Sie.’ ”

⁴ I Yohanes nul᷊oho l᷊aku bou pisi ngu onta. L᷊aiki kal᷊uwaenge bou pisi ngu binatang, dang kange kumbati l᷊au ghul᷊a ngu katiupang.

⁵ Maul᷊i taumata bou Yerusalem, bou kaul᷊i u kampong su Yudea dang bou apang tampa su sindihang u sal᷊uhi Yordan nusumongo sarang koa i Yohanes.

⁶ I Sire nangaku apang dosa ngi sire, bou e'e i Yohanes nanahani si sire su sal᷊uhi Yordan.

⁷ Maul᷊i l᷊ai tau Farisi l᷊au tau Saduki nusumongo makisahani si Yohanes. Kuteu su tempo i sie nakawua si sire kasongonge, I sie nangul᷊i si sire, “I kumu taumata ko dal᷊ai! I sai nangul᷊i i kumu mal᷊iwiri bou hukumang u Mawu Ruata ko sarung ruminta?

⁸ Andaghiete dingang u kakanoau himoneu i kumu tinga-tingari seng nutobati bou dosa ngi kumu.

⁹ Kumbahang manika i kumu mal᷊iwiri bou hukumang, ual᷊ingu mangul᷊i i Abraham ko i upung i kumu. Putinaung, Mawu Ruata makakoa l᷊ai hintou ngi Abraham bou manga watu tamai i'i!

¹⁰ Wal᷊iung seng masasadia ipanuwang kau sarang hamue. Apang kau ko ta muwua ngu wua ko mapia, sarung ituwang dang irume su putung.

¹¹ Ia manahani si kumu dingang u ake tadeau mupakal᷊ahe i kumu seng nutobati bou dosa ngi kumu; arawe ko sarung ruminta samuri ngu ia, sarung manahani si kumu dingang u Roh u Mawu Ruata l᷊au putung. I sie nangilebe l᷊abo bou ia. Sarang mamebe sapatu-E ia ta nuhino.

¹² Su l᷊imange pia nihung iputa kaul᷊i u gandung-E, sarang paka bursi. Gandung sarung ikomol᷊i-E su l᷊al᷊ung u lumbung, arawe kaul᷊i u kepange sarung itutung-E su l᷊al᷊ung u putung ko ta mate.”

I Yesus nisahani

¹³ Su tempo e'e I Yesus bou Galilea natamai nakoa sarang sal᷊uhi Yordan. Pai se'e i Sie nusumandighi si Yohanes dang nundo makisahani.

¹⁴ Arawe i Yohanes sal᷊awe ta makatarima ndo-E e'e. I Yohanes nangul᷊i. “Hinonge ko ia we sahani ngi Tuang. I'i nakoawe i Tuang nusumongo si sia.”

¹⁵ I Yesus nusumimbahi, “Walate, kitang su orasi i'i. Watu'u dingang kiri'i i kite mukoa kaul᷊i u apang ko ikao u Mawu Ruata.” Boko we kere'e, i Yohanes nanahani si Yesus.

¹⁶ Bou nisahani, I Yesus naehong nuwua bou ake u sal᷊uhi e'e. Singkawua l᷊angi nawuka dang I Yesus nakawua Roh u Mawu Ruata nul᷊umintu musul᷊ung kere burung paluma su wawo ngi Sie.

¹⁷ Bou e'e i Sie nakaringihi tingihi Mawu Ruata nangul᷊i, “I'i Ahusi-Ku ko Daku ikindaghi. I Sie makal᷊uasi naung-Ku.”