DANIEL 7 - BUKI SUSI Wahasa ngu Taghul᷊andang l᷊ou-l᷊ou

I DANIEL NUWUKE APANG KO NIKAWUAE 7:1–12:13 Pa binatang ko nikawua ngi Daniel

^1-2 Pia su sihuwi, su taung kahimotongange i Belsyazar nakoa ratu su Babel, ia, i Daniel nipi dang nakahombang kawawua. Ipi e'e daku niwohe dang habari u hal᷊i u ko daku nikawua e'e ko kiri'i: Anging ko mauha nutumiu bou kaul᷊i u pung u anging dang nakakoa suwu-suwu su l᷊auri mal᷊oang.

³ Bou e'e pia binatang ko l᷊abo pa nul᷊umitou bou l᷊al᷊ung u ake, ko simbau mutatintang dingang ko wal᷊inge.

⁴ Binatang kahimotongange ghahie kere singa, kateho i sie ko pia tatila u burung garuda. Suapang ia nutuhung, singkahuwiu tatilae nasawu dang napilo; i sie nahengke bou tana dang nipararisi su l᷊aeri darua kere taumata, bou e'e ninggilenang u naung u taumata.

⁵ Binatang karuange ghahie kere beruang. I sie kararisi dingang u l᷊aeri u petonge, dang mububawa tatilu duhi ngu husu su tal᷊oara u i sie. Daku nikaringihi pia tingihi nangul᷊i si sie, “Ho, kangko ghisi ngu binatang tuhu kaou!”

⁶ Su tempo ngu ia kaputuhunge, nul᷊umitou binatang ko wal᷊inge. Ghahie kere macan tutul, kateho su pal᷊ukange pia tatilae pa kere burung, dang i sie pia timboe pa. I sie tuhungang sal᷊a makal᷊ahiasi.

⁷ Su tempo ngu ia kaputuhunge, binatang kapae nasupu. I sie matoghasi kahingang dang ko wahani dang makatataku. Dingang u isie ko l᷊al᷊abo dang makitihi kere uase, i sie nunggaghoro dang namelohi ghanange, bou e'e nil᷊al᷊indang l᷊umbeinge. Mutatintang dingang u binatang ko horo, binatang i'i sasungenge mapul᷊o.

⁸ Tintal᷊a ia kaputuhunge manga sasungenge, singkahuwiu simbau sasunge ko wal᷊inge nutumuwo su tal᷊oarae. Sasunge e'e ko dio, kateho botonge manise dang manawu tatilu bou tal᷊oara u manga sasunge ko horo. Sasunge ko dio e'e pia matange kere mata ngu taumata l᷊au mohonge ko mo muwuke ngu l᷊eo dingang u oboti.

Kawawua hal᷊i I Sie ko nuwiahi sarang kal᷊iwuenge

⁹ Tintal᷊a ia turusi kaputuhunge, pira mbau kadera kahipilo. Bou e'e I Sie ko nuwiahi sarang kal᷊iwuenge nukumangiang su kadera simbau bou manga kadera e'e. Pakeang-E l᷊au uta-E mawira-wira kere kapesi. Kadera kararatuang-E dingang u manga rodae karilie ual᷊ingu nil᷊ewa ngu putung,

¹⁰ dang ansehi u putung nurumaki bou kadera e'e. Hiwunge taumata nutangkiang si Sie, dang jutange taumata kararisi su saruang-E. Mbuhue sidang u pangadilang nitita, dang manga buki niwuka.

¹¹ Su tempo ngu ia katuhunge, mborong daku nikaringihi sasunge ko dio e'e kapuwuke ngu l᷊eo dingang u oboti. Mbuhue binatang kapae e'e nipate, dang bangkenge niwahung su putung sarang nahupusi.

¹² Manga binatang ko wal᷊inge seng nisawu kawasange, kateho i sire nipakawala wiahi sarang tempo ko seng nitantu.

¹³ Su l᷊al᷊ung ko nikawuaku huwi e'e, daku nikawua simbau kere taumata. I sie nusumongo dingang nil᷊ikutang u winawa bou e'e natamai sarang koa I Sie ko nuwiahi sarang kal᷊iwuenge dang nipakatitong si sie.

¹⁴ I sie nionggol᷊ang u l᷊aadati l᷊au kawasa kere ratu, hakiu manga taumata bou apang bangsa, suku bangsa, l᷊au wahasa nutahamawu si sie. Kawasange sarung matahang sarang kal᷊iwuenge, pamarentahange sarung ta ipakal᷊engge.

Manga kawawua e'e nipakal᷊ahe

¹⁵ Manga kawawua ko daku nikawua e'e nakabingo dang nakabalisa naungku.

¹⁶ Bou e'e daku nisandighang singkatau bou taumata ko kararisi pai se'e dang daku nipundokang kal᷊al᷊ahe hal᷊i u kaul᷊i u e'e. Kuteu i sie nuhabari e'e.

¹⁷ I sie nangul᷊i, “Binatang pa ko l᷊abo e'e ko kararatuang pa ko sarung musumupu su dunia.

¹⁸ Kateho umati Mawu Ruata Ko Karangetange sarung manarima haki guna ngu mamarenta dang pamarentahange sarung makatahang sarang kal᷊iwuenge.”

¹⁹ Bou e'e ia mo makatitong mangal᷊eng u binatang kapae e'e, ko mutatintang dingang ko wal᷊inge; ko tumaniu makatataku dang ko munggaghoro l᷊au mamelohi ghanange dingang u kanuku witue dang mul᷊inda-l᷊inda l᷊umbeinge.

²⁰ Ia l᷊ai mo makatitong hal᷊i u sasunge mapul᷊o su timboe dang hal᷊i u sasunge ko dio ko nutumuwo samuringe bou e'e nanawu tilu mbau bou manga sasunge ko horo e'e. Sasunge ko dio e'e pia matange l᷊au mohonge ko mangkate kapuwuke ngu l᷊eo dingang u oboti. I sie lebe makatataku bou manga sasunge ko wal᷊inge e'e.

²¹ Su tempo ngu ia katuhunge, sasunge e'e nuparang nundoka umati Mawu Ruata dang namata si sire.

²² Mbuhue I Sie ko muwiahi sarang kal᷊iwuenge e'e nusumongo bou e'e nangonggo u putusang ko mupuhino ngu umati Mawu Ruata Ko Karangetange. Temponge seng nurating i sire manarima kawasa tadeau mamarenta.

²³ Ko i'i kal᷊al᷊ahe ko daku nikahombang, “Binatang ko kapae e'e ko kararatuang kapae ko sarung murumarisi su dunia dang sarung mutatintang dingang u manga kararatuang ko wal᷊inge. Kararatuang e'e sarung munggaghoro dang mamelohi kal᷊abo u dunia dang mul᷊inda-l᷊inda l᷊umbeinge.

²⁴ Sasunge mapul᷊o e'e ko ratu mapul᷊o ko sarung mamarenta kararatuang e'e. Bou e'e singkatau ratu ko wal᷊inge sarung musumupu; i sie sarung mutatintang kahingang dingang u manga ratu ko horo dang i sie sarung mamata ratu i sire tilu.

²⁵ I sie sarung muwisara mul᷊umawang Mawu Ruata Ko Karangetange dang manira umati Mawu Ruata. I sie sarung mutawakal᷊i mamal᷊u manga tita l᷊au manga sal᷊iwang u agama ngu umati Mawu Ruata dang i sire sarung ikawasange tilu taung stenga.

²⁶ Bou e'e pangadilang u sorga sarung musidang dang manawu kawasange l᷊au munggaghoro si sie sarang mailang.

²⁷ Kawasa l᷊au kal᷊al᷊abo u apang kararatuang su dunia sarung ionggo su umati Mawu Ruata Ko Karangetange. Kawasa ngi sire guna ngu mamarenta sarung ta mahupusi dang kaul᷊i u mangangawasa su dunia sarung mutahamawu si sire dingang masatia.”

²⁸ Sarang i'i lahabariku. Ia nabalisa kahingang hakiu nawilosi, kateho takoae sarang singkatau ko daku nihabareng u kaul᷊i u e'e.