ESTER 8 - BUKI SUSI Wahasa ngu Taghul᷊andang l᷊ou-l᷊ou

Bangsa Yahudi niparentang pundoka roka i sire

¹ Su l᷊ou e'e i Ratu Ahasyweros nangonggo si wawu Boki Ester apang rarotong i Haman, roka ko l᷊abo u tau Yahudi e'e. I Ester nuhabari su ratu himoneu i Mordekhai ko ana tamahuaringe, kuteu nanita bou tempo e'e i Mordekhai nionggol᷊ang u haki tadeau putumatingo ratu maneng ta nikuiang.

² Ratu nul᷊ua sinsinge ko seng nial᷊ae sau bo i Haman dang nionggoe si Mordekhai. Dang i Ester nuhengke si Mordekhai nakoa mangangawasa rarotong i Haman.

³ Bou e'e i Ester sau nutumatingo ratu l᷊ai. I sie nusuba apiru kasangie dang nukahioro tadeau ratu mupakailang kirou ko dal᷊ai i Haman su tau Yahudi.

⁴ Ratu nangul᷊uhi tiking wul᷊aenge si Ester, bou e'e i Ester nuwangung dang nangul᷊i,

⁵ “Boko i ko i L᷊uadateng mal᷊uasi dang mukumindaghi su l᷊ang, kerewotonge i ko i L᷊uadateng pupasuwang surati parenta guna ngu manawu manga surati Haman ko tahoe parenta guna ngu pupakawinasa ngu kaul᷊i u tau Yahudi su kararatuang i'i.

⁶ Kirapawe pundangeng l᷊ang makawua bangsa l᷊au manga ana u simbau u l᷊ang masue ipate?”

⁷ Kuteu angkung i Ratu Ahasyweros si wawu Boki Ester l᷊au si Mordekhai, “Tingari, ia seng nunggantong si Haman ual᷊ing i sie mo mupakawinasa ngu tau Yahudi, dang rarotonge seng daku nionggo si Ester.

⁸ Kateho surati ko seng niwohe su areng u ratu dang nionggol᷊ang u capi u ratu, seng ta ikasawu sau. Kateho i kumu daku ipakawala pamohe surati hal᷊i u bangsa Yahudi, apa ko su pundang i kumu mapia. Pamohete surati e'e su arengku dang tahone ngu capi u kararatuang.”

⁹ Su l᷊ou e'e l᷊ai, e'e ko tanggali duampul᷊otilu wul᷊ang katilunge, wul᷊ang Siwan, i Mordekhai nukui manga mamamohe u ratu dang namarenta si sire pamohe surati su manga gubernur, manga bupati dang su manga mapapangkati su mahasuduampul᷊opitu propinsi, bou India murating sarang Sudan. Manga surati e'e niwohe su l᷊al᷊ung u wahasa l᷊au wohe u manga propinsi e'e simbau-simbau. I sie l᷊ai nundoho surati e'e su tau Yahudi su l᷊al᷊ung u wahasa l᷊au wohe u Yahudi.

¹⁰ Manga surati e'e nitekenang i Mordekhai su areng u Ratu Ahasyweros dingang capi u kararatuang. Bou e'e i Mordekhai nangoro manga raroi pangunturi manga surati e'e sarang apang propinsi ngu kararatuang pasake manga kawal᷊o ko masahawu koa u ratu.

¹¹ Manga surati e'e nul᷊ahe himoneu ratu nupakawala ngu tau Yahudi su apang soa pusingkanaung dang pudiaga u watangeng. Boko i sire irokateng u manga taumata ko pia aghiri bou bangsa arako propinsi manga apa, i sire botonge pundoka dang pamate apang mangangalo e'e dingang u kawing l᷊au ana i sire; i sire botonge l᷊ai pamate manga roka sarang pakasue dang puhampasi manga rarotong i sire.

¹² Parenta e'e mambeng ikoa su kaul᷊i u kararatuang u Persia su l᷊ou ko seng nitantu i Haman tadeau pamate manga tau Yahudi, su tanggali kapul᷊otilunge wul᷊ang kapul᷊oduange, wul᷊ang Adar.

¹³ Surati parenta e'e mambeng ipasuwang kere atorang dang iwohang su kaul᷊i u taumata su kaul᷊i u propinsi tadeau bangsa Yahudi seng sadia mundoka manga roka i sire boko l᷊ou e'e seng murating.

¹⁴ Kuteu manga raroi e'e seng nuwua nusumake kawal᷊o ngu ratu. L᷊ai su Susan pusati u negara, parenta e'e nibasa.

¹⁵ Bou e'e i Mordekhai nanintang u istana nul᷊oho pakeang u kararatuang kulurie ko biru l᷊au ko mawira, juba ko bung bou leneng ko maal᷊usi dang makota wul᷊aeng ko masidada kahingang. Soa ngu Susan kapuhul᷊iaghi ual᷊ingu mal᷊uasi.

¹⁶ Apang tau Yahudi nakapundang nal᷊oahi naung dang masanang, mal᷊uasi dang kal᷊iaghi.

¹⁷ Kere'e l᷊ai su apang soa l᷊au propinsi, suapang tampa surati e'e nibasa, apang tau Yahudi kapuhul᷊uasi, masanang-sanang l᷊au kapusal᷊iwange. Katewe maul᷊i bou i sire ko matana su soa e'e nakoa kawanua ngu Yahudi, ual᷊ing i sire mataku su bangsa e'e.