2 थेस्सलु 3 - Walangi

प्रार्थना करण जे छनेअरे

¹ ए भाई त भेणिओं! अखिर अन्तर अस छनेअरे कते कि असी जे प्रार्थना करे। प्रभु बारे समाचार जीं तुसी बुच फैलो थिआ, तीं झटपट चोहरो कना फैलो लौता त तसे महिमा भुओ लौती।

² त प्रार्थना करे कि परमेश्वर असी कपटी त बुरे मेह्‍णु केआं बचाई रखे। (किस कि सम्हाई मेह्‍णु परमेश्वर पुठ विश्वास ना भुन्ता)

³ पर हें प्रभु यकीन लेएक असा। से तुसी ताकत देन्ता त तेस शैतान केआं बचान्ता।

⁴ तुं बारे प्रभु पुठ हें पक्का भरोसा असा कि जे जे निआंग अस तुसी जे देन्ते तस तुस मानते त अगर बि मानते रेहन्ते।

⁵ प्रभु तुं मन अन्तर परमेश्वरे परेम त यीशु मसीहे सीढ़णे शक्ति बधाए।

मेहनते कमाई बारे शिक्षा

⁶ ए भाई त भेणिओं! अब प्रभु यीशु मसीहे नओएं बइ अस तुसी जे ई निआंग देन्ते कि जेन्के चाल चलण ठीक नेईं त जे हें हर निआंग ना मानते, तेन्हि सोबी मेह्‍णु जोई उई मी कइ ना बिशे

⁷ तुसी पता असा कि तुसी कीं हें ईं जीण असु, किस कि जिखेईं अस तुं ए थिए त हें चाल चलण कदी गलत ना भुआ।

⁸ असी केसेरी रौठि मुफत अन्तर ना खेई, बल्कि भ्यागे ब्यादि कम-काज किउ, ताकि अस तुं केसेरी पिठ ना एईयेल।

⁹ हांलाकि असी तुसी पुठ पूरा हक थिआ, तोउं बि असी तुसी केआं किछ ना मगु। किस कि अस तुं अगर यक नमूना रखुंण चहन्तेथ, ताकि तुस बि हें ईं चाल चले।

¹⁰ किस कि जपल अस तुं ए थिए त असी तुसी जे निआंग दुतो थी कि “अगर कोई कमाण ना चहन्ता त तस खांजे बि ना खाण।”

¹¹ तोउं बि अस इ शुणुण लगो असे कि तुं बुच केहि मेह्‍णु के चाल चलण ठीक नेईं। से अपफ कोई कम ना कते, पर होरी के कमी अन्तर खुठि देन्ते।

¹² ईं मेह्‍णु जे अस प्रभु यीशु मसीहे नओएं बइ समझाई कइ ई निआंग देन्ते कि से चुपचाप अपु कम करे त सद अपु कमाई खाए।

¹³ पर ए भाई त भेणिओं! तुस भलाई कते-कुते थकी बि घियेल, त तोउं बि भलाई करण छड़ ना देण।

¹⁴ अगर कोई इस चिट्ठि अन्तर लिखो हें निआंग ना मानते त तेस पुठ धिक नजर रखे। तेन्हि जुए सुआ निड़िए नओं, जेसे बेलि तेन्हि शरम एईयेल, से सुधरी घियेल।

¹⁵ फि बि तेन्हि जुए दुश्माणी के ईं उरते-बरते नओं, बल्कि अपु भाई भेणि समझ कइ तेन्हि समझाण दिए।

नमस्कार

¹⁶ अभेईं शान्ति देणे बाड़ा प्रभु तुसी हर बेले, हर किस्मी शान्ति दिए त तुसी सम्हाई जोई साते बिशे।

¹⁷ अउं पौलुस जीं हर टेम लिखता, तीं इस चिट्ठि अन्तर बि अपु हथे बइ तुसी जे ए नमस्कार लिखुण लगो असा।

¹⁸ हें प्रभु यीशु मसीहे कृपादृष्टि तुसी सम्हाई पुठ भुन्ति रिहे। आमीन!