DANIEL 4 - BUKI SUSI Wahasa ngu Taghul᷊andang l᷊ou-l᷊ou

I Nebukadnezar nipi karuange

¹ Ko i'i wohang u Ratu Nebukadnezar ko nirohoe su manga taumata su apang bangsa, suku bangsa l᷊au wahasa su kaul᷊i u dunia: “Sal᷊amati!

² Ia mo muwuke ngu kal᷊aherang l᷊au tatia ko makal᷊aherang ko seng nikoa u Mawu Ruata Ko Karangetange si sia.

³ Wal᷊inge gampang kal᷊aboe tatia ko makal᷊aherang ko nikoa-E! Wal᷊inge gampang kahebati ko makal᷊aherang seng nikoa-E! Mawu Ruata sarung makoa ratu sarang kal᷊iwuenge. I Sie mukawasa su kanandu u tempo.”

⁴ Ia natana dingang matatapi su istana dang nuwiahi dingang u kal᷊ahamaghi.

⁵ Kateho su sihuwi su tempo ngu ia katikie, ia nipi dang nakarea kawawua ko makaghagha kahingang naungku.

⁶ Bou e'e daku nikuiang manga mapapande ko ene su Babel tadeau pul᷊ahe mangal᷊eng u ipi e'e si sia.

⁷ Kateho su tempo ngu manga mamamatehi, tahahopa, manga taumata ko pia titonge dang manga mapapande ngu wituing e'e nusumongo dang daku niwuke ipiku e'e si sire, takoae sarang singkatau ko nakapul᷊ahe mangal᷊enge.

⁸ Samuringe i Daniel ko nisigho l᷊ai si Beltsazar kere areng u dewaku nusumongo. I Daniel nikasukang u roh u manga dewa ko susi. Daku niwuke ipiku si sie l᷊ai, angkungku,

⁹ “Ei, Beltsazar, pangaha u manga taumata ko pia titonge, ia matitong himoneu i kau nisongong u roh u manga dewa ko susi, hakiu takoae rahasia ko mawawuni si kau. Pundaringihiko ipiku i'i, dang pakal᷊aheko mangal᷊enge.

¹⁰ Su tempo ngu ia katikie, daku nikawua kau simbau ko katuwonge su tal᷊oara u dunia.

¹¹ Kau e'e marange kahingang; l᷊aese ko l᷊abo dang matoghasi. Pusue nurating u l᷊angi, hakiu botonge ikawua ngu kaul᷊i u taumata su dunia.

¹² Manga raunge matatubung dang wuange mal᷊aul᷊i kahingang, makataung ikang u kaul᷊i u matatana su dunia. Manga binatang l᷊ul᷊u kal᷊al᷊oka su al᷊ung u naue dang manga burung nukoa sal᷊ehi su lelange. Dang kaul᷊i u ko niriadi botonge kumang manga wuange.

¹³ Su tempo ngu ia kapusipiri u kawawua e'e, daku nikawua singkatau malaikati nul᷊umintu bou sorga; i sie tuhungang madiaga dang maingati.

¹⁴ Dingang mauha i sie nangul᷊i, ‘Tuwangko kau e'e dang potoko manga lelange, rondosiko manga raunge dang sawuhiko wuange. Useriko manga binatang ko kal᷊al᷊oka su al᷊unge l᷊au manga burung ko nusal᷊ehi su manga lelange.

¹⁵ Kateho pakawalako tuiri patana su l᷊al᷊ung u tana. Ikiko dingang u hante uase l᷊au witu bou e'e tintangte su nguda u rindulu. Walako i sie pakaunsa u namuhi, dang puwiahi singkahindo u manga binatang l᷊au manga sasuang.

¹⁶ Pakawalako naungu taumatange puwal᷊u makoa naungu binatang pitu taung l᷊iwuenge.

¹⁷ Ko e'e putusang i kami manga malaikati ko maingati l᷊au madiaga. Pandung i kami e'e ko tadeau apang taumata su kaul᷊i u tampa mangaku, himoneu Mawu Ruata Ko Karangetange mukawasa su kararatuang u taumata dang kararatuang e'e nionggo-E si sai-sai ko nipile-E, sarang maneng su taumata ko takoae mangal᷊enge!’

¹⁸ Ei Beltsazar, ko e'e ipiku. Orasi i'i ul᷊iko mangal᷊enge si sia. Takoae sarang singkatau bou manga mapapande ko ene su kararatuangku botonge mangul᷊i u e'e si sia, kateho i kau botonge, watu'u i kau nisongong u roh u manga dewa ko susi.”

I Daniel nupakal᷊ahe mangal᷊eng u ipi e'e

¹⁹ Nakaringihi e'e, i Daniel ko nisigho l᷊ai si Beltsazar, nahuwi dang naherang singkatempo. Kuteu ia, Ratu Nebukadnezar nangul᷊i si sie, “Beltsazar, kumbahang i kau maghagha ual᷊ingu ipi l᷊au mangal᷊enge e'e.” I Beltsazar nusumimbahi, “Tuangku, wal᷊inge gampang kapiange kiko apang ko mariadi ipatehang u ipi e'e mahino su manga roka i Tuangku dang wal᷊inge si Tuangku.

²⁰ Kau ko nikawua ngi Tuangku e'e kere'e karange'e, hakiu pusue nurating u l᷊angi, dang botonge ikawua u apang taumata su dunia.

²¹ Manga raunge matubung dang wuange maul᷊i hakiu botonge makataung ikang u kaul᷊i u tataho u dunia. Manga binatang l᷊ul᷊u ko kal᷊al᷊oka su al᷊ung u naue, dang manga burung nusal᷊ehi su manga lelange.

²² O Tuangku, ko i Tuangku kau ko marange l᷊au ko matoghasi e'e. Kal᷊al᷊abo i Tuangku matamba murating sarang l᷊angi dang kawasa ngi Tuangku matamba wunahie murating sarang pondol᷊i u dunia.

²³ I Tuangku l᷊ai nakawua singkatau malaikati nul᷊umintu bou sorga apiru nangul᷊i, ‘Tuwangko kau i'i dang pakawinasako, kateho pakawalako tuiri patana su l᷊al᷊ung u tana. Ikiko dingang u hante uase l᷊au witu bou e'e tintangte su nguda u rindulu. Pakawalako i sie pakaunsa u namuhi dang puwiahi singkahindo dingang u manga binatang pitu taung l᷊iwuenge.’

²⁴ Tuangku, ko i'i mangal᷊eng u kawawua e'e, dang ko i'i niputusi u Mawu Ruata Ko Karangetange hal᷊i i Tuangku sisane.

²⁵ I Tuangku sarung itokol᷊i bou komol᷊ang u taumata dang muwiahi su tal᷊oara u manga binatang su ngudae. Pitu taung l᷊iwuenge i Tuangku sarung mukumang rindulu kere sapi dang matiki su peleng, hakiu maunsa u namuhi. Bou e'e i Tuangku sarung mangaku himoneu Mawu Ruata Ko Karangetange mukawasa su kararatuang u taumata, dang kararatuang e'e nionggo-E si sai-sai ko nipile-E.

²⁶ Manga malaikati e'e namarenta tadeau tuiri u kau e'e pakawala patana su l᷊al᷊ung u tana. E'e mangal᷊enge himoneu i Tuangku sarung sau makoa ratu suapang i Tuangku mangaku himoneu Mawu Ruata mukawasa su kaul᷊i u dunia.

²⁷ Watu'u e'e kenangko i Tuangku putuhu sasasa u l᷊ang. Kumbahang i Tuangku sau mubardosa, kateho pukoako apang ko mapia l᷊au ko maadili, dang kindaghiteko tau ko susa. Dingang kere'e i Tuangku sarung tatapi mal᷊uasi.”

²⁸ Kaul᷊i u e'e nariadi su watangengku, Ratu Nebukadnezar.

²⁹ Mapul᷊odua su wul᷊ange tuhu u e'e, su tempo ngu ia kal᷊al᷊enge su taman su wawo u istana su Babel,

³⁰ ia nangul᷊i, “Putuhung, wal᷊inge gampang kahebati soa ngu Babel! Ko ia namangung e'e nakoa pusati u soa ngu negara guna ngu mul᷊ahe kawasa l᷊au katatoghasiku, kawawantughi l᷊au kal᷊al᷊aboku!”

³¹ Ia mborong tangkeng nasue didatonge su tempo ngu nikaringihi tingihi bou l᷊angi, “Ratu Nebukadnezar, pundaringihiko i'i! Kawasa ngu kere ratu seng nial᷊a bo i kau.

³² I kau sarung iuseri bou kawanua ngu taumata, dang muwiahi dingang u manga binatang su ngudae. Su kanandu u pitu taung i kau sarung mukumang rindulu kere sapi. Bou e'e i kau sarung mangaku himoneu Mawu Ruata Ko Karangetange mukawasa su kararatuang u taumata dang kararatuang e'e nionggo-E si sai-sai ko nipile-E.”

³³ Su tempo e'e l᷊ai, manga didato e'e nariadi. Ia, i Nebukadnezar niuseri bou kawanua ngu taumata dang nukumang rindulu kere sapi. Badangku niunsa u namuhi, utaku nakoa kere nandu u ruku u kasiahe, dang kanukuku kere nandu u kanuku ngu burung.

I Nebukadnezar nundalo Mawu Ruata

³⁴ Suapang tempo pitu taung e'e seng nal᷊iu, ia nutumingara sarang l᷊angi, bou e'e ia sau natitong. Kuteu Daku nidalo Mawu Ruata Ko Karangetange. Daku nihengke dang daku niwantughang I Sie ko nuwiahi kakal e'e. “Mawu Ruata sarung makoa ratu sarang kal᷊iwuenge. I Sie mukawasa su kanandu u tempo.

³⁵ Manga bangsa su dunia takoae mangal᷊enge. Mawu nangawasa malaikati su sorga l᷊au si sire ko natana su dunia. Takoae sarang singkatau ko botonge mundoka kao-E, takoae ko wahani makina apa ko nikoa-E.”

³⁶ Su tempo ngu sipirangku sau natilang, kal᷊al᷊abo, kawawantughi l᷊au katateleng u kararatuangku nisul᷊e si sia. Ia nisomaheng u manga pagawaiku l᷊au manga tumbonang u manga ana u kawanuaku dang ia nisul᷊e su kararatuangku, katewe ia nakoa nangilembo l᷊abo bou horo.

³⁷ Inau orasi i'i ia, i Nebukadnezar mundalo, mupakarange dang mamantughi Ratu ngu Sorga. Apang kakanoa-E nuhino dang maadili, dang I Sie botonge mupakasana u taumata ko maoboti.