ESTER 9 - BUKI SUSI Wahasa ngu Taghul᷊andang l᷊ou-l᷊ou

Tau Yahudi nukumanoa mundoka manga roka i sire

¹ Panginsuenge nuratingte tanggali kapul᷊otilunge wul᷊ang Adar, e'e l᷊ou ko nitantu guna ngu pupal᷊al᷊eng parenta ngu ratu su manga tau Yahudi. L᷊ou e'e seng kahiampal᷊eng u manga roka u bangsa Yahudi guna ngu mangawasa bangsa e'e. Kateho nal᷊ahe ko tau Yahudi namata si sire.

² Su apang soa manga tau Yahudi nukomol᷊i dang nusingkanaung guna ngu mangalo kaul᷊i u taumata ko pia kirou ko dal᷊ai si sire. Manga bangsa su apang tampa nataku si sire hakiu takoae sarang singkatau ko wahani mutumatingo si sire

³ Katewe kaul᷊i u mapapangkati u propinsi, manga gubernur, bupati l᷊au mapapangkati u kararatuang nusumbala tau Yahudi ual᷊ingu kaul᷊ie mataku si Mordekhai.

⁴ Su kaul᷊i u kararatuang taumata matitong himoneu i Mordekhai ko l᷊abo pangarunge su istana, dang kasaunge kal᷊al᷊aboe kawasange.

⁵ Ko kere'e bangsa Yahudi botonge mukoa tuhu kao i sire su roka i sire, i sire nangalo dingang u pera bou e'e namate si sire.

⁶ Su Susan, pusati u Negara, tau Yahudi namate l᷊imahasu su kataunge.

^7-10 Su tal᷊oara i sire pia i sire mapul᷊o ana kol᷊aese i Haman ana i Hamedata, roka ko l᷊abo u tau Yahudi. I sire e'e ko: i Patsandata, i Dalfon, i Aspata, i Porata, i Adalya, i Aridata, i Parmasta, i Arisai, i Aridai l᷊au i Waizata. Kateho tau Yahudi ta nuhampasi.

¹¹ Su l᷊ou e'e l᷊ai taumata nuhabari su ratu rekenang u taumata ko nikapate su Susan.

¹² Angkung i ko i L᷊uadateng su wawu Boki Ester, “Kitang su Susan tau Yahudi seng nakapate l᷊imahasu su kataunge, nasu i sire mapul᷊o ana i Haman. Nangilebe su manga propinsi! Wughangete minsang apa ko nikoa i sire pai se'e! Ho, apal᷊ai ko ipundokangu orasi i'i? Mangkate habari, i kau nal᷊ahe sarung makahombang e'e!”

¹³ I Ester nusumimbahi, “Bo i ko i L᷊uadateng mal᷊uasi, kenang ko tau Yahudi ko natana su Susan i'i dol᷊ou mal᷊ukari ipakawala sau mukoa apang ko nikoa i sire silou i'i. Dang l᷊ai kenang ko badang u manga ana i Haman e'e pakighantong su manga rihi ngu punggaghantongang.”

¹⁴ Bou e'e ratu nangonggo u parenta tadeau pukoa ndo i Ester e'e; surati parenta guna ngu soa ngu Susan nipasuwang dang badang i sire mapul᷊o ana i Haman e'e nighantong.

¹⁵ Inau su tanggali mapul᷊opa wul᷊ang Adar, manga tau Yahudi su Susan sau nukomol᷊i dang nakapate tiluhasu su kataunge sau su soa e'e. Dang paghisa i'i l᷊ai i sire ta nuhampasi.

¹⁶ Manga taumata ngu Yahudi ko natana su manga propinsi l᷊ai seng nukomol᷊i dang nundiaga watangeng i sire. I sire nakawata roka i sire dang nakapate pitumpul᷊ol᷊ima su kataunge ko mubinsi ngi sire. Kateho i sire ta nuhampasi.

¹⁷ Hal᷊i e'e nariadi su tanggali mapul᷊otilu wul᷊ang Adar. L᷊ou tuhue su tanggali mapul᷊opa, i sire ta namate si sai-sai, kateho namantughi l᷊ou e'e dingang u l᷊al᷊iaghi.

¹⁸ Kateho tau Yahudi ko ene su Susan namantughi tanggali mapul᷊ol᷊ima kere l᷊ou ko l᷊abo, watu i sire ko namate roka su tanggali mapul᷊otilu dang mapul᷊opa, bou e'e nangiro su tanggali mapul᷊ol᷊ima.

¹⁹ E'e sabapie tau Yahudi ko natana su manga soa ko dio namantughi tanggali mapul᷊opa wul᷊ang Adar kere l᷊ou ko mal᷊uasi, l᷊ou guna ngu musal᷊iwang apiru mupaparaseng l᷊aonggo kere kang.

Sal᷊iwang u Purim

²⁰ Bou e'e i Mordekhai namohe apang ko seng nariadi e'e dang nundoho surati su apang tau Yahudi su kaul᷊i u kararatuang Persia, maneng ko marau, kere'e l᷊ai ko masandighi.

²¹ Tataho u surati e'e ko parenta guna ngu mupakawantughi tanggali mapul᷊opa l᷊au mapul᷊ol᷊ima wul᷊ang Adar sintinia taung.

²² Watu'u su manga l᷊ou e'e i sire seng nakawata manga roka i sire, hakiu kasasusa l᷊au turu u naung i sire nuwal᷊u nakoa kal᷊al᷊iaghi l᷊au kal᷊al᷊uasi. Watu'u e'e i sire mambeng mamantughi manga l᷊ou e'e dingang u sal᷊iwang l᷊au kumang dang mul᷊aonggo kang dang mamahia wiahi su tau ko susa.

²³ Tau Yahudi nutumuhu parenta ngi Mordekhai e'e dang kere'e sal᷊iwang e'e nakoa tundu ngu adati sintinia taung.

Suenge

²⁴ I Haman ana i Hamedata, hintou ngi Agag, roka ko l᷊abo u tau Yahudi, seng nanawu undi ko nisigho l᷊ai “Purim” guna ngu manantu l᷊ou ngu papamate su tau Yahudi; i sie pia kirounge mupakailang i sire.

²⁵ Kateho i Ester nutumatingo su ratu, dang ratu nangonggo parenta ko niwohe ko nakakoa kirou ko dal᷊ai nikoa i Haman nahino su watangenge sisane, hakiu i sie l᷊au manga anae nighantong su rihi ngu punggaghantongang.

²⁶ Watu'u e'e l᷊ou-l᷊ou ko l᷊abo e'e nisigho Purim. Surati Mordekhai l᷊au apang ko seng nikapundangeng u tau Yahudi,

²⁷ Nakakoa i sire nukoa atorang guna ngu watangeng i sire sisane, guna ngu hintou ngi sire dang guna ngu kaul᷊i u taumata ko sarung makoa kawanua ngu bangsa Yahudi. Tumuhu atorang e'e sintinia taung i sire mambeng mamantughi l᷊ou darua e'e ko seng nitantu i Mordekhai.

²⁸ Nitantu l᷊ai himoneu sarang kal᷊iwuenge l᷊ou-l᷊ou ngu Purim e'e mambeng itinaungang dang ipakawantughi u apang walagheng u Yahudi bou apang hintou su apang propinsi l᷊au su apang soa.

²⁹ Su sindihangu e'e, singkahindo dingang u surati Mordekhai, wawu Boki Ester ana i Abihail namohe surati karuange, ko nanoghasi surati Mordekhai hal᷊i u Purim e'e.

³⁰ Surati e'e niroho su kaul᷊i u tau Yahudi, dang manga salenange niroho sarang mahasuduampul᷊opitu propinsi kararatuang u Persia. Surati e'e nitakirang u kakal᷊iomaneng tadeau bangsa Yahudi sintinia mangkate ko mapia dang matatapi.

³¹ Surati e'e l᷊ai muhawu tadeau i sire l᷊au hintou ngi sire mamantughi l᷊ou-l᷊ou ngu Purim pas su tempo nge, kere i sire mamantughi tempo ngu puasa l᷊au tempo ngu mul᷊al᷊utu. Ko e'e tahoe surati Mordekhai l᷊au i wawu Boki Ester.

³² Parenta ngi Ester ko nanantu manga atorang u Purim, niwohe su l᷊al᷊ung u buki.