ପିଲିପିୟ 1 - New Testament in Pengo Parja Languageଜୱାର୍ 1 ଆପେଙ୍ଗ୍, ପାଉଲ ଆରେ ତିମତି, ରିକାପ୍ ଯୀଶୁ ଖ୍ରୀଷ୍ଟନି ଦାସ୍। ଫିଲିପ ସହର୍ତାକେ ମାନି ଯୀଶୁ ଖ୍ରୀଷ୍ଟନି ୱିଜାକାର୍ ଈଶ୍ୱର ମାନାୟାର୍ ଲାଗାୟ୍, ବିଶପ୍ ଆରେ ମଣ୍ଡ୍ଲିତାକେ ହେବା କିନାକାର୍ ଲାଗାୟ୍ ଆନେଙ୍ଗ୍ ପାଉଲ ଇ ଚିଟି ଲେକିକିନାଙ୍ଗା। 2 ମା ଆବା ଈଶ୍ୱର ଆରେ ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଆଶ୍ରିବାଦ୍ କିଦେନ୍ ଆରେ ଶାନ୍ତି ହିଦେନ୍। ପାଉଲ ପାର୍ତାନା କିତାନ୍ 3 ଆନେଙ୍ଗ୍ ମିଙ୍ଗେଙ୍ଗ୍ ଏଚେହଟ୍ ଏତୁ କିଦ୍ନାଙ୍ଗ୍, ହେଏଚେହଟ୍ ନା ଈଶ୍ୱରତିଙ୍ଗ୍ ୱିଜୁଦିନ୍ ଦନ୍ଯବାଦ୍ ହିନାଙ୍ଗା। 4 ଇନେସ୍କି ହାର୍ଦିକାବୁର୍ ୱେନ୍ଞ୍ଜି ପାର୍ତିକିନି ପାର୍ତୁମ୍ ଦିନ୍ତାଙ୍ଗ୍ ଏପେଙ୍ଗ୍ ନାଙ୍ଗେଙ୍ଗ୍ ଯୀଶୁ ଖ୍ରୀଷ୍ଟ ବିଷୟରେ ଶୁଣାୟ୍ କିଦେଙ୍ଗ୍ ହାଙ୍ଗ୍ ଆତ୍ତାଦେର୍ନା। 5 ଲାଗିଙ୍ଗ୍ ଏଚେପାଦ୍ନା ଆନେଙ୍ଗ୍ ପାର୍ତାନା କିନାଙ୍ଗା ହେଚେପାଦ୍ନା ମି କାଜିଙ୍ଗ୍ ୱାରିଆଜି ପାର୍ତାନା କିନାଙ୍ଗା।। 6 ଇନେସ୍କି ଆନେଙ୍ଗ୍ ଆହା କିନାଙ୍ଗା, ଈଶ୍ୱର ମି ବିତ୍ରେ ହାର୍ଦି ବିଷୟ ଆରମ୍ କିତ୍ତାନ୍ନା, ଆରେ ହେଦାଙ୍ଗ୍ତିଙ୍ଗ୍ ହେୱାନ୍ ଯୀଶୁ ଖ୍ରୀଷ୍ଟ ୱାନିଦିନ୍ ପାତେକ୍ ଟିକ୍କିଜି ପୁରା କିନାନ୍। 7 ଆନେଙ୍ଗ୍ ମିଙ୍ଗେଙ୍ଗ୍ ଇ ଲେକେ ବାବି କିନାକା ଟିକ୍ ମାନ୍ଗାନାତ୍, ଆନେଙ୍ଗ୍ ଜଇଲ୍ ଇଞ୍ଜ ବନ୍ଦି ଆଜି ମାଚିସ୍ କି ହାର୍ଦିକାବୁର୍ ବିଷୟରେ ଜୁକ୍ତି ଆଜି ସତ୍ ଇଞ୍ଜି ପାର୍ମାଣ୍ କିନିହିଙ୍ଗ୍। ଏପେଙ୍ଗ୍ ଆରେ ଆନେଙ୍ଗ୍ ମାହାଆଜି ଯୀଶୁ ଖ୍ରୀଷ୍ଟ ବିଷୟରେ ଶୁଣାୟ୍ କିଦେଙ୍ଗ୍ ମାଙ୍ଗେଙ୍ଗ୍ ଈଶ୍ୱର ଦୟା କିତ୍ତାନ୍ନା। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମି ୱିଜାକାରିଙ୍ଗ୍ ବେସି ଲାଡ୍ କିଦ୍ନାଙ୍ଗା। 8 ଯୀଶୁ ଖ୍ରୀଷ୍ଟନି ଲାଡ୍ତାଙ୍ଗ୍ ମିଙ୍ଗେଙ୍ଗ୍ ମାହା ଆଦ୍ଦେଙ୍ଗ୍ ବେସି ଇଚା କିଦ୍ନାଙ୍ଗା ଇ ବିଷୟରେ ଈଶ୍ୱର ନେ ସାକି ଆନାନ୍। 9 ଆନେଙ୍ଗ୍ ମି କାଜିଙ୍ଗ୍ ଇ ପାର୍ତାନା କିନାଙ୍ଗା, ଜ୍ଞାନ୍ ଆରେ ବୁଦିତାଙ୍ଗ୍ ଏପେଙ୍ଗ୍ ଜାର୍-ଜାର୍ କାଜିଙ୍ଗ୍ ବେସି ଲାଡ୍ କିବା ଆଡ। 10 ଲାଗିଙ୍ଗ୍ ଏପେଙ୍ଗ୍ ୱିଜୁତାଙ୍ଗ୍ ହାର୍ଦି ବିଷୟତିଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍, ଆରେ ଖ୍ରୀଷ୍ଟ ଦିନ୍ତ ଏପେଙ୍ଗ୍ ଟିକ୍ ଆରେ ଇନା ଦସ୍ ପା ମିଙ୍ଗେଙ୍ଗ୍ ହିଲ୍ଗୁତ୍। 11 ମାର୍ ଇନେସ୍ ପାଡ଼୍ ଆହ୍ନାତ୍ ଏପେଙ୍ଗ୍ ପା ଯୀଶୁ ଖ୍ରୀଷ୍ଟ ସାଇଜତାଙ୍ଗ୍ ଦରମ୍ କାମାୟ୍ କିନାଦେର୍। ଏଲେଙ୍ଗ୍ ଆତିସ୍ ମାନାୟାର୍ ଈଶ୍ୱରତିଙ୍ଗ୍ ସନ୍ମାନ୍ ଆରେ ଜୟ୍-ଜୟ୍ କିନାର୍। ହାର୍ଦିକାବୁର୍ନି କାମାୟ୍ ବାଡାଆନି କାତା 12 ଏ ପାର୍ତିକିନି ଟଣ୍ଡାର୍କାଦେର୍ ମିଙ୍ଗେଙ୍ଗ୍ ଇବିଷୟ ୱେଚ୍ଚେଦେଙ୍ଗ୍ ଆନେଙ୍ଗ୍ ଇଚା କିନାଙ୍ଗା, ନାଙ୍ଗେଙ୍ଗ୍ ଇନାକା ୱିଜୁ ଗଟାଆତାତ୍ନା, ହେ ୱିଜୁ ହାର୍ଦିକାବୁର୍ କାମାୟ୍ ବାଡାଆନି କାଜିଙ୍ଗ୍ ଆତାତ୍ନା। 13 ଇନେସ୍କି ଆନେଙ୍ଗ୍ ଖ୍ରୀଷ୍ଟଙ୍ଗ୍ ହେବା କିନି କାଜିଙ୍ଗ୍ ବନ୍ଦି ଆତାଙ୍ଗ୍ ଇଞ୍ଜି, ମହା ରାଜା ମହଲ୍ତାକେ ମାନି ମାନାୟାର୍, ସେନାର୍ ଦଳ୍ ଆରେ ୱିଜାକାର୍ ପୁଚାର୍। 14 ଆରେ ଆନେଙ୍ଗ୍ ବନ୍ଦି ଆଜିମାଚି କାଜିଙ୍ଗ୍ ପାର୍ତିକିନି ଟଣ୍ଡାର୍ ଈଶ୍ୱରତାକେ ବେସି ପାର୍ତି କିତାର୍। ଆରେ ଈଶ୍ୱର କାତା ସାହାସ୍ ହୁଦାଙ୍ଗ୍ ଶୁଣାୟ୍ କିତାର୍। 15 କେତେକ୍ ମାନାୟାର୍ ନାଙ୍ଗେଙ୍ଗ୍ ଆକାର୍ ଆରେ ବିରଦ୍ ମାନ୍ କିଜି ଖ୍ରୀଷ୍ଟ ବିଷୟରେ ଶୁଣାୟ୍ କିନାରା, ମାତର୍ କେତେକ୍ ହେନି ନାଙ୍ଗେଙ୍ଗ୍ ସାଇଜ କିଦ୍ଦେଙ୍ଗ୍ ହାର୍ଦିକାବୁର୍ ଶୁଣାୟ୍ କିନାରା। 16 ଇ ମାନାୟାର୍ ନାଙ୍ଗେଙ୍ଗ୍ ଲାଡ୍ କିଦ୍ନାର୍, ଇନେସ୍କି ହାର୍ଦିକାବୁର୍ ବିଷୟରେ ଜୁକ୍ତି ଆଜି ସତ୍ ଇଞ୍ଜି ପାର୍ମାଣ୍ କିଦେଙ୍ଗ୍ ବାଚି କିୟାଆତାଙ୍ଗ୍ନା ଇଞ୍ଜି ହେୱାର୍ ପୁନ୍ଞ୍ଚାର୍ନା। 17 ମାତର୍ ନାଙ୍ଗେଙ୍ଗ୍ ଆକାର୍ ଆନି ମାନାୟ୍ ଜାର୍ ବିଷୟରେ ନେ ବାବିକିଜି ଖ୍ରୀଷ୍ଟ ବିଷୟତିଙ୍ଗ୍ ଶୁଣାୟ୍ କିନାରା। ଇନେସ୍କି ହେୱାର୍ ବନ୍ଦିତାକେ ମାନିହିଙ୍ଗ୍ ହେୱାର୍ ନାଙ୍ଗେଙ୍ଗ୍ କଷ୍ଟ ହିଦ୍ଦେଙ୍ଗ୍ ଇଚା କିନାରା। 18 ଇନାକା ଆତାତ୍ ଯେ? ଆକାର୍ ମାନ୍ତାଙ୍ଗ୍ ଆୟେତ୍ କି ହାର୍ଦି ମାନ୍ତାଙ୍ଗ୍ ଆୟେତ୍, ଇନେସ୍ କିଜି ପା ଆୟେତ୍ ଖ୍ରୀଷ୍ଟ ବିଷୟରେ ଶୁଣାୟ୍ କିୟିଆନାତା। ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ସତ୍ତାଙ୍ଗ୍ ୱାରି କିନାଙ୍ଗା, ଆଁ ୱାରି କିଜି ମାନାଙ୍ଗ୍। ଖ୍ରୀଷ୍ଟ କାଜିଙ୍ଗ୍ ଜିନାସ୍ 19 ଇନେସ୍କି ଆନେଙ୍ଗ୍ ପୁଚାଙ୍ଗ୍ନା ଯେ, ମି ପାର୍ତାନା ଆରେ ଯୀଶୁ ଖ୍ରୀଷ୍ଟ ପବିତ୍ର ଆତ୍ମା ସାଇଜତାଙ୍ଗ୍ ଇ ୱିଜୁ ନାଙ୍ଗେଙ୍ଗ୍ ଉଦାର୍ ପାୟା ଆଦେଙ୍ଗ୍ ସାଇଜ କିଦ୍ନାତ୍। 20 ଆନେଙ୍ଗ୍ ଇମ୍ଣି ବିଷୟରେ ପା ଲାଜା ଆଉଙ୍ଗ୍ ଇଞ୍ଜି ଆନେଙ୍ଗ୍ ବେସି ଇଚା ଆରେ ଆହା କିନାଙ୍ଗା। ମାତର୍ ଆନେଙ୍ଗ୍ ନଙ୍ଗୟ୍ ପାତେକ୍ ଇନେସ୍ ଶୁଣାୟ୍ କିନାଙ୍ଗା, ହେଲେକେ ନେ ସାହାସ୍ ହୁଦାଙ୍ଗ୍ ଖ୍ରୀଷ୍ଟ ବିଷୟରେ ୱେଚ୍ନାଙ୍ଗ୍। ଆନେଙ୍ଗ୍ ଜିତିସ୍ କି ହାଃତିସ୍ ପା ନା ଗାଗାଡ଼୍ତାଙ୍ଗ୍ ଖ୍ରୀଷ୍ଟଙ୍ଗ୍ ସନ୍ମାନ୍ କିୟିକିନାଙ୍ଗ୍। 21 ଇନେସ୍କି ଯଦି ଆନେଙ୍ଗ୍ ଜିନାଙ୍ଗ୍ ଖ୍ରୀଷ୍ଟ କାଜିଙ୍ଗ୍ ଜିନାଙ୍ଗ୍, ଯଦି ଆନେଙ୍ଗ୍ ହାଃନାଙ୍ଗ୍ ହେଦାଙ୍ଗ୍ ନା କାଜିଙ୍ଗ୍ ଲାବ୍ ଆନାତ୍। ଇନେସ୍କି ଆନେଙ୍ଗ୍ ଖ୍ରୀଷ୍ଟ ହୁଦାଙ୍ଗ୍ ମାହାଆଜି ମାନ୍ଗାନାଙ୍ଗ୍। 22 ଯଦି ଆନେଙ୍ଗ୍ ଜିଜି ମାନାଙ୍ଗ୍ ଖ୍ରୀଷ୍ଟ କାଜିଙ୍ଗ୍ ହାର୍ଦି କାମାୟ୍ କିଦେଙ୍ଗ୍ ଆଡ୍ନାଙ୍ଗ୍। ଲାଗିଙ୍ଗ୍ ଆନେଙ୍ଗ୍ ଇନାକାଦିଙ୍ଗ୍ ବାଚିକିନାଙ୍ଗ୍ ହେଦାଙ୍ଗ୍ ପୁଞ୍ଜେଙ୍ଗ୍ ଆଡୁଙ୍ଗା। 23 ଆନେଙ୍ଗ୍ ରିଣ୍ଡାଙ୍ଗ୍ ବିତ୍ରେ ଇନାକା ରଞ୍ଜାଙ୍ଗ୍ତିଙ୍ଗ୍ ବାଚିକିନାଙ୍ଗ୍ ହେଦାଙ୍ଗ୍ ପୁଞ୍ଜେଙ୍ଗ୍ ଆଡୁଙ୍ଗା, ଆନେଙ୍ଗ୍ ହାଃଜି ଖ୍ରୀଷ୍ଟ ହୁଦାଙ୍ଗ୍ ମାଞ୍ଜେଙ୍ଗ୍ ଇଚା କିନାଙ୍ଗା। ଇନେସ୍କି ଇଦାଙ୍ଗ୍ ୱିଜୁତାଙ୍ଗ୍ ବେସି ହାର୍। 24 ମାତର୍ ଆନେଙ୍ଗ୍ ଜିଜି ମାଚିସ୍ ନା ସାଇଜ ମିଙ୍ଗେଙ୍ଗ୍ ଦର୍କାର୍ ମାନାତ୍। 25 ଆନେଙ୍ଗ୍ ପୁରା ପାର୍ତି କିନାଙ୍ଗା ଯେ ଆନେଙ୍ଗ୍ ଜିଜି ମାନାଙ୍ଗ୍। ଆରେ ଆନେଙ୍ଗ୍ ମିଙ୍ଗେଙ୍ଗ୍ ପାର୍ତିତାଙ୍ଗ୍ ବାଡାଇକିନି କାଜିଙ୍ଗ୍ ଆରେ ମି ୱାରି କାଜିଙ୍ଗ୍ ମି ୱିଜାକାର୍ ହୁଦାଙ୍ଗ୍ ମାହାଆଜି ମାନାଙ୍ଗ୍। 26 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଆରେରଗ ମି ଲାଗାୟ୍ ୱାତିସ୍, ନା କାଜିଙ୍ଗ୍ ଯୀଶୁ ଖ୍ରୀଷ୍ଟତାକେ ଏପେଙ୍ଗ୍ ବେସି ପାର୍ତି କିନାଦେର୍। 27 ଖ୍ରୀଷ୍ଟନି ହାର୍ଦିକାବୁର୍ତିଙ୍ଗ୍ ପାର୍ତି କିଜି ମାନି ମାନାୟ୍ ଲେକେ ଟିକ୍ ଜିବୁନ୍ କାଟିକିୟାଟ୍। ଏପେଙ୍ଗ୍ ର ମାନ୍ଆଜି ମାନାଟ୍, ଆରେ ହାର୍ଦିକାବୁର୍ତିଙ୍ଗ୍ ପାର୍ତିକିଜି ମାନି କାଜିଙ୍ଗ୍ ଏକ୍ ଆଜି ଲଡ଼ିକିୟାଟ୍। ଆନେଙ୍ଗ୍ ମି ଲାଗାୟ୍ ୱାଜି ହୁଡ଼୍ତିସ୍ କି ମାନ୍ୱାଦାଙ୍ଗ୍ ମି ବିଷୟ ୱେଚିସ୍ ପା ଏଲେଙ୍ଗ୍ ଆଜି ମାନାଟ୍ ଇଞ୍ଜି ଆନେଙ୍ଗ୍ ଇଚା କିନାଙ୍ଗା। 28 ମିଙ୍ଗେଙ୍ଗ୍ ଇନା ବିଷୟରେ ପା ବିରଦ୍ କିଦ୍ନି ମାନାୟାରିଙ୍ଗ୍ ଏପେଙ୍ଗ୍ ପାଣ୍ଡ୍ରା ଆମାଟ୍। ମି ସାହାସ୍ ହେୱାର୍ କାଜିଙ୍ଗ୍ ନଷ୍ଟ ଆନି ଚିନା, ମାତର୍ ମି କାଜିଙ୍ଗ୍ ଈଶ୍ୱର ହିତ୍ତି ଉଦାର୍ ପାୟାଆନି ଚିନା। 29 ଇନେସ୍କି ଈଶ୍ୱର ମିଙ୍ଗେଙ୍ଗ୍ ଖ୍ରୀଷ୍ଟତାକେ ନେ ପାର୍ତି କିଦେଙ୍ଗ୍ ଦୟା ହିଦ୍ୱାତାନ୍ନା, ମାତର୍ ହେୱାନ୍ କାଜିଙ୍ଗ୍ ଦୁକ୍କଷ୍ଟ ସାମ୍ୱାଲି କିନି କାଜିଙ୍ଗ୍ ପା ମିଙ୍ଗେଙ୍ଗ୍ ଦୟା ହିତ୍ତାନ୍ନା। 30 ଏପେଙ୍ଗ୍ ନାଙ୍ଗେଙ୍ଗ୍ ଇନେସ୍ ଫିଲୀପି ସହର୍ତାକେ ଆଗେ ଲଡ଼ିକିନାକା ହୁଡ଼୍ଜି ମାନ୍ଞ୍ଚାଦେର୍, ଆରେ ନଙ୍ଗୟ୍ ଜଇଲ୍ ଇଞ୍ଜ ମାନ୍ଞ୍ଜି ପା ଲଡ଼ିକିନାକା ୱେନାଦେରା, ଏପେଙ୍ଗ୍ ପା ହେଲେକେ ଲଡ଼ିକିୟାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation