LUKAS 2 - BUKI SUSI Wahasa ngu Taghul᷊andang l᷊ou-l᷊ou

Pul᷊ahinding I Yesus

¹ Su tempo e'e i Kaisari Agustus nuparenta tadeau kaul᷊i u kawanua ngu kararatuang u Roma pakiwohe arenge guna ngu irekeng.

² Rekenang kahimotongange i'i nikoa su tempo ngi Kirenius nakoa Gubernur su wanua ngu Siria.

³ Kaul᷊i u taumata su tempo e'e l᷊awo napul᷊e tadeau pakiwohe arenge su soa ngu simbau – simbau.

⁴ I Yusuf l᷊ai nuwua bou Nazaret su Galilea, nakoa sarang Betlehem su Yudea, tampa i Ratu Daud nipahinding; watu'u i Yusuf hintou ngi Daud.

⁵ I Yusuf nakiwohe arenge dingang i Maria tunangange, ko seng pia kal᷊uwaenge.

⁶ Su tempo i sire su Betlehem nuratingte tempo ngi Maria mahinding.

⁷ I sie nahinding singkatau ana ko ese, ana ko iyakang. Ana e'e nipikung u wal᷊i, bou e'e nipilo su kal᷊omba ko kal᷊aumpahi u rahami; watu'u i sire ta nakarea tampa katikilang.

Gembala dingang u malaikati

⁸ Su huwi e'e pia manga gembala su tampa ko mahumpughi rindulue kapudiagae domba ngi sire, su tampa e'e.

⁹ Singkawua malaikati u Mawu nutingkaandaghi watangenge si sire, dang sinang ko masua bou Mawu nusuminang nupakasua si sire, dang i sire nataku kahingang.

¹⁰ Kateho malaikati e'e nangul᷊i, “Kumbahang mataku! Watu'u ia sumongo mumbawa habari ko mapia guna ngi kumu, habari ko makal᷊uasi patiku taumata.

¹¹ Silou i'i su soa ngi Daud seng nipahinding Ratu Mananal᷊amati si kumu I Kristus, Mawu.

¹² I'i tatiange: I kumu sarung makahombang singkatau ana ko dio mapapikung u wal᷊i, dang kal᷊al᷊oka su kal᷊omba.”

¹³ Singkawawua malaikati e'e nisongong u ghapang u malaikati ko wal᷊inge, kapundalonge Mawu Ruata. I sire nangul᷊i,

¹⁴ “Dalo su Mawu Ruata su l᷊angi ko karangetange! Dang su wawo u dunia, sal᷊amati su taumata ko nakal᷊uasi naung u Mawu!”

¹⁵ Suapang manga malaikati nanintang i sire dang nusul᷊e sarang sorga, manga gembala e'e nangul᷊i simbau dingang ko wal᷊inge, “Maite i kite makoa sarang Betlehem mutuhung hal᷊i ko seng nariadi e'e, ko nihabariu u Mawu si kite.”

¹⁶ I sire dingang natamai, bou e'e nusombang i Maria l᷊au i Yusuf dingang ana ko dio e'e ko kal᷊al᷊oka su kal᷊omba.

¹⁷ Su tempo ngu manga gembala nakawua ana ko dio e'e, i sire nuwuke ngu apang ko nihabari u manga malaikati hal᷊i u ana ko dio e'e.

¹⁸ Dang kaul᷊i u taumata naherang nakaringihi wuke ngu manga gembala e'e.

¹⁹ Arawe i Maria nundeso kaul᷊ie e'e su l᷊al᷊ung u naunge dang nisipirie.

²⁰ Manga gembala e'e nusul᷊e sarang tampa ko mahumpughi rindulue apiru nundalo l᷊au namantughi Mawu Ruata, ual᷊ingu kaul᷊ie ko nikaringihi l᷊au nikawuang i sire, mang nuhino kere ko nihabari u malaikati.

I Yesus nionggol᷊ang u areng

²¹ Suapang umurie natimu wal᷊u l᷊ou, ana e'e nisunati. Dang i sire nusigho si sie areng-E I Yesus, areng ko seng nionggo u malaikati si Sie suhoro I Sie su kal᷊uwaeng i mama-Nge.

I Yesus nisarakang su Mawu su Wal᷊e ngu Mawu

²² Seng nurating tempo ngi Yusuf sire rua ngi Maria mupal᷊al᷊eng u adati mupakasusi tumuhu atorang i Musa. Inau i sire rua numbawa Ana e'e sarang Yerusalem guna ngu isarakang su Mawu.

²³ Ual᷊ingu su l᷊al᷊ung u atorang u Mawu kawawohe kiri'i, “Apang ana ko ese ko iyakang mambeng isarakang su Mawu.”

²⁴ I sire rua l᷊ai pia pandung mumbawa sasumba burung tarkuku simpari arako paluma makuda darua, musul᷊ung ko nitantu su l᷊al᷊ung u tita ngu Mawu.

²⁵ Su tempo e'e su Yerusalem pia singkatau arenge i Simeon. I sie singkatau ko mapia, ko mataku Mawu Ruata dang tintal᷊a kapangampal᷊i temponge Mawu Ruata manal᷊amati Israel. Roh u Mawu Ruata mahundingang si sie,

²⁶ dang Roh u Mawu Ruata seng nangul᷊i si sie uare i sie tangkeng mate suhoro makawua Ratu Mananal᷊amati ko nidiandi ngu Mawu.

²⁷ Roh u Mawu Ruata nangaha si Simeon nusumu su Wal᷊e ngu Mawu. Su tempo e'e I Yusuf sire rua ngi Maria numbawa si Yesus, ko mborong ko dio e'e nusumu guna ngu mukoa hal᷊i ko niparenta ngu atorang u agama.

²⁸ Kuteu i Simeon nangal᷊a ana e'e dang nisaruru-E, bou e'e nundalo Mawu Ruata,

²⁹ “Orasi i'i, Mawu, i kau seng nupakariadi diandi-Ngu walate l᷊ang-U i'i manintang u dunia dingang purarame

³⁰ Watu'u dingang u mataku sisane ia seng nakawua Mananal᷊amati ko bo I Kau

³¹ Mananal᷊amati e'e seng nisadia-U guna ngu kaul᷊i u bangsa:

³² Musul᷊ung kere sua ko nakasua l᷊al᷊eng u manga bangsa ko wal᷊inge guna ngu sumongo si Kau; sua ko makawawa pangangadati su umati-U Israel.”

³³ I papa dang i mama ngu Ana e'e naherang nakaringihi apang ko nihabari Simeon hal᷊i u Ana i sire rua.

³⁴ I Simeon nangal᷊amati si sire dang nangul᷊i si Maria, i mama ngu Ana e'e, “Ana i'i seng nipile ngu Mawu Ruata guna ngu mupakawinasa dang manal᷊amati maul᷊i tau Israel. I sie sarung makoa tatia bou Mawu Ruata, ko sarung rokateng u taumata maul᷊i,

³⁵ dang dingang kere'e nikatitonang tataho u naung i sire. Kasasusa sarung manusu naungu musul᷊ung u pera ko mahoro.”

³⁶ Pia l᷊ai singkatau nabi kowawine ko seng maghurang kahingang. Arenge i Hana, ana i Fanuel, bou hintou ngi Asyer. Pitu taung bou nukawing,

³⁷ I Hana nawal᷊u, dang i'i umurie seng wal᷊umpul᷊opa su taunge. Ta paghisa i sie nanintang u Wal᷊e ngu Mawu. L᷊ou huwi i sie mutahamawu su Mawu Ruata se'e dingang mukal᷊iomaneng dang mupuasa.

³⁸ Nusuma su tempo e'e l᷊ai i sie nusumongo, bou e'e nundalo Mawu Ruata dang nudidato hal᷊i u Ana e'e su kaul᷊i u taumata ko kapangampal᷊i temponge Mawu Ruata mupakal᷊iwiri Yerusalem.

Nusul᷊e Sarang Nazaret

³⁹ Suapang i Yusuf sire rua ngi Maria seng mbuae nukoa kaul᷊i u apang ko nituntu su l᷊al᷊ung u atorang u Mawu, I sire rua napul᷊e sarang Nazaret su Galilea.

⁴⁰ Ana e'e kal᷊al᷊aboe dang katatoghasi. I Sie ko pande kahingang dang kere'e kal᷊aboe kakindaghi u Mawu Ruata si Sie.

I Yesus su Wal᷊e ngu Mawu

⁴¹ Sintinia taunge ghaghurang I Yesus makoa sarang Yerusalem guna ngu musal᷊iwang L᷊ou ngu Paska.

⁴² Dang su tempo I Yesus natimu mapul᷊odua su taunge, i sire nakoa sarang sal᷊iwang e'e kere narang i sire.

⁴³ Nasue sal᷊iwang e'e i sire napul᷊e, arawe I Yesus, Ana e'e, mborong natintang su Yerusalem, dang i papa mama-Nge wugha.

⁴⁴ Su naung i sire i sie nutumuhu dingang u taumata maul᷊i. Hindo seng silou kal᷊al᷊enge mbuhue i sire rua nundea si Sie su tal᷊oara u manga ana u simbau dang apang taumata ko matitong i sire.

⁴⁵ Kateho i sire rua ta nakarea si Sie, inau i sire rua sau nusul᷊e sarang Yerusalem nundea si Sie.

⁴⁶ Saritau tilu l᷊ou kapundeae, i sire rua nakahombang si Sie su l᷊al᷊ung u Wal᷊e ngu Mawu. I Sie kakangiang kapundaringihi manga meteri agama dang kapukinae.

⁴⁷ Kaul᷊i u taumata ko nakaringihi si Sie naherang ual᷊ingu manga sasimbahi-E kere'e kahinonge.

⁴⁸ Ghaghurange l᷊ai naherang nakawua si Sie. I mamange nangul᷊i si Sie, “Yamang, nakurawe i Kau nukoa i'i si kami? I kami rua ngi papa-Ngu su ghaghawangeng kapundeae si Kau!”

⁴⁹ I Yesus nusumimbahi, “Nakurawe i papa l᷊au i mama mundea si Sia? Apa i papa l᷊au i mama wugha ko Ia mambeng ene su l᷊al᷊ung u wal᷊e Yamang-Ku?”

⁵⁰ Kateho i sire rua ta nakahingang sasimbahi Yesus.

⁵¹ Bou e'e I Yesus napul᷊e dingang i sire rua sarang Nazaret, dang nundaringihi si sire rua. Kaul᷊i u hal᷊i e'e nireso i mama-Nge su l᷊al᷊ung u naunge.

⁵² I Yesus kal᷊al᷊aboe dang kapapandenge, l᷊au nikindaghi u Mawu Ruata dang nikao u taumata.