MARKUS 8 - BUKI SUSI Wahasa ngu Taghul᷊andang l᷊ou-l᷊ou

I Yesus nupakang taumata pauhiwu su kataunge

¹ Ta nal᷊iwue bou e'e, pia l᷊ai taumata singgapang nusumongo nukomol᷊i. Ual᷊ing i sire takoae kang, I Yesus nukui manga tumatuhu-E dang nangul᷊i,

² “Ia kumindaghi u taumata maul᷊i i'i. Seng tilu l᷊ou l᷊iwuenge i sire nutumuhu dingang-Ku dang su orasi i'i i sire seng takoae kang.

³ Boko Ia mundoi si sire pakapul᷊e dingang u tiang ko takoae tahoe, i sire sarung mapinsang su l᷊al᷊eng. Nangilebe su tal᷊oara i sire pia ko nusumongo bou marau.”

⁴ Manga tumatuhu I Yesus nusumimbahi, “Su tampa ko nahae i'i, su apa taumata botonge makarea kang ko makataung guna ngu taumata maul᷊i i'i?”

⁵ “Pira kaul᷊ie boroti ko pia si kumu?” kakina I Yesus. “Pitu,” sasimbahi sire.

⁶ Kuteu I Yesus nuparenta taumata maul᷊i e'e pakaiang su tana, bou e'e I Sie nangal᷊a boroti pitu e'e l᷊au nutarimakase su Mawu Ruata. Bou e'e I Sie nangangompeng boroti e'e dingang u l᷊ima-Nge bou e'e nunggile su manga tumatuhu-E pakipahia su manga taumata. Kuteu manga tumatuhu-E nutumuhu.

⁷ Si sire l᷊ai pia kina ko dio pira mbua. I Yesus nutarimakase su Mawu Ruata ual᷊ingu manga kina e'e, bou e'e nuparenta manga tumatuhu-E, pamahia manga kina e'e l᷊ai.

^8-9 I sire nukumang sarang nal᷊aeri – patehang manga pauhiwu su kataunge taumata ko nukumang. Bou e'e manga tumatuhu I Yesus nangomol᷊i l᷊umbei ngu kang – mborong pitu wawewekang napene. Bou e'e I Yesus nuparenta manga taumata e'e pakapul᷊e,

¹⁰ dang I Sie dingang u manga tumatuhu-E turusi naawi su sakaeng dang nakoa sarang tampa Dalmanuta.

Manga taumata ngu Farisi nundo si Yesus pukoa ko makal᷊aherang

¹¹ Pira ngkatau taumata ngu Farisi nusumongo sarang koa I Yesus, dang nanita nupapangal᷊a dingang-E guna ngu mupunsal᷊a ngi Sie. I sire nundo si Yesus pukoa ko makal᷊aherang kere tatia ngu himoneu I Sie nusumongo bou Mawu Ruata.

¹² I Yesus nadio naunge bou e'e nusumimbahi, “Nakurawe manga taumata orasi i'i mundo si Sia pukoa ko makal᷊aherang? Ta! Ia tawe mo munggile tatia ko kere'e si sire!”

¹³ Bou e'e I Yesus nanintang i sire, dang naawi su l᷊al᷊ung u sakaeng; wuhue nuwua sarang simbuka ngu rano e'e.

Ragi ngu manga tau Farisi l᷊au i Herodes

¹⁴ Manga tumatuhu I Yesus nal᷊iwuhi numbawa boroti nipakawaghe. Si sire kitang pia boroti simbau su sakaeng.

¹⁵ “Pakaingati su ragi ngu manga tau Farisi l᷊au ragi ngi Herodes,” angkung I Yesus si sire.

¹⁶ Kuteu manga tumatuhu I Yesus e'e nanita nahundidato hal᷊i e'e. I sire nangul᷊i, “I Sie nangul᷊i kere'e, watu'u si kite takoae boroti.”

¹⁷ I Yesus matitong apa ko ipurarendehi sire. Ual᷊ingu e'e I Sie nukina si sire, “Nakurawe i kumu nurarendehi hal᷊i u takoae boroti? Apa i kumu wugha dang l᷊ai mborong ta nakahingang? Kere'e katimomonge sipirang i kumu?

¹⁸ I kumu pia mata – hakiwe ta nakawua? I kumu pia tul᷊i hakiwe ta nakaringihi? Apa i kumu ta nakatinaung

¹⁹ boroti l᷊ima mbau Daku nikakompeng guna ngu l᷊imahiwu su kataunge? Pira wawewekang l᷊umbei ngu kang ko nikomol᷊i kumu?” “Mapul᷊odua,” angkung i sire.

²⁰ “Dang su tempo Ia nangangompeng boroti pitu guna ngu pauhiwu su kataunge,” I Yesus sau nukina l᷊ai, “pira wawewekang l᷊umbei ngu kang nikomol᷊i kumu?” “Pitu,” nisimbahi sire.

²¹ “Inau, mborong ta nakahingang i kumu l᷊ai?” angkung I Yesus.

I Yesus nupakaul᷊e ngu tau ko wuta su Betsaida

²² I sire nurating u Betsaida. Su se'e pia taumata numbawa singkatau ko wuta sarang koa I Yesus, l᷊au nundo si Sie tadeau pamilo l᷊ima-Nge su tau ko wuta e'e guna ngu mupakaul᷊e ngi sie.

²³ Kuteu I Yesus nuhinggo l᷊ima ngu tau ko wuta e'e l᷊au nanata si sie nusumuwang bou soa e'e. Bou e'e I Yesus nanguru mata ngu tau e'e. I Sie nanil᷊iri l᷊ima-Nge su mata ngu tau e'e, mbuhue nukina si sie, “Seng botonge i kau makawua manga apa su orasi i'i?”

²⁴ Tau e'e nutuhung sarang saruang bou e'e nangul᷊i, “Iya. Ia nakawua taumata kal᷊al᷊enge; kateho i sire tuhungang kere l᷊aesi u kau.”

²⁵ I Yesus sau namilo l᷊ima-Nge su mata ngu tau e'e. Paghisa i'i taumata e'e nutatitehi singapang botonge nutuhung. Matange naul᷊e, dang i sie nakawua kaul᷊ie mal᷊ahe-l᷊ahe.

²⁶ Mbuhue I Yesus nangul᷊i si sie, “Kapul᷊e'e, dang ariwe pusul᷊e sarang soa e'e.”

Pangakuang i Petrus hal᷊i I Yesus

²⁷ I Yesus l᷊au manga tumatuhu-E natamai sarang apang kampong masandighi u Kaisarea Filipi. Su l᷊al᷊eng I Yesus nukina si sire, “Tumuhu didato ngu taumata, i sai Ia i'i?”

²⁸ I sire nusumimbahi, “Pia ko nangul᷊i: i Yohanes Mananahani; pia l᷊ai ko nangul᷊i i Elia, dang pia l᷊ai ko wal᷊inge nangul᷊i singkatau bou nabi.”

²⁹ “Arawe tumuhu si kumu, Ia i'i i sai?” kakina I Yesus. I Petrus nusumimbahi, “I Tuang ko Ratu Mananal᷊amati!”

³⁰ Bou e'e I Yesus nangonggo u ingati si sire, tadeau kumbahang mupakatitong si sai-sai hal᷊i u watangeng-E.

I Yesus nuhabari singsara l᷊au papate-Nge

³¹ Bou e'e, I Yesus nanita nanintiro manga tumatuhu-E himoneu Ahusi Taumata mambeng mutatahang u singsara, l᷊au sarung rokateng u apang pangaha, manga tumbonang imam, l᷊au manga meteri agama. I Sie sarung pateng, kateho su l᷊ou katilunge I Sie sarung sau ipuwangung.

³² Kere'e kal᷊ahe'e I Yesus nangul᷊i hal᷊i e'e su manga tumatuhu-E. Kuteu i Petrus namol᷊eng si Yesus sarang sindihange, l᷊au nanughu si Sie.

³³ Arawe I Yesus nuwihu dang nutuhung manga tumatuhu-E, mbuhue nanughu si Petrus, “Dakoe pangal᷊ing bou i'i, sasal᷊uka! Sipirang u e'e ko sipirang u taumata; wal᷊inge sipirang u Mawu Ruata!”

³⁴ Bou e'e I Yesus nukui taumata maul᷊i ko ene su se'e dingang u manga tumatuhu-E. Bou e'e I Sie nangul᷊i si sire, “Taumata ko mo tumuhu si Sia, mambeng ari putinaung hal᷊i u watangenge, bou e'e mamikul᷊i salipie, dang turusi putuhu si Sia.

³⁵ Watu, u taumata ko mupakasal᷊amati puwawiahie, sarung kailangeng u puwawiahie. Arawe taumata ko mundume puwawiahie ual᷊ingu Ia, dang guna ngu Habari Mapia bou Mawu Ruata, e'e sarung makasal᷊amati si sie.

³⁶ Apa untunge su singkatau, boko i sie managhuang kal᷊abo u dunia i'i kateho i sie kailangeng u puwawiahie?

³⁷ Botonge puwawiahie e'e itukari dingang ko wal᷊inge?

³⁸ Boko singkatau mamea mangaku ngu Ia l᷊au tintiro-Ku su tempo ngu pul᷊al᷊awang l᷊au ko dal᷊ai i'i, Ahusi Taumata l᷊ai sarung mamea mangaku ngu taumata e'e, su tempo ngi Sie sarung ruminta dingang u kawasa ngi Yamang-E, nihundinganeng u manga malaikati ko susi.”