फिलिप्पी 2 - Walangi

यीशु मसीहे ईं अपफ घटाण

¹ ए ट्यारेओ! तुसी पता असा कि मसीहे तुं धे कति हिम्मत दुतो असी, तसे परेम अन्तर तुसी कत अराम मेओ असा, होर तसे आत्मा जुए तुस कत मेल मिलाप कते। मसीह तुसी पुठ कति दाह दया त परेम कता, तुसी ई बि पता असा।

² त तेस बझई जुए यक होरी जुए राजि भोई कइ, उई मी कइ बिशे। त तुं सोबी के मकसद त इच्छा सद मसीह खुश करणे भुण चहिए। ईं करियेल त मोउं तीं खुशी मेती।

³ अपफ ना बधुण त ना झूठा रोभ किढ़ण। बल्कि अपफ घटाई कइ होरी अपफ केआं बध समझे।

⁴ त सद अपु फायदा जे किछ ना करे, बल्कि होरी फायदा जे बि करे।

⁵ यीशु मसीह अन्तर जीं गुण थिए, तुस बि तसे ईं गुण रखे।

⁶ से अपफ परमेश्वर भोई कइ बि परमेश्वरे जगाई पुठ बिशणे कोशिश ना की।

⁷ बल्कि तेन अपु सोब किछ छड़ दी कइ अपफ घटा, त मनखे रूप नी कइ जमा, होर यक नौखरे ईं भुआ।

⁸ जपल तेन मनखे रूप नीआ, तेन अपफ घटा। त मरण तकर, बल्कि क्रूस पुठ दुष्ट मेह्‍णु के ईं मरुण तकर परमेश्वरे बोक मनी।

⁹ इस बझई जुए परमेश्वर तसे धे सोबी केआं ज्यादी इज्जत त सम्माने जगाह दिती त सोबी पुठ तस धे हक दिता।

¹⁰ परमेश्वर ई किउ ताकि यीशु नओएं बेलि जे स्वर्ग पुठ, धरती पुठ त पाताल अन्तर असे, से सोब मगिरि बल उटेऊ बिश कइ मानेल

¹¹ त होरी जे बोलियेल कि “सद यीशु मसीह प्रभु असा” जेसे बेलि परमपिता परमेश्वरे महिमा भुन्ति।

¹² त ए ट्यारेओ! तुसी जुए बिशणे टेम जीं तुसी में हर यक निआंग मनो असी, तीं अभेईं में गैर हाजिर अन्तर बि तस केआं बि ज्यादा ध्यान दी कइ में बोक माने। परमेश्वरे जे तुस बचाओ असे, तस होरी हरालण जे कश कइ जीन्ते रिहे।

¹³ किस कि परमेश्वर ईं असा जेन तुं धे अपु इच्छाई हिसाब जुए कम करण जे मन त ताकत दुतो असी।

¹⁴ त सम्हाई कम बिना शिकायत त बजन बेहेसी करीण दिए,

¹⁵ ताकि इस कलि जुग अन्तर त दुष्ट मेह्‍णु बुच बजन कोई दोषे ना कोई खराबी तुस परमेश्वरे गभुर ईं जीएल। त जीं जोसुण चमक कइ अन्हारे अन्तर मेह्‍णु बथ हरालती, तिहांणि तुं जीण बि मेह्‍णु जीणे सुसुर बथ हरालतु।

¹⁶ तुस परमेश्वरे जीवन देणे बाड़े वचन अन्तर पक्के भोई बिशे। अगर तुस ई सोब कते त मसीह दुबारी एणे रोज अउं इस बोकी पुठ रोभ किढ़ता कि मसीह जे मेईं जे दुख सेहा त कष्ट किआ, से बेकार ना भुआ, बल्कि तसे फल तुस असे।

¹⁷ खुश खबरी प्रचार करण अन्तर तुं मदत त यीशु मसीहे पुठ विश्वास करण बझई जुए तुं भुंजुण परमेश्वर जे यक भकत ईं असा। अगर तुं ईं मोउं बि भुंजाई कइ मार छते त अउं खुश असा, किस कि तोउं अउं परमेश्वर जे तुं भकत जुए जुड़ कइ तस पूरा कता। त जीं अउं खुश असा,

¹⁸ तीं तुस बि खुश भुए त मोउं जुए खुशी मनाए।

पौलुस तिमुथियुस फिलिप्पी शेहर लंघाण

¹⁹ प्रभु यीशु चहाल त अउं झट तुसी केईं तिमुथियुस लंघान्ता, ताकि तुं हाले बारे पता लाई कइ मोउं धिक शान्ति मेईंयेल।

^20-21 में सम्हाई साथी अपु अपु फायदा तोपुण लगो असे। यीशु मसीह तेन्हि केआं की कराण चहन्ता तसे बारे कोई बि ना सोचते। सद तिमुथियुस अपु मन अन्तर पूरे सच्चाई जुए तुं भलाई सोचता।

²² तुसी त से परख कइ पिछाणो असा कि से कत भरोसे लेएक असा। जीं कुआ अपु बोउए बोकी नकल कता, तीं से बि मोउं जुए खुश खबरी प्रचार करण अन्तर कष्ट कता।

²³ त में उम्मीद असी कि जपल मोउं पता लगाल कि कचेरी अन्तर में बारे की फैसला भुन्ता, तपले ईं अउं तस लंघाई छता।

²⁴ त मोउं बि पूरा यकीन असा कि प्रभु चहाल त अउं अपफ बि झट एई घेन्ता।

पौलुस इफ्रुदितुस फिलिप्पी शेहर लंघाण

²⁵ तोउं तकर, मोउं ई जरूरी लगतु कि तुसी केईं अउं इफ्रुदितुस वापिस लंघाउ। से मसीह पुठ विश्वास करणे बेलि में भाई त खुश खबरी प्रचार करण अन्तर में साथी असा। से सपाही ईं खुश खबरी सच्चाई उगाह देण अन्तर मोउं जुए साते लड़ाई कता त तुं प्रतिनिधि बण कइ जरूरते टेम में मदत कता।

²⁶ तोउं बि मेईं तस तुसी केईं लंघाणे ठीक किओ असु, किस कि तस तुं सम्हाई के हप्पड़ लगो असा। त तसे बीमार भुणे बारे जे तुसी शुणो असु, तेस बझई जुए बि दुखी भोई गो असा।

²⁷ आं! से सच्चे बि बीमार थिआ। एत थिआ कि मरणे बाड़ा थिआ। तोउं बि परमेश्वरे तस पुठ दाह की। आं, तेन मोउं पुठ बि दाह की, किस कि अगर से मर घेन्ताथ त में जेहले दुख पुठ हउ दुख एन्ताथ।

²⁸ तोउं त इफ्रुदितुस तुसी केईं लंघाण जे में तीं मन किआ ताकि तस जुए मी कइ तुसी सुख मेईंयाल त तुं बारे में मन बि धिक पोली घेआल।

²⁹ त मसीह पुठ विश्वास करण अन्तर तुं भाई समझ कइ बोडे खुशी जुए तसे अग्रोई करे। तस त तसे ईं मेह्‍णु सुआ इज्जत दिए।

³⁰ किस कि मसीहे सेवा करण जे तेन अपु जान बि खतरे अन्तर छोओ थी त मरणे बाड़ा थिआ। दूर बिश कइ जे मदत तुस में ना कइ बटतेथ, तेन से पूरी की।