ESTER 7 - BUKI SUSI Wahasa ngu Taghul᷊andang l᷊ou-l᷊ou

¹ Kuteu su karuange ratu l᷊au i Haman nukumang nanginung singkahindo dingang i Ester.

² Apiru kainunge anggori, ratu nakina sau si Ester, “Ho, kawingku, apa ko ikao u? Ul᷊ie! Nal᷊ahe sarung daku ionggo maneng ko ipundokangu e'e stenga bou kararatuangku.”

³ Sasimbahi wawu Boki Ester, “Boko i ko i L᷊uadateng mal᷊uasi, l᷊ang mukahioro tadeau l᷊ang dingang u bangsa ngu l᷊ang botonge muwiahi.

⁴ Watu'u l᷊ang dingang u bangsa ngu l᷊ang seng niwal᷊u guna ngu ipate. Kiko i kami kitang iwal᷊u guna ngu ikoa budaki, l᷊ang sarung marumasi dang ta manahaghe si ko i L᷊uadateng. Kateho orasi i'i i kami sarung ipakawinasa dang ipakasue!”

⁵ Bou e'e Ratu Ahasyweros nakina si wawu Boki Ester, “I sai ko wahani mukoa kere'e? Su apa tau e'e?”

⁶ I Ester nusumimbahi, “I Haman ko dal᷊ai i'i ko roka l᷊au ko mukabasara si kami!” Dingang katataku i Haman nutuhung si ratu l᷊au si wawu boki.

⁷ Ratu nuwawal᷊uang kahingang, bou e'e nuwua nanintang u meda dang turusi nusumuwang, nakoa sarang taman u istana. I Haman matitong himoneu ratu seng namutusi guna ngu muhukung si sie, watu'u e'e i sie tatapi matatana dingang i wawu Boki Ester guna ngu mukahioro tadeau ipakasal᷊amati.

⁸ Seng nikahupusang u sipirang i Haman nutingkanawo u watangenge su wawo u l᷊al᷊okang i Ester guna ngu mundo ampung, kateho nusarita u e'e l᷊ai ratu nusul᷊e bou taman u istana. Nakawua si Haman kere'e, ratu nukumiha, “Kate ko apa i'i? Mborong l᷊ai i sie wahani mul᷊amuhu wawu boki su si'i, su tingoku dang su wal᷊eku sisane?” Maehong suapang manga didato e'e niul᷊i u ratu, manga mapapangkati nusumongo dang nanimbukung timbo i Haman.

⁹ Bou e'e niul᷊i i Harbona, singkatau bou manga mapapangkati e'e, “ko i L᷊uadateng, su sindihang u wal᷊e ngi Haman pia rihi punggantongang range'e duampul᷊odua su meteri. I Haman seng nupararisi u e'e guna ngu punggantongang si Mordekhai, taumata ko seng nangambang sinango ngi ko i L᷊uadateng.” Bou e'e parenta ngu ratu, “Ghantongte i Haman su rihi e'e!”

¹⁰ Kere'e i Haman nighantong su rihi ko seng nipararisie guna ngi Mordekhai. Mbuhue bou e'e nailang wawal᷊uang u ratu.