MATIUS 2 - BUKI SUSI Wahasa ngu Taghul᷊andang l᷊ou-l᷊ou

Manga sake bou simbuka ngu Raki

¹ I Yesus nipahinding su soa ngu Betlehem su tana Yudea su tempo ngu Ratu Herodes kapamarentange. Tempo e'e pia pirangkatau mapapande ngu wituing bou simbuka ngu Raki nusumongo su Yerusalem.

² I sire nukina suapang tampa, “Su apa Ana ko wuhu nipahinding ko nitantu makoa ratu ngu tau Yahudi? I kami nakawua wituing-E nusumuwang su pung u raki, dang i kami nusumongo i'i musuba si Sie.”

³ Suapang i Ratu Herodes nakaringihi hal᷊i e'e, i sie nahuwi l᷊ai-l᷊ai, kere'e l᷊ai kaul᷊i u taumata su Yerusalem nughigho.

⁴ Hakiu e'e i sie nuparenta pukui apang manga mawu imam, dingang u manga meteri agama pukomol᷊i. Bou e'e i sie nukina si sire, “Su apa Ratu ko nipudiandi ngu Mawu Ruata sarung ipahinding?”

⁵ I sire nusumimbahi “Su Betlehem, su tana Yudea. Ual᷊ingu singkatau nabi seng namohe kiri'i,

⁶ ‘I Kau Betlehem, su tana Yehuda, tinga-tingari i kau wal᷊inge we kadiokange su tal᷊oara u apang soa kapiange su Yehuda. Watu'u bo i kau sarung sumongo singkatau pangaha ko sarung mangaha umati-Ku Israel.’ ”

⁷ Suapang nakarea l᷊ahe e'e, i Herodes nukumui mapapande ngu wituing bou simbuka ngu Raki e'e kere niputahawuni. Bou e'e i sie nukina si sire minsang kangereng wituing e'e nanita nikawua.

⁸ Mbuhue i sie namarenta si sire patamai sarang Betlehem l᷊au nutumanata, “Dakoe tamai, reake Ana e'e pakatiti. Boko i kumu makarea si sie, puhabari mai si sia, tadeau ia tamai l᷊ai manumba si Sie.”

^9-10 Bou e'e i sire natamai. Wituing ko nikawua ngi sire horo su pung u Raki sau nikawua ngi sire. Nanambate l᷊iaghi sire suapang sau nakawua wituing e'e. Wituing e'e nuhoro bo i sire, bou e'e nangiro nukita su wawo tampa u Ana e'e.

¹¹ I sire nusumu su l᷊al᷊ung u wal᷊e e'e dang nakawua Ana e'e dingang i Maria, i mama-E. I sire nusuba dang nanumba Ana e'e, bou e'e namuka pinikung i sire, nanarakang sasumba ngi sire si Sie, wul᷊aeng, kamania, l᷊au mur.

¹² Mawu Ruata nangonggo ingati si sire su ipi tadeau i sire kumbahang musul᷊e sarang koa i Herodes. Kuteu i sire napul᷊e nundea l᷊al᷊eng ko wal᷊inge.

Nutingkaghea sarang Mesir

¹³ Saritau mapapande ngu wituing seng natamai, malaikati u Mawu nutingkaandaghi badange si Yusuf su l᷊al᷊ung u ipi. Malaikati e'e nangul᷊i, “I Herodes pia naunge mundea mamate Ana e'e. Ual᷊ingu e'e, wangungte, wawa Ana e'e dingang i mama-Nge tal᷊ang sarang Mesir. Katanae pai se'e sarang Ia sau mangul᷊i si kau.”

¹⁴ I Yusuf nuwangung, dang su huwi e'e i sie numbawa Ana e'e dingang i mama-Nge nakoa sarang Mesir.

¹⁵ I sire natana pai se'e sarang i Herodes nate. Dingang u e'e nariadi apang ko niul᷊i u Mawu bou nabi-E, kiri'i, “Ia mukui Ana-Ku bou Mesir.”

Manga rario ko dio nipate

¹⁶ Saritau i Herodes natitong i sie ko niakal᷊eng i sire mapapande ngu wituing bou simbuka ngu Raki, i sie nuwawal᷊uang l᷊ai-l᷊ai. Bou e'e i sie nuparenta pamate apang ana ko ese su Betlehem dang su tampa ko masandighi bou e'e ko umurie dua taung sintanae. E'e nuhino musul᷊ung niul᷊i u mapapande ngu wituing hal᷊i u orasi u wituing e'e nikawua.

¹⁷ Ko kere'e nariadi apang ko l᷊inau niul᷊i i Nabi Yeremia,

¹⁸ “Su Rama nikaringihi pia tingihi u l᷊al᷊ungkang, kahioro dingang u sangi. I Rahel kapul᷊ungkang u manga anae, i sie mandi sal᷊iwuhang, watu'u i sire seng tarie.”

Nusul᷊e bou Mesir

¹⁹ Suapang i Herodes nate, su tempo ngi Yusuf mborong su Mesir singkatau Malaikati u Mawu nutingkaandaghi badange si Yusuf su ipi.

²⁰ Malaikati e'e nangul᷊i, “Manga taumata ko mamate Ana e'e kaul᷊ie seng nate. Ual᷊ingu e'e wangungte, al᷊ate Ana e'e dingang i mamange dang pusul᷊ete tamai sarang Israel.”

²¹ I Yusuf nuwangung, bou e'e numbawa Ana e'e dingang i mamange napul᷊e sarang Israel.

²² Kateho bou e'e i Yusuf nakaringihi i Arkhelaus, ana i Herodes seng nundol᷊osi si papange nakoa Ratu su Yudea. Ual᷊ingu e'e i Yusuf maghagha tamai. Bou e'e i sie nakarea tatul᷊ara ngu Mawu su ipi. Mbuhue i sie natamai sarang Galilea.

²³ Pai se'e i sie natana su soa arenge Nazaret. Dingang u e'e nariadite apang ko niul᷊i u manga nabi hal᷊i u Ana e'e: “I Sie sarung isigho Tau Nazaret.”