DANIEL 12 - BUKI SUSI Wahasa ngu Taghul᷊andang l᷊ou-l᷊ou

Panginsueng u dunia

¹ Malaikati ko nul᷊oho l᷊aku leneng e'e sau nangul᷊i, “Su tempo e'e sarung musumupu malaikati ko l᷊abo i Mikhael mananirung bangsa ngu. Bou e'e sarung pia tempo ngu kasasusa ko takoae sul᷊unge mangki pia manga bangsa. Kateho kaul᷊i u taumata bou bangsa ngu ko arenge kawawohe su l᷊al᷊ung u buki u Mawu Ruata, sarung ipakasal᷊amati.

² Maul᷊i bou tal᷊oara i sire ko seng nate sarung sau muwiahi; simbahageang sarung makanteng puwawiahi ko kakal, dang simbahageang l᷊ai sarung makapundang kal᷊ahina l᷊au katataku ko kakal l᷊ai.

³ Manga pangaha ko mapapilesa sarung musuminang kere sinang u l᷊angi. Dang i sire ko seng nanintiro taumata maul᷊i guna ngu mukoa apang ko mapia l᷊au ko maadili, sarung musuminang kere manga wituing sarang kal᷊iwuenge.”

⁴ Bou e'e angkung u malaikati e'e l᷊ai si sia, “Daniel, takako buki e'e orasi i'i, dang tahoneko segeli tadeau tatapi katataka sarang panginsueng u dunia. Maul᷊i taumata sarung manuka mutuhung minsang ko seng nariadi. Kateho tawakal᷊i ngi sire e'e sarung takoae mangal᷊enge.”

⁵ Bou e'e daku nikawua pia dua ngkatau ko ese. Singkatau kararisi su wiwihi u sal᷊uhi simbuka si'i, dang ko wal᷊inge su wiwihi u sal᷊uhi simbuka ko pai.

⁶ Singkatau nakina su ko kararisi masandighi u uta u sal᷊uhi, “Ko kangereng manga hal᷊i nariadi ko makal᷊aherang i'i mahupusi?”

⁷ Singkatau ko wal᷊inge e'e nuhengke l᷊imange dua mbuka sarang l᷊angi. Daku nikaringihi i sie nutewa su areng u Mawu Ruata ko kakal dang nangul᷊i, “Manga hal᷊i e'e sarung mariadi tilu taung stenga l᷊iwuenge. Suapang putatingkai su umati Mawu Ruata e'e mapal᷊usi, kuteu mapal᷊usi l᷊ai manga hal᷊i nariadi ko makal᷊aherang e'e.”

⁸ Kaul᷊ie ko nihabarie e'e tingari mang daku nikaringihi, kateho ia ta nakahingang. Bou e'e ia nakina, “Tuang, kirapawe kaul᷊ie i'i sarung mapal᷊usi?”

⁹ I sie nusumimbahi, “Dakoe tamai orasi i'i, Daniel, watu'u manga didato i'i mambeng iwuni dang ta ihabari sarang panginsueng u dunia.

¹⁰ Maul᷊i taumata sarung isuka dang ipakatilang. I sire ko dal᷊ai sarung ta makahingang dang sarung turusi mukoa ko dal᷊ai; kitang i sire ko mapilesa sarung makahingang.

¹¹ Bou tempo ngu korbang l᷊ou-l᷊ou e'e nipangiro dang simbau ko makatataku ko nisigho Kal᷊al᷊ai ko mupakaghaghoro e'e nipararisi, sarung mal᷊iu sihiwuduahasusiompul᷊o su l᷊ounge.

¹² Kal᷊al᷊uasi si sire ko tatapi masatia sarang sihiwutiluhasutilumpul᷊ol᷊ima su l᷊ounge.

¹³ I kau Daniel, pakasatiako sarang panginsuenge. I kau sarung mapul᷊e asal᷊ie, kateho sarung muwangung guna ngu manarima l᷊uange su panginsueng u dunia.”