ପିଲିପିୟ 3 - New Testament in Pengo Parja Languageହାତ୍ପା ଦରମ୍ ମାନାୟ୍ 1 ଏ ନା ପାର୍ତିକିନି ଟଣ୍ଡାର୍କାଦେର୍ ଏପେଙ୍ଗ୍ ମାପୃତାକେ ୱାରି ଆଡ। ଇ କାତାତିଙ୍ଗ୍ ବାରମ୍-ବାରମ୍ ଲେକିକିଦେଙ୍ଗ୍ ନାଙ୍ଗେଙ୍ଗ୍ ବିଜାର୍ ହତୁତା। ଇନେସ୍କି ଏପେଙ୍ଗ୍ ମିଚ୍ ହିକ୍ଷାତାଙ୍ଗ୍ ରକ୍ଷା ପାୟାଆନାଦେର୍। 2 କରାପ୍ ନିକୁଡ଼୍ଲେକେ ବୁଲ୍ ହିକ୍ଷା ହିଦ୍ନି ମାଷ୍ଟେରାର୍ତାଙ୍ଗ୍ ସାବ୍ଦାନ୍ ଆଜି ମାନାଟ୍, ଇନେସ୍କି ହେୱାର୍ କରାପ୍ କାମାୟ୍ କିନାର୍। ହେୱାର୍ ସୁନତ ବିଦି ମାନି କିୟାଟ୍ ଇଞ୍ଜି ୱେଚ୍ଚାନାର୍। 3 ଇନେସ୍କି ଆପେଙ୍ଗ୍ ଟିକ୍ ସୁନତ ବିଦି ପାୟାଆତାସ୍ନା। ଆପେଙ୍ଗ୍ ଈଶ୍ୱର ଆତ୍ମାତାଙ୍ଗ୍ ଈଶ୍ୱରତିଙ୍ଗ୍ ପୁଜା କିନାପା। ମାନାୟ୍ କିତି ଉପାଇତିଙ୍ଗ୍ ଆପେଙ୍ଗ୍ ଆହା କିୱାଦାଙ୍ଗ୍ ଯୀଶୁ ଖ୍ରୀଷ୍ଟତାକେ ଆହା କିନାପା। 4 ଏଲେଙ୍ଗ୍ ଆତିସ୍ ଆନେଙ୍ଗ୍ କିତି ଉପାଇତାଙ୍ଗ୍ ଆହା କିଦେଙ୍ଗ୍ ଆଡ଼୍ତାଙ୍ଗ୍ମା, ଯଦି ଇନେର୍ ମାନାୟ୍ କିତି ଉପାଇତାକେ ଆହା କିତିସ୍ ଆନେଙ୍ଗ୍ ହେଦାଙ୍ଗ୍ତାଙ୍ଗ୍ ଆଦିକ୍ ଆହା କିତାଙ୍ଗ୍ମା। 5 ଆନେଙ୍ଗ୍ ଜନମ୍ ଆଜି ଆଡ଼୍ଦିନ୍ତ ସୁନତ ବିଦି କିତାଙ୍ଗ୍ନା। ଆନେଙ୍ଗ୍ ରକାଙ୍ଗ୍ ଇସ୍ରାଏଲ ଜାତିନି ମାନାୟ୍। ଆନେଙ୍ଗ୍ ବିନ୍ଯାମିନ ଲାତ୍ରା ନିକାଙ୍ଗ୍, ଆରେ ନା ଆୟାଆବା ଏବ୍ରୀ ଜାତିନି ମାନାୟ୍ ମାଚାର୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ପା ରକାଙ୍ଗ୍ ଏବ୍ରୀ ମାନାୟ୍। ଆରେ ଆନେଙ୍ଗ୍ ମୋଶା ଲେକିକିତି ନିୟମ୍ତିଙ୍ଗ୍ ମାନିକିନି ର ପାରୁସିଦଳ୍ନି ମାନାୟ୍ ମାଚାଙ୍ଗ୍। 6 ଆନେଙ୍ଗ୍ ନା ଦରମ୍ତିଙ୍ଗ୍ ବେସି ମାନିକିନି କାଜିଙ୍ଗ୍ ଯୀଶୁତାକେ ପାର୍ତିକିନି ମଣ୍ଡ୍ଲିତିଙ୍ଗ୍ ବେସି ଦୁକ୍କଷ୍ଟ ହିଜି ମାଚାଙ୍ଗ୍। ଆନେଙ୍ଗ୍ ଯିହୁଦି ଦରମ୍ନି ୱିଜୁ ନିୟମ୍ତିଙ୍ଗ୍ ମାନିକିଜି ମାଚାଙ୍ଗ୍। ହେଦାଙ୍ଗ୍ କାଜିଙ୍ଗ୍ ନାଙ୍ଗେଙ୍ଗ୍ ଇନେର୍ ପା ଦସି ଇଞ୍ଜି ୱେଚ୍ଚେଦେଙ୍ଗ୍ ଆଡ଼୍ଦୁର୍। 7 ଆଗେ ହେ ୱିଜୁ ବିଷୟ ନା କାଜିଙ୍ଗ୍ ଲାବ୍ ଇଞ୍ଜି ବାବିକିଜି ମାଚାଙ୍ଗ୍, ମାତର୍ ଖ୍ରୀଷ୍ଟ କିତି କାମାୟ୍ କାଜିଙ୍ଗ୍ ହେ ୱିଜୁ ବିଷୟତିଙ୍ଗ୍ ନଷ୍ଟନି ବିଷୟ ଇଞ୍ଜି ବାବିକିତାଙ୍ଗ୍। 8 ଆରେ ଆନେଙ୍ଗ୍ ନା ମାପୃ ଯୀଶୁ ଖ୍ରୀଷ୍ଟ ବିଷୟରେ ପୁନାକା ନେ ବେସି ଗାଜା ବିଷୟ। ଆନେଙ୍ଗ୍ ଇନେସ୍ ହାର୍ଦାଙ୍ଗ୍ ଖ୍ରୀଷ୍ଟଙ୍ଗ୍ ପୁଞ୍ଜେଙ୍ଗ୍ ଆଡ୍ନାଙ୍ଗ୍ ଆରେ ଲାଗାୟ୍ ମାହାଆଜି ମାଞ୍ଜେଙ୍ଗ୍ ଆଡ୍ନାଙ୍ଗ୍, ହେଦାଙ୍ଗ୍ କାଜିଙ୍ଗ୍ ହେ ୱିଜୁ ବିଷୟତିଙ୍ଗ୍ ନଷ୍ଟନି ବିଷୟ ଇଞ୍ଜି ବାବିକିତାଙ୍ଗ୍। ଆରେ ହେ ୱିଜୁ ବିଷୟ ଆନେଙ୍ଗ୍ ପିସ୍ତାଙ୍ଗ୍, ଆରେ ଆନେଙ୍ଗ୍ ହେ ୱିଜୁ ବିଷୟତିଙ୍ଗ୍ କାଚ୍ରାକୱାର୍ଲେକେ ମାନିକିତାଙ୍ଗ୍। 9 ଆନେଙ୍ଗ୍ ମୋଶା ନିୟମ୍ତିଙ୍ଗ୍ ମାନିକିନି କାଜିଙ୍ଗ୍ ଆନେଙ୍ଗ୍ ଦରମ୍ ମାନାୟ୍ ଆୱାତାଙ୍ଗ୍ନା, ମାତର୍ ଖ୍ରୀଷ୍ଟଙ୍ଗ୍ ପାର୍ତିକିନି କାଜିଙ୍ଗ୍ ଆନେଙ୍ଗ୍ ଦରମ୍ ମାନାୟ୍ ଆତାଙ୍ଗ୍ନା। ହେ ଦରମ୍ନି ବିଷୟ ଈଶ୍ୱର ହିତ୍ତାନ୍ନା। 10 ଇନେସ୍ ଖ୍ରୀଷ୍ଟ ହାଃଜି ଆରେରଗ ଜିବୁନ୍ଆନି ଶାକ୍ତିତିଙ୍ଗ୍, ଆରେ ହେୱାନ୍ ଇନେସ୍ ଦୁକ୍କଷ୍ଟ ପାୟାଆଜି ହାଃତାନ୍ନା ହେଲେକେ ଆନେଙ୍ଗ୍ ପା ଦୁକ୍କଷ୍ଟ ପାୟାଆଜି ହାଃଦେଙ୍ଗ୍, ଆନେଙ୍ଗ୍ ତା ବିଷୟରେ ଆଦିକ୍ ପୁଞ୍ଜେଙ୍ଗ୍ ଇଚା କିନାଙ୍ଗା। 11 ଇନେସ୍କି ଆନେଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ ଆଦେଙ୍ଗ୍ ଆଡ୍ନାଙ୍ଗ୍। ପୁରଷ୍କାର୍ ପାୟା ଆଦେଙ୍ଗ୍ ହନ୍ନାସ୍ 12 ଆନେଙ୍ଗ୍ ଇ ଲେକେ ୱେଚୁଙ୍ଗା ଯେ ଇ ୱିଜୁ ପାୟାଆତାଙ୍ଗ୍ନା କି ଈଶ୍ୱର ଇଚା କିତିଲେକେ ଆନେଙ୍ଗ୍ ଟିକ୍ ଆୱାତାଙ୍ଗ୍ନା। ମାତର୍ ନାଙ୍ଗେଙ୍ଗ୍ ଯୀଶୁ ଖ୍ରୀଷ୍ଟ ଇନାକାଦିଙ୍ଗ୍ ବାଚି କିତ୍ତାନ୍ନା ହେଦାଙ୍ଗ୍ ଜିତା ଆଦେଙ୍ଗ୍ ଆନେଙ୍ଗ୍ ହନ୍ନାଙ୍ଗା। 13 ଏ ନା ପାର୍ତିକିନି ଟଣ୍ଡାର୍କାଦେର୍, ହେଦାଙ୍ଗ୍ ଜିତା ଆତାଙ୍ଗ୍ନା ଇଞ୍ଜି ବାବିକିଉଙ୍ଗା। ମାତର୍ ର ବିଷୟ ଆନେଙ୍ଗ୍ କିନାଙ୍ଗା, 14 ଆଗେ ଇନକା ଗଟାଆଜି ମାଚାତ୍ ହେଦାଙ୍ଗ୍ତିଙ୍ଗ୍ ଆନେଙ୍ଗ୍ ବାଣା ଆଜି, ଆଗେ ଇନାକା ଗଟାଆନାତ୍ ହେ ବିଷୟତିଙ୍ଗ୍ ମାନ୍ଦିୟାନ୍ ହିନାଙ୍ଗା। ଆରେ ସରଗ୍ନି ପୁରଷ୍କାର୍ ଜିତାଆନି କାଜିଙ୍ଗ୍ ଆନେଙ୍ଗ୍ ହନ୍ନାଙ୍ଗା। ଯୀଶୁ ଖ୍ରୀଷ୍ଟ ନା କାଜିଙ୍ଗ୍ ହାଃତିଲେ ଈଶ୍ୱର ସରଗ୍ତାକେ ନାଙ୍ଗେଙ୍ଗ୍ ହିର୍ବାଆତ୍ତାନ୍ନା ଇଦାଙ୍ଗ୍ ଆନାତା ଗାଜା ପୁରଷ୍କାର୍। 15 ଲାଗିଙ୍ଗ୍ ଆସେଙ୍ଗ୍ ଏଚେଜାଣ୍ ବେସି ପାର୍ତି କିନାସା ଇ ଲେକେ ବାବିକିନି ଦର୍କାର୍। ଯଦି ମି ବିତ୍ରେତାଙ୍ଗ୍ ଇମ୍ଣାକାନ୍ ଜେକନିକା ବାବିକିନାନ୍, ହେୱାନିଙ୍ଗ୍ ଈଶ୍ୱର ସତ୍ ବିଷୟ ପୁଞ୍ଜେଙ୍ଗ୍ ସାଇଜ କିନାନ୍। 16 ଈଶ୍ୱର ମାଙ୍ଗେଙ୍ଗ୍ ଆଗେ ଇନାକା ଚଚ୍ଚାତାନ୍ନା, ଆସେଙ୍ଗ୍ ହେ ସତ୍ ବିଷୟ ଅନୁସାତାଙ୍ଗ୍ ଜିବୁନ୍ କାଟିକିନି ଦର୍କାର୍। 17 ଏ ନା ପାର୍ତିକିନି ଟଣ୍ଡାର୍କାଦେର୍, ଏପେଙ୍ଗ୍ ୱିଜାକାଦେର୍ ମାହାଆଜି ନା ଲେକେ ବ୍ୟବହାର୍ କିୟାଟ୍। ଆରେ ଇମ୍ଣାକାର୍ ନା ବ୍ୟବହାର୍ତିଙ୍ଗ୍ ମାନି କିନାରା ହେୱାର୍ ଲେକେ ଆଦେଙ୍ଗ୍ ମାନ୍ଦିୟାନ୍ ହିୟାଟ୍। 18 ଇନେସ୍କି ଖ୍ରୀଷ୍ଟ କୃଶକାଟ୍ତାକେ ହାଃନି କାତାତିଙ୍ଗ୍ ଶତ୍ରୁ ଲେକେ ଆଜି ବିରଦ୍ କିନି ମାନାୟାର୍ ମି ବିତ୍ରେ କେତ୍ଜାଣ୍ ମାନାର୍। ଆନେଙ୍ଗ୍ ହେୱାର୍ ବ୍ଯବାହାର୍ ବିଷୟରେ ଆଗେ ୱେଚ୍ଚି ମାନ୍ଞ୍ଚାଙ୍ଗ୍ ଆରେ ନଙ୍ଗୟ୍ ପା ଆଡ଼୍ବି-ଆଡ଼୍ବି ୱେଚ୍ଚାନାଙ୍ଗା। ହେୱାର୍ ଖ୍ରୀଷ୍ଟତି କୃଶକାଟ୍ନି ଶତ୍ରୁ। 19 ଈଶ୍ୱର ହେୱାରିଙ୍ଗ୍ ନଷ୍ଟ କିନାନ୍। ଇନେସ୍କି ହେୱାର୍ ତା ଗାଗାଡ଼୍ନି ଇଚାତାଙ୍ଗ୍ ଈଶ୍ୱର ଇଞ୍ଜି ମାନିକିନାର୍। ଆରେ ହେୱାର୍ ଅପ୍ମାନ୍ ବିଷୟତିଙ୍ଗ୍ ହାର୍ଦି ବିଷୟ ଇଞ୍ଜି ବାବିକିନାର୍। ଆରେ ହେୱାର୍ ପୁର୍ତିନି ବିଷୟ ନେ ବାବିକିନାର୍। 20 ମାତର୍ ଆପେଙ୍ଗ୍ ସରଗ୍ ଦେସ୍ତ ବାହାକିନି ମାନାୟ୍। ଆରେ ଆପେଙ୍ଗ୍ ସରଗ୍ତାଙ୍ଗ୍ ପୁର୍ତିତାକେ ୱାନି ମା ମାପୃ ଯୀଶୁ ଖ୍ରୀଷ୍ଟ ଉଦାର୍ କିଦ୍ନାକାନିଙ୍ଗ୍ ଆପେଙ୍ଗ୍ କାକୁଲ୍ତି ଆଜି କାତାପ୍ନା। 21 ହେୱାନ୍ତାକେ ଶାକ୍ତି ମାନାତ୍ ଆରେ ହେ ସାକ୍ତିତାଙ୍ଗ୍ ୱିଜୁ ବିଷୟତିଙ୍ଗ୍ ତା ତାରେନ୍ କିଜି ଇଟ୍ନାନ୍, ହେ ସାକ୍ତିତାଙ୍ଗ୍ ମା ଚିକ୍ଲାନି ଗାଗାଡ଼୍ତିଙ୍ଗ୍ ତା ଲେକେ ଗୌରବ କିଦ୍ନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation