DANIEL 3 - BUKI SUSI Wahasa ngu Taghul᷊andang l᷊ou-l᷊ou

I Nebukadnezar nupasuwang u parenta tadeau ana u kawanua panumba patong wul᷊aeng

¹ Pia su singkatempo Ratu Nebukadnezar nukoa patong bou wul᷊aeng simbau ko range'e duampul᷊opitu su meteri dang wunahie masandighi tilu meteri. I sie nupararisi su tene ngu Dura su propinsi ngu Babel.

² Mbuhue ratu nunoti kaul᷊i u ratu ngu wilaya, manga gubernur, bupati, mananughu ngu negara, bendahara, mamamonesi, mapapande ngu torati, dang kaul᷊i u tumbonang u tampa tadeau musumongo su upacara tatia ngu patong ko nikoae e'e seng nasue.

³ Suapang i sire kaul᷊ie seng nusumongo dang nurumarisi su tingo ngu patong e'e,

⁴ opasi u ratu nukumiha mauha, “Manga ana u simbau bou apang bangsa, suku bangsa l᷊au wahasa! Pundaringihiko parenta ngu ratu i'i:

⁵ Boko tarompeti mul᷊umuntingihi, nituhukang u tingihi u suling, kecapi, rebab, gambusi, serdam, l᷊au manga pakakasi u musik ko wal᷊inge, manga ana u simbau mambeng pusuba panumba patong wul᷊aeng ko seng nipararisi i Ratu Nebukadnezar.

⁶ I sai ko mul᷊umawang parenta i'i, sarung turusi iwahung su l᷊al᷊ung u putung ko karilie.”

⁷ Kuteu nakaringihi manga pakakasi u musik e'e nipul᷊untingihi, manga taumata bou apang bangsa, suku bangsa l᷊au wahasa, nusuba nanumba patong wul᷊aeng e'e.

I sire tilu ringang i Daniel niantang nul᷊umawang parenta ngu ratu

⁸ Pira ngkatau tau Babel nupake u tempo e'e tadeau mupakasilaka tau Yahudi.

⁹ I sire nangul᷊i si Ratu Nebukadnezar, “Kaumuri i Tuangku sarang kal᷊iwuenge!

¹⁰ I Tuangku sisane seng nupasuwang u parenta himoneu pakaehong suapang manga pakakasi u musik nipul᷊untingihi, kaul᷊i u taumata mambeng pusuba dang panumba patong wul᷊aeng e'e,

¹¹ dang i sai ko mul᷊umawang parenta e'e sarung iwahung su l᷊al᷊ung u putung ko karilie.

¹² Kateho pirangkatau tau Yahudi ko seng nipanarakaneng i Tuang pamarentahang u propinsi ngu Babel ta nupandung parenta ngi Tuangku e'e. I sire e'e ko i Sadrakh, i Mesakh, l᷊au i Abednego. Manga taumata e'e mandi manumba manga ilah ngi Tuangku dang ta l᷊ai nanumba patong wul᷊aeng ko nipararisi i Tuangku.”

¹³ Nakaringihi e'e ratu nuwawal᷊uang kahingang, bou e'e nangonggo parenta tadeau i sire tilu e'e pakiwawa putingo si sie.

¹⁴ Ratu nakina si sire, “Sadrakh, Mesakh l᷊au Abednego! Ko tingari i kumu mandi manumba manga ilahku dang mandi l᷊ai musuba su patong wul᷊aeng ko seng daku nipararisi e'e?

¹⁵ Ho, orasi i'i, apa i kumu sadia musuba dang manumba patong e'e su tempo ngu musik mul᷊untingihi? Boko i kumu mandi, i kumu sarung turusi iwahung su l᷊al᷊ung u putung ko karilie. Dang dewa sude'e ko sarung botonge makasal᷊amati si kumu bou kawasaku?”

¹⁶ I Sadrakh, i Mesakh l᷊au i Abednego nusumimbahi, “Ko i L᷊uadateng ko mawantughi, i kami sarung ta manuka manatawang watangeng i kami.

¹⁷ Boko Mawu Ruata ko nisumba ngi kami botonge makasal᷊amati si kami bou putung ko karilie dang bou kawasa ngi Tuangku, nal᷊ahe i Sie mukoa e'e.

¹⁸ Kateho boko I Sie ta mukoa e'e l᷊ai, kere wotonge i Tuangku katitong himoneu i kami sarung ta musuba su dewa ngi Tuangku dang l᷊ai sarung ta manumba patong wul᷊aeng ko nipararisi i Tuangku e'e.”

I Sadrakh, i Mesakh l᷊au i Abednego nihukung pateng

¹⁹ Kuteu nasongkahi wawal᷊uang ngi Ratu Nebukadnezar si Sadrakh, si Mesakh l᷊au si Abednego, hakiu pahesie nahamu naitung. I sie nuparenta tadeau putung pakikoa pakapitu lebe matiti bou wiasange.

²⁰ Bou e'e i sie nangoro pirangkatau taumata ko matatoghasi kahingang bou sordadonge tadeau pangiki si Sadrakh, si Mesakh l᷊au si Abednego, dang mamahung si sire sarang l᷊al᷊ung u putung ko karilie e'e.

²¹ Maehong i sire tilu e'e niiki pakasikari dingang u pakeang ko naghiwu, e'e ko dingang u kameja, juba, sapeo l᷊au pakeang ko wal᷊inge, bou e'e niwahung sarang l᷊al᷊ung u putung ko karilie e'e.

²² Ual᷊ingu parenta ngu ratu e'e kere'e kasikarie, kuteu putung e'e seng nipakatiti kahingang hakiu hena ngu putung nanutung nakapate manga taumata ko nuhengke si Sadrakh, si Mesakh l᷊au si Abednego sarang masandighi u putung.

²³ Ko kere'e, i sire tilu ko kal᷊aiki masikari e'e nanawo su l᷊al᷊ung u putung ko karilie e'e.

²⁴ Ratu Nebukadnezar nahuwi dal᷊ai-l᷊ai. I sie nurumarisi dingang maehong dang nunggo su manga pagawainge, “Wal᷊ingewe i kite kanini nangiki si sire tilu ngkatau dang namahung si sire sarang l᷊al᷊ung u putung e'e?” I sire nusumimbahi, “Tingari Tuangku.”

²⁵ Nisimbahi u ratu, “Kateho nakurawe daku nikawua pia pa u katau kal᷊al᷊enge su tal᷊oara u putung e'e? I sire ta mal᷊ahapusi dang ta nakura maneng singkodo-kodo. Dang kapae e'e ghahie kere dewa.”

I sire tilu e'e nipakal᷊iwiri dang nipakarange pangkatie

²⁶ Bou e'e Ratu Nebukadnezar nusumandighi tukari u putung e'e dang nunggo, “Sadrakh, Mesakh l᷊au Abednego, manga l᷊ang u Mawu Ruata Ko Karangetange! Suwangte bou putung e'e!” Kuteu i sire nusumuwang.

²⁷ Kaul᷊i u wakili u ratu, manga gubernur, bupati l᷊au manga pagawai ko wal᷊inge nul᷊iku si sire tilu e'e dang nutuhung himoneu i sire sarang singkodo ta nisuhungang u putung e'e. Uta i sire ta natutung, dang pakeang i sire l᷊ai ta natutung, sarang raruru ngu tipu takoae si sire.

²⁸ Bou e'e ratu nangul᷊i, “Pundaloko Mawu Ruata ko nisumba ngi Sadrakh, i Mesakh l᷊au i Abednego. I Sie seng nundoi u malaikati-E tadeau pangambang si sire tilu l᷊ang-E ko mangimang si Sie. I sire seng nul᷊umawang parentaku dang lebe mapiang mate sul᷊ung u manumba arako musuba manga dewa ko wal᷊inge su l᷊ikuri Mawu Ruata ngi sire sisane.

²⁹ Watu'u e'e ia mamarenta apang taumata, bou bangsa, suku bangsa arako wahasa maneng bou apa, ko nuhabari l᷊ahinakang su Mawu Ruata ko nisumba ngi Sadrakh, i Mesakh l᷊au i Abednego, sarung ipapoto dang wal᷊enge sarung il᷊engge dang pakakoa ndu u l᷊inau kakoa u wal᷊e. Watu'u takoae dewa ko botonge makakoa apang ko seng nikoa u Mawu Ruata e'e.”

³⁰ Bou e'e ratu nupakarange u pangkati Sadrakh, i Mesakh l᷊au i Abednego, hakiu i sire nakoa manga tumbonang ko mararange su propinsi ngu Babel.