EFESUS 2 - BUKI SUSI Wahasa ngu Taghul᷊andang l᷊ou-l᷊ou

Bou Papate sarang puwawiahi

¹ Horo i kumu nate su rohani watu'u i kumu bardosa dang l᷊umawang manga parenta-Ngu Mawu Ruata.

² Su tempo e'e i kumu mutumuhu apang kao u dunia i'i; mangal᷊enge i kumu nutumuhu su mangangawasa ngu kinoang, e'e roh ko su orasi i'i mukawasa naung u taumata ko ta tutuhu su Mawu Ruata.

³ Horo i kite kaul᷊ie musul᷊ung l᷊ai dingang i sire; i kite muwiahi tumuhu tabieti i kite dang mukoa apang ko makal᷊uasi badang dang sipirang i kite. Su tempo e'e i kite l᷊ai taumata ko seng nanarima u wawal᷊uang u Mawu Ruata l᷊ai, musul᷊ung u kere manga taumata ko wal᷊inge.

⁴ Arawe kere'e kal᷊aboe kapiange naung u Mawu Ruata! I Sie kere'e mukumindaghi kite,

⁵ hakiu su tempo ngi kite mborong nate i tuhu rohani watu'u apang l᷊al᷊awang i kite, I Sie nupuwiahi kite sau singkahindo dingang I Kristus. Inau, kitang watu'u kapiang naung Mawu Ruata, i kumu nisal᷊amati-E.

⁶ Watu'u i kite nasimbau dingang I Kristus Yesus, Mawu Ruata nupuwiahi si kite sau singkahindo dingang I Sie, tadeau i kite mamarenta l᷊ai singkahindo dingang-E su l᷊al᷊ung u sorga.

⁷ Mawu Ruata nukoa e'e tadeau su tempo ko kasongonge, taumata botonge makawua kirapa kal᷊abo u kakindaghi u Mawu Ruata watu'u kapiange. Kakindaghi e'e nil᷊ahe u Mawu Ruata bou kapapia ngu naung-E si kite su l᷊al᷊ung I Kristus Yesus.

^8-9 Mawu Ruata kumindaghi i kumu, e'e sabapie I Sie nupakasal᷊amati si kumu watu'u i kumu mangimang si Yesus. Kasasal᷊amati kumu e'e wal᷊ingewe l᷊uang u sagheri kumu sisane. E'e kitang l᷊aonggo u Mawu Ruata. Inau takoae pia singkatau ko pia botonge makapangoboti watangenge su hal᷊i e'e.

¹⁰ I kite i'i kitang niriadi-U Mawu Ruata dang bou I Kristus Yesus, Mawu Ruata nukoa si kite tadeau i kite mukoa manga hal᷊i ko mapia ko seng nisadia-E guna ngi kite.

Nasimbau watu'u I Kristus

¹¹ Manga ana u simbau ko wal᷊inge taumata ngu Yahudi! Tinaungete kakakoa i kumu su tempo tamai nal᷊iu: I kumu isigho “taumata ta nisunati”, bou taumata ngu Yahudi ko nangaku watangenge nisunati (pandunge ko mbuae nakarea tatia ko nikoa u taumata su badang i sire).

¹² Su tempo e'e i kumu ta nasimbau dingang I Kristus i kumu ko taumata ngu raghi ko ta nasu umati ko nipile ngu Mawu Ruata. I kumu ta nasu su l᷊al᷊ung u pudadiandi ko nikoa u Mawu Ruata dingang u umati-E. I kumu nuwiahi su l᷊al᷊ung u dunia i'i takoae pul᷊aharapi dang takoae Mawu Ruata.

¹³ Arawe tempo i'i, watu'u i kumu seng nasimbau dingang I Kristus Yesus, i kumu ko horo marau, seng nipakasandighi ual᷊ingu papateng I Kristus.

¹⁴ Watu'u I Kristus sisane ko purarame ngi kite. I Sie nupakasimbau taumata ngu Yahudi dang taumata ngu ko wal᷊inge Yahudi nakoa simbau bangsa. Pagari dadiaga ko nakasara si sire, kitang pusasudu nipakailang I Kristus dingang nanarakang u watangeng-E sisane.

¹⁵ Atorang u agama Yahudi dingang u manga parenta dang manga atorange seng nimu I Kristus tadeau bangsa darua e'e mariadi simbau bangsa taumata ko wuhu, ko nasimbau dingang I Sie. Dingang l᷊al᷊eng kere'e I Kristus nukoa purarame.

¹⁶ Bou papate-Nge su salipi, I Kristus nupakasimbau darua bangsa e'e dang nupurame ngi sire dingang u Mawu Ruata, hakiu nailangte pusasudu e'e.

¹⁷ Watu'u e'e I Kristus nusumongo tadeau mumbawa Habari ko Mapia bou pudarame e'e si kumu; maneng si sire taumata wal᷊inge Yahudi ko horo marau bou Mawu Ruata, kere'e l᷊ai su taumata ngu Yahudi ko masandighi su Mawu Ruata.

¹⁸ Dingang I Kristus, i kite kaul᷊ie – maning taumata ngu Yahudi, kere'e l᷊ai taumata ngu wal᷊inge Yahudi – watu'u Roh u Mawu Ruata ko simbau, botonge sumandighi sarang koa I Yamang.

¹⁹ Watu'u e'e, i kumu wal᷊inge l᷊ai nasu taumata ngu raghi arako taumata ngu l᷊ikuri. I kumu orasi i'i musul᷊ung u kere umati Mawu Ruata. I kumu seng tataho u Wal᷊e ngu Mawu Ruata.

²⁰ I kumu l᷊ai seng nikoa su wanggili ko nipilo manga rasuli manga nabi, dingang I Kristus Yesus kere watu ko nitantu.

²¹ Ko I Sie ko nanusung kaul᷊i u bangunang e'e nariadi wal᷊e ngu Mawu Ruata ko seng nihae guna ngu Mawu.

²² Watu'u wiahi nasimbau dingang I Kristus, i kumu l᷊ai seng nipararisi singkahindo manga taumata ko wal᷊inge makoa simbau wal᷊e guna ngu Mawu Ruata; su se'e Mawu Ruata matana dingang u Roh-E.