ESTER 4 - BUKI SUSI Wahasa ngu Taghul᷊andang l᷊ou-l᷊ou

I Mordekhai nundo bantuang si Ester

¹ Su tempo ngi Mordekhai nakaringihi apang ko seng nariadi, i sie nunggehe l᷊akue, dang nuwawal᷊i u karong kere tatia ngu kasasusa. I sie nanawuhi awu su timboe, bou e'e nul᷊umal᷊eng su soa apiru kasangie dingang u tingihi ko mauha dang makakindaghi.

² Su tingo ngu tukari u istana i sie nangiro, watu'u taumata ko nuwawal᷊i u karong ta botonge sumu.

³ L᷊ai su apang propinsi, manga tau Yahudi kapul᷊ungkange suapang parenta ngu ratu e'e niwohang. I sire nupuasa, nusumangi l᷊au kapuhul᷊ungkange, dang maul᷊i bou tal᷊oara i sire nuwawal᷊i karong dang nul᷊umal᷊oka su awu.

⁴ Su tempo ngu manga mal᷊ahua l᷊au manga mapapangkati ko nihae ko kaputangkiange si Ratu Ester nulapori si sie apang ko seng nikoa i Mordekhai, i Ester nasusa kahingang. I sie nundoho l᷊aku si Mordekhai kere ghaghanti ngu wal᷊i karonge, kateho i Mordekhai mandi manarima u e'e.

⁵ Mbuhue i Ester nukui si Hatah, singkatau bou manga mapapangkati ko nihae ko nipuhal᷊i u ratu guna ngu mutal᷊ung si Ratu Ester. Niroie i Hatah pakina si Mordekhai minsang apa ko seng nariadi dang nakurawe i sie nukoa ko kere'e.

⁶ Kuteu i Hatah natamai sarang koa i Mordekhai su peleng u soa su tingo ngu tukari u istana.

⁷ I Mordekhai nuwuke si sie apang ko seng nariadi l᷊au pira doi sal᷊aka ko seng nipudiandi ngi Haman guna ngu ipasu su l᷊al᷊ung u kasi u ratu, suapang kaul᷊i u tau Yahudi nipakawinasa.

⁸ I Mordekhai l᷊ai nangonggo si Hatah salenang u surati u ratu ko seng nipasuwang su Susan dang tatahoe pia parenta guna ngu mupakawinasa ngu tau Yahudi. I sie nangoro si Hatah tadeau pangonggo surati e'e si Ester dang pul᷊ahe u parkara e'e si sie, l᷊ai pundo si Ester tadeau putumatingo su ratu guna ngu mukahioro u kakindaghi su bangsange.

⁹ Bou e'e i Hatah nakoa sarang koa i Ester dang nuhabari tatanata ngi Mordekhai si sie.

¹⁰ Kateho i Ester sau nangoro si sie pusul᷊e sarang koa i Mordekhai dingang u tatanata i'i,

¹¹ “Apang taumata, maneng ko ese arako l᷊ai kowawine, ko ta nikuiang, mutumatingo ratu su lilahi su l᷊al᷊ung u istana, mambeng ihukung pateng. E'e ko atorang dang kaul᷊i u taumata manita bou mananughu ratu sarang kawanua su manga propinsi, matitong u hal᷊i e'e. Kitang pia l᷊al᷊eng simbau tadeau mal᷊iwiri bou atorang e'e, e'e ko boko ratu mangul᷊uhi tiking wul᷊aenge su taumata e'e. Boko e'e mariadi, i sie sarung masal᷊amati. Kateho seng simbul᷊ang i'i ia mborong tangkeng nikuiang u ratu.”

¹² Bou e'e i Hatah nuhabari tatanata ngi Ester e'e si Mordekhai.

¹³ Kuteu i Mordekhai nundoho ngu l᷊aingati i'i si Ester, “Kumbahang musipiri i kau sarung lebe masirung bou tau Yahudi ko wal᷊inge, kitang ual᷊ing i kau natana su istana!

¹⁴ Tau Yahudi nal᷊ahe sarung makarea tul᷊umang maneng dingang u l᷊al᷊eng kirapa l᷊ai hakiu i sire masal᷊amati. Kateho boko i kau tatapi marumasi su l᷊al᷊ung u kakakoa ko kiri'i, i kau sisane sarung mate, dang walagheng i papa ngu sarung masue wukenge. I sai matitong, pari su manga tempo ko kiri'i i kau seng nipile nakoa ratu!”

¹⁵ Kuteu i Ester nundoho ngu habari i'i si Mordekhai,

¹⁶ “Komol᷊iko kaul᷊i u tau Yahudi ko ene su Susan tadeau pukal᷊iomaneng guna ngu ia. Kumbahang kumang l᷊au manginung tilu l᷊ou l᷊au tilu huwi l᷊iwuenge. Ia sisaneku l᷊au manga mal᷊ahua paparentangku sarung mupuasa l᷊ai. Bou e'e ia sarung mutumatingo ratu, maneng e'e mul᷊umawang atorang. Boko ia mambeng mate ual᷊ingu e'e, walate ia mate!”

¹⁷ Bou e'e i Mordekhai natamai dang nukoa apang ko nitanata ngi Ester si sie.