EFESUS 3 - BUKI SUSI Wahasa ngu Taghul᷊andang l᷊ou-l᷊ou

Pul᷊ahal᷊i i Paulus guna ngu taumata ko wal᷊inge tau Yahudi

¹ E'e sabapie ia, i Paulus, nitaho su tutupang watu I Kristus Yesus guna ngi kumu ko wal᷊inge tau Yahudi.

² Tantu i kumu seng nakaringihi himoneu Mawu Ruata, watu'u kapapia ngu naung-E, seng nangonggo si sia hal᷊i i'i guna ngi kumu.

³ Mawu Ruata seng nangul᷊i u rahasia kirounge dang nupakatitong si sia. (Hal᷊i i'i seng mbuae daku niwohe su rasie dingang ko pol᷊o,

⁴ dang boko i kumu mubasa e'e, i kumu sarung makahingang rahasia I Kristus musul᷊ung kere ia seng nakahingang rahasia e'e.)

⁵ Horo rahasia e'e ta paghisa nipakatitong su taumata, arawe tempo i'i Roh Mawu Ruata seng nupakal᷊ahe su manga rasuli dang manga nabi-E.

⁶ Rahasia e'e ko i'i: Bou Habari Mapia e'e, taumata wal᷊inge Yahudi nutumuhu nakapundang manga al᷊amatiu Mawu Ruata ko horo nisadia kitang guna ngu taumata ngu Yahudi, manga taumata wal᷊inge Yahudi seng nakoa bahageang bou badang ko musul᷊ung, dang l᷊ai manarima apa ko nipudiandi ngu Mawu Ruata su l᷊al᷊ung I Kristus Yesus.

⁷ Mawu Ruata nunggile si sia l᷊aonggo – simbau hal᷊i – guna ngu pangeke ngu Habari Mapia e'e. Ia manarima l᷊aonggo e'e su kawasang-U Mawu Ruata ko nuhal᷊i su l᷊al᷊ung u watangengku.

⁸ Su tal᷊oara u kaul᷊i u umati Mawu Ruata, ia i'i ko lebe kal᷊al᷊aikange. Kateho Mawu Ruata nunggile si sia l᷊aonggo i'i: hal᷊i guna ngu mul᷊ahe suapang taumata wal᷊inge Yahudi Habari Mapia hal᷊i kakakala I Kristus ko takoae suenge;

⁹ dang l᷊ai tadeau bou ia kaul᷊i u taumata matitong kirapa Mawu Ruata, mudiandi kal᷊abo u dunia i'i nukoa kirou-E ko mborong ta nikatitonang su dunia.

¹⁰ Pandung u Mawu Ruata tadeau su orasi, bou jamaati kaul᷊ie ko muhinggo kawasa su kinoang matitong kapapilesa ngu Mawu Ruata su l᷊al᷊ung u patiku haghi ngu ghahie.

¹¹ Mawu Ruata nukoa e'e sindal᷊eng dingang u kirou-E ko kakal ko nikoa-E su l᷊al᷊ung I Kristus Yesus Mawu ngi kite.

¹² Su l᷊al᷊ung u pangangimang si Kristus dang ual᷊ing u nasimbau dingang I Sie, i kite nionggol᷊ang kal᷊al᷊iwiri guna ngu sumandighi Mawu Ruata dingang napene pangangimang.

¹³ Watu'u e'e pundokangku ko i'i; kumbahang we ghumagha ngu l᷊inau apa ko daku ikasusa watu'u i kumu, watu'u kaul᷊i u e'e kitang guna ngu kapapia ngi kumu.

Kakindaghi I Kristus

¹⁴ Watu'u e'e ia nusuba su sarung I Yamang.

¹⁵ Bo I Sie patiku balagheng su sorga dang su dunia nanarima kakanoae ko nahae.

¹⁶ Ia mukal᷊iomaneng mal᷊umbako Mawu Ruata ko mawantughi mul᷊oahi guna ngu mupakatoghasi l᷊al᷊ung u naung i kumu dingang u Roh-E.

¹⁷ Mal᷊umbako i kumu mangimang si Kristus, I Kristus matana su l᷊al᷊ung u naung i kumu, dang putatumbiahi kumu nialasi dang nikawasa ngu pukakindaghi.

¹⁸ Ia mukal᷊iomaneng mal᷊umbako singkahindo dingang kaul᷊i u umati Mawu Ruata, i kumu botonge makawua kirapa l᷊oahi dang kanandue l᷊au karange'e dang kal᷊al᷊unge kakindaghi I Kristus,

¹⁹ ko dingang sipirang u taumata ta nikatitonang sarang apa kal᷊al᷊unge. Mal᷊umbako i kumu makakil᷊al᷊a kakindaghi I Kristus e'e, hakiu i kumu peneng dingang u watangeng u Mawu Ruata ko naimuti.

²⁰ Dingang u kawasang-U Mawu Ruata ko kahal᷊ie su watangeng i kite, Mawu Ruata botonge mukoa marau lebe maul᷊i bou patiku apa ko botonge ipundokang arako sipirang kite.

²¹ Pamantughi ko Mawu Ruata mukakal᷊intuhu su l᷊al᷊ung u jamaati, bo I Kristus Yesus. Pudalote Mawu Ruata sarang kal᷊iwuenge. Aming!