ପିଲିପିୟ 4 - New Testament in Pengo Parja Languageପାଉଲ ଏକ୍ ଆଜି ମାଞ୍ଜେଙ୍ଗ୍ ଗୁୱାରି କିତାନ୍ 1 ଏ ନା ପାର୍ତିକିନି ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ବେସି ଲାଡ୍ କିଦ୍ନାଙ୍ଗା। ଆରେ ଆନେଙ୍ଗ୍ ମିଙ୍ଗେଙ୍ଗ୍ ଗିଟାଆଦେଙ୍ଗ୍ ଇଚା କିନାଙ୍ଗା। ମି କାଜିଙ୍ଗ୍ ଆନେଙ୍ଗ୍ ୱାରି ଆତାଙ୍ଗ୍ନା ଆରେ ଏପେଙ୍ଗ୍ ନା କାମାୟ୍ କାଜିଙ୍ଗ୍ ନା ମୁକୁଟ୍ଲେକେ। ଇ ଲେକେ ମାପୃତାକେ ବେସି ପାର୍ତି କିଜି ମାନାଟ୍। 2 ଆନେଙ୍ଗ୍ ଇୟଦିଆ ଆରେ ସୁନ୍ତୁଖୀଙ୍ଗ୍ ରିଣ୍ଡେକ୍ ତଣ୍ଦେକ୍ ମାହାଆଜି ମାଞ୍ଜେଙ୍ଗ୍ ଗୁୱାରି କିଦ୍ନାଙ୍ଗା। ଇନେସ୍କି ଏପେଙ୍ଗ୍ ରିକାଦେର୍ ମାପୃଙ୍ଗ୍ ପାର୍ତି କିନାକାଦେର୍। 3 ଦରମ୍ଆଜି ନା ହୁଦାଙ୍ଗ୍ କାମାୟ୍ କିଜିମାଚି ମାନାୟ୍, ଏପେଙ୍ଗ୍ ଇ ରିଣ୍ଡେକ୍ ତଣ୍ଦେକାଙ୍ଗ୍ ମାହାଆଜି ମାଞ୍ଜେଙ୍ଗ୍ ସାଇଜ କିୟାଟ୍। ଇନେସ୍କି କ୍ଲେମେନ୍ସ ଆରେ ଜେକନି ନା ହାଙ୍ଗ୍ଦାକାର୍ ହୁଦାଙ୍ଗ୍ ଇ ଟଣ୍ଡ୍ରିଣ୍ଡେକ୍ ପା ଆନେଙ୍ଗ୍ ହାର୍ଦିକାବୁର୍ ଶୁଣାୟ୍ କିନି କାମାୟ୍ତାକେ କଷ୍ଟ କିତିକ୍ନା। ନା ହୁଦାଙ୍ଗ୍ ମାନ୍ଞ୍ଜି କାମାୟ୍ କିତି ମାନାୟାରିଙ୍ଗ୍ ଈଶ୍ୱର ତା ଜିବୁନ୍ ବହିତାକେ ଲେକିକିତାନ୍ନା। ୱିଜୁଦିନ୍ ୱାରିୟା ଆଜି ମାନାଟ୍ 4 ଏପେଙ୍ଗ୍ ୱିଜୁଦିନ୍ ମାପୃତାକେ ୱାରିଆଜି ମାନାଟ୍। ଆନେଙ୍ଗ୍ ଆରେରଗ ୱେଚ୍ଚାନାଙ୍ଗା ୱାରିଆଜି ମାନାଟ୍। 5 ଏପେଙ୍ଗ୍ ହାର୍ଦି କାମାୟ୍ କିୟାଟ୍, ଇନେସ୍ ମିଙ୍ଗେଙ୍ଗ୍ ଦରମ୍ ମାନାୟ୍ ଇଞ୍ଜି ମାନାୟାର୍ ପୁଞ୍ଜ୍ନାର୍। ଇନେସ୍କି ଏପେଙ୍ଗ୍ ମାନ୍ତ ଇଟାଟ୍ ଯେ ମାପୃ ଇକାତାନେ। 6 ଏପେଙ୍ଗ୍ ଇନା ବିଷୟରେ ପା ଚିନ୍ତା କିମାଟ୍। ମାତର୍ ୱିଜୁ ବିଷୟରେ ଈଶ୍ୱରତାକେ ପାର୍ତାନା କିୟାଟ୍। ଆରେ ମିଙ୍ଗେଙ୍ଗ୍ ଇନାକା ଦର୍କାର୍ ହେୱାନିଙ୍ଗ୍ ଗୁୱାରି ଆରେ ଦନ୍ଯବାଦ୍ ହିଜି ଏନାଟ୍। 7 ଲାଗିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ଶାନ୍ତି ହିଦ୍ନାନ୍। ମାନାୟ୍ ବୁଜାଆନି ଶାନ୍ତିତାଙ୍ଗ୍ ଇ ଶାନ୍ତି ଗାଜା। ଇ ଶାନ୍ତି ମି ଗରବ୍ତିଙ୍ଗ୍ ଆରେ ମି ବାବ୍ନାତିଙ୍ଗ୍ ଯୀଶୁ ଖ୍ରୀଷ୍ଟତାକେ ଜିଜି ମାଞ୍ଜେଙ୍ଗ୍ ସାଇଜ କିଦ୍ନାନ୍। 8 ହାରିହାରା, ଏ ପାର୍ତିକିନି ଟଣ୍ଡାର୍କାଦେର୍, ସତ୍ ବିଷୟରେ, ସନ୍ମାନ୍ ପାୟାଆନି ବିଷୟରେ, ଟିକ୍ ବିଷୟରେ, ଇମ୍ଣି ୱିଜୁ ବିଷୟରେ ପାପ୍ ହିଲ୍ଗୁତ୍, ହଲ୍ନି ବିଷୟରେ, ଇମ୍ଣି ବିଷୟରେ ହାର୍ଦି ତର୍ ମାନାତ୍। ହାର୍ଦି ବିଷୟରେ ଆରେ ଇମ୍ଣି ବିଷୟରେ ମାନାୟାର୍ ଜୟ୍-ଜୟ୍ କିନାର୍ ଇ ୱିଜୁ ବିଷୟରେ ଏପେଙ୍ଗ୍ ଚିନ୍ତା କିୟାଟ୍। 9 ନା କାତା ଆରେ ନା କାମାୟ୍ ଏପେଙ୍ଗ୍ ଇନାକା ହିକା ଆତାଦେର୍ନା ଆରେ ପାୟା ଆତାଦେର୍ନା ହେଦାଙ୍ଗ୍ତିଙ୍ଗ୍ ଏପେଙ୍ଗ୍ ଅବ୍ୟାସ୍ କିୟାଟ୍। ଲାଗିଙ୍ଗ୍ ଶାନ୍ତି ହିଦ୍ନି ଈଶ୍ୱର ମିହୁଦାଙ୍ଗ୍ ମାନ୍ଗାନାନ୍। ପାଉଲ ଫିଲୀପିୟ ମଣ୍ଡ୍ଲିତିଙ୍ଗ୍ ଦନ୍ଯବାଦ୍ ହିତି କାତା 10 ଆନେଙ୍ଗ୍ ମାପୃତାକେ ବେସି ୱାରି, ଇନେସ୍କି ହାରିହାରା ଆତିସ୍ପା ଏପେଙ୍ଗ୍ ନାଙ୍ଗେଙ୍ଗ୍ ଡାବୁଙ୍ଗ୍ ପକ୍ଚି ନା ବିଷୟ ଆରେରଗ ଚିନ୍ତା କିନାଦେରା ଇଞ୍ଜି ଚଚ୍ଚାତାଦେର୍ନା। ସତ୍ତାଙ୍ଗ୍ ନା ବିଷୟରେ ଚିନ୍ତା କିଜି ମାଚାଦେର୍, ମାତର୍ ସୁଯଗ୍ ହିଲାତାତ୍ ନାଙ୍ଗେଙ୍ଗ୍ ସାଇଜ କିଦ୍ଦେଙ୍ଗ୍। 11 ନାଙ୍ଗେଙ୍ଗ୍ ଇନାକା ଦର୍କାର୍ଆନି ଜିନିଷ୍ ଅବାବ୍ ମାନାତ୍ ଇଞ୍ଜି ଆନେଙ୍ଗ୍ ଏଲେଙ୍ଗ୍ ଇଞ୍ଜୁଙ୍ଗା। ଇନେସ୍କି ଆନେଙ୍ଗ୍ ଇନେସ୍ ପରିସ୍ତିତିତାକେ ମାଚିସ୍ ପା ୱାରିଆଜି ମାଞ୍ଜେଙ୍ଗ୍ ପୁଚାଙ୍ଗ୍ନା। 12 ନାଙ୍ଗେଙ୍ଗ୍ ଇନାକା ହିଲିହିଙ୍ଗ୍ କି ବେସି ମାଚିସ୍ ପା ଆନେଙ୍ଗ୍ ଜିଦେଙ୍ଗ୍ ପୁଚାଙ୍ଗ୍ନା। ୱିଜୁ ପରିସ୍ତିତିତାଙ୍ଗ୍ ଆରେ ୱିଜୁ ବିଷୟରେ, ହାର୍ କିଜି ଚିଚିହିଙ୍ଗ୍ କି ନାସ୍କି ମାଚିହିଙ୍ଗ୍, ଆଦିକ୍ ମାଚିହିଙ୍ଗ୍ କି ଅବାବ୍ ମାଚିହିଙ୍ଗ୍ ଆନେଙ୍ଗ୍ ୱାରି କିଜି ମାଞ୍ଜେଙ୍ଗ୍ ପୁଚାଙ୍ଗ୍ନା। 13 ନାଙ୍ଗେଙ୍ଗ୍ ଶାକ୍ତି ହିଦ୍ନି ଖ୍ରୀଷ୍ଟ ସାଇଜତାଙ୍ଗ୍ ଆନେଙ୍ଗ୍ ୱିଜୁ ବିଷୟ କିଦେଙ୍ଗ୍ ଆଡ୍ନାଙ୍ଗ୍। 14 ଏପେଙ୍ଗ୍ ନା ବିପତ୍ ସମୟରେ ଡାବୁଙ୍ଗ୍ ହିଜି ସାଇଜ କିଜି ହାର୍ କିତାଦେର୍ନା। 15 ଏ ଫିଲୀପିୟନି ମାନାୟ୍ କାଦେର୍, ଏପେଙ୍ଗ୍ ପୁଚାଦେର୍ନା ଯେ, ଆନେଙ୍ଗ୍ ମିଙ୍ଗେଙ୍ଗ୍ ହାର୍ଦିକାବୁର୍ ଶୁଣାୟ୍ କିଦ୍ନି ଆରମ୍ ଦିନ୍ତାଙ୍ଗ୍, ଏପେଙ୍ଗ୍ ନେ ନାଙ୍ଗେଙ୍ଗ୍ ଡାବୁଙ୍ଗ୍ ହିଜି ସାଇଜ କିତ୍ତାଦେର୍ନା। ଏଚେପାଦ୍ନା ମି ମାକଦନିଆ ଜିଲ୍ଲାତିଙ୍ଗ୍ ପିସ୍ତି ହାଲ୍ଜି ମାଚାଙ୍ଗ୍। ମାତର୍ ଇମ୍ଣି ମଣ୍ଡ୍ଲି ପା ଦିୟାନିୟା କିଦ୍ୱାତାର୍। 16 ଆନେଙ୍ଗ୍ ଥେସଲନିକି ସହର୍ତାକେ ମାଚିହିଙ୍ଗ୍ ପା ନା ଅବାବ୍ତିଙ୍ଗ୍ ପୁରା କିଦେଙ୍ଗ୍ ରଗ ରିହା ଡାବୁଙ୍ଗ୍ ହିଜି ସାଇଜ କିତ୍ତାଦେର୍ନା। 17 ଆନେଙ୍ଗ୍ ମିବେତାଙ୍ଗ୍ ୱିଜୁଦିନ୍ ଡାବୁଙ୍ଗ୍ ପାୟା ଆଦେଙ୍ଗ୍ ଇଚା କିଉଙ୍ଗା। ମାତର୍ ଏପେଙ୍ଗ୍ ଏଚେକ୍ ହାର୍ଦି କାମାୟ୍ କିତାଦେର୍ନା ଇଦାଙ୍ଗ୍ ପା ରଞ୍ଜାଙ୍ଗ୍ ହାର୍ଦି କାମାୟ୍ ଇଞ୍ଜି ପୁନିକିଦେଙ୍ଗ୍ ଇଚା କିତାଙ୍ଗ୍। ଇଦାଙ୍ଗ୍ କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ପୁରଷ୍କାର୍ ହିଦ୍ନାନ୍। 18 ଏପେଙ୍ଗ୍ ପକ୍ଚି ମାନ୍ଞ୍ଚି ୱିଜୁ ଆନେଙ୍ଗ୍ ପାୟାଆନାଙ୍ଗା, ଆରେ ନାଙ୍ଗେଙ୍ଗ୍ ଦର୍କାର୍ତାଙ୍ଗ୍ ପା ଆଦିକ୍ ପାୟାଆତାଙ୍ଗ୍ନା। ଏଫାପ୍ରାଦିତ କେଇଦ ପକ୍ତାତାକା ୱିଜୁ ଦାନ୍ ପାୟାଆତାଙ୍ଗ୍ନା ଆରେ ନା ଲାଗାୟ୍ ବେସି ମାନାତ୍। ଏପେଙ୍ଗ୍ ନାଙ୍ଗେଙ୍ଗ୍ ପକ୍ତିତି ଦାନ୍ ଈଶ୍ୱର ଲାଗାୟ୍ ବଲିପୁଜା ଆରେ ହାର୍ ବାସ୍ନାହିନି ପୁଜା ସାମାନ୍ ଲେକେ। ଇଦାଙ୍ଗ୍ ଈଶ୍ୱର ଆହ୍ନାନ୍ ଆରେ ୱାରିୟା ଆନାନ୍। 19 ନା ଈଶ୍ୱର ଯୀଶୁ ଖ୍ରୀଷ୍ଟ ତା ଗୌରବ ଶାକ୍ତିତାଙ୍ଗ୍ ମିଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ତିଙ୍ଗ୍ ହିଦ୍ନାନ୍। 20 ମା ଆବା ଈଶ୍ୱରତିଙ୍ଗ୍ ୱିଜୁଦିନ୍ ଗୌରବ ଆୟେତ୍। ଆମେନ୍। ପାଉଲ ସେସ୍ ଜୱାର୍ କିତି କାତା 21 ଯୀଶୁ ଖ୍ରୀଷ୍ଟ ତର୍ଦାଙ୍ଗ୍ ୱିଜୁ ସାଦୁ ମାନାୟାରିଙ୍ଗ୍ ଜୱାର୍ କିୟାଟ୍। ନା ହୁଦାଙ୍ଗ୍ ମାନି ପାର୍ତିକିନି ଟଣ୍ଡାର୍ ମିଙ୍ଗେଙ୍ଗ୍ ଜୁୱାର୍ କିଦ୍ନାରା। 22 ମହା ରାଜାନି ରାଜ୍ ମହଲ୍ତାକେ ମାନି ସାଦୁ ମାନାୟାର୍ ୱିଜାକାର୍ ଜୱାର୍ କିଦ୍ନାରା। 23 ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ୱିଜାକାରିଙ୍ଗ୍ ଆଶ୍ରିବାଦ୍ କିଦେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation