Daniel 3 - De Bibel JHF

De dree Mana em Fiaowen

¹ De Kjennich Nebukadnezar muak een Bilt von Golt: Siene Hecht 60 Ellen, siene Breed sas Ellen; hee recht daut opp en de Läacht Dura, enne Launtschoft Babel.

² Un de Kjennich Nebukadnezar schekjt ut, om de Satrapen, de Stauthoola un de Launtfläaja, de Bowarechta, de Schauzmeista, de Jesazesliera, de Rajchtsjelieede un aule Bowabeaumte de Launtschoften too vesaumlen, doamet see toom Enweie vom Bilt kjeemen, daut de Kjennich Nebukadnezar oppjerecht haud.

³ Doa vesaumelden sikj de Satrapen, de Stauthoola un de Launtfläaja, de Bowarechta, de Schauzmeista, de Jesazesliera, de Rajchtsjelieede un aule Bowabeaumte de Launtschoften toom Enweie vom Bilt, daut de Kjennich Nebukadnezar oppjerecht haud; un see stunden ver däm Bilt, daut Nebukadnezar oppjerecht haud.

⁴ Un de Herold roopt met Macht: Junt woat befoolen, jie Velkja, Nazionen un Sproaken:

⁵ Sooboolt jie däm Huarnklang, de Piep, de Zetta, de Hop, de Fleet, däm Duddelsack, un aulalei Oat von Musikj hieren woaren, sellen jie dolfaulen un daut goldne Bilt aunbäden, daut de Kjennich Nebukadnezar oppjerecht haft.

⁶ Un wäa nich dolfält un aunbäd, dee saul fuaz en däm brennenden Fiaowen jeschmäten woaren.

⁷ Doarom, sooboolt aule Velkja däm Huarnklang, de Piep, de Zetta, de Hop, de Fleet, un aulalei Oat von Musikj hieeden, follen aule Velkja, Nazionen un Sproaken dol, endäm see daut goldne Bilt aunbäden, daut de Kjennich Nebukadnezar oppjerecht haud.

⁸ Doawäajen kaumen to dee selje Tiet chaldeische Mana doatoo, dee de Juden aunzeijde.

⁹ See fungen aun un säden toom Kjennich Nebukadnezar: Oo Kjennich, läw eewichlich!

¹⁰ Du, oo Kjennich, hast däm Befäl jejäft, daut aulemaun, dee däm Huarnklang, de Piep, de Zetta, de Hop, de Fleet un däm Duddelsack, aulalei Oat von Musikj hieren woaren, dolfaulen un daut goldne Bilt aunbäden sellen;

¹¹ un wäa nich dolfält un aunbäd, dee saul en däm brennenden Fiaowen jeschmäten woaren.

¹² Daut sent judische Mana hia, dee du äwa de Vewaultunk de Launtschoft Babel bestalt hast: Sadrach, Mesach un Abednego; dise Mana, oo Kjennich, achten nich opp die; diene Jetta deenen see nich, un daut goldne Bilt, daut du oppjerecht hast, bäden see nich aun.

¹³ Doa befool Nebukadnezar em Jrim un Oaja, Sadrach, Mesach un Abednego doahan to brinjen. Doa worden dise Mana ver däm Kjennich jebrocht.

¹⁴ Nebukadnezar funk aun un säd to an: Es daut Aufsecht, Sadrach, Mesach un Abednego, daut jie miene Jetta nich deenen (ieren) un daut goldne Bilt nich aunbäden, daut ekj oppjerecht ha?

¹⁵ Nu, wan jie reed sent, too Tiet, doa jie däm Huarnklang, de Piep, de Zetta, de Hop, de Fleet un däm Duddelsack, un aulalei Oat von Musikj hieren woaren, doltofaule un daut Bilt auntobäden, daut ekj jemoakt ha -; oba wan jie daut nich aunbäden, sell jie fuaz en däm brennenden Fiaowen jeschmäten woaren; un wäa es dee Gott, dee junt ut miene Haunt raden woat?

¹⁶ Sadrach, Mesach un Abednego auntwuaden un säden to däm Kjennich: Nebukadnezar, wie hoolen daut nich fa needich, die een Wuat doaropp too auntwuaden.

¹⁷ Auf ons Gott, däm wie deenen, ons ut däm brennenden Fiaowen raden kaun - un hee woat ons ut diene Haunt, oo Kjennich, raden -

¹⁸ ooda wan nich, daut saust du weeten, oo Kjennich, daut wie diene Jetta nich deenen (ieren) un daut goldne Bilt, daut du oppjerecht hast, nich aunbäden woaren.

¹⁹ Doa wort Nebukadnezar voll Oaja, un daut utseenen von sienem Aunjesecht veendat sikj jäajen Sadrach, Mesach un Abednego. Hee funk aun un befool, däm Owen säwen Mol mea too hette, aus toom Hette needich wia.

²⁰ Un hee befool Mana, de stoakjste Mana en sienem Häa, Sadrach, Mesach un Abednego too binjen, om an en däm brennenden Fiaowen too schmieten.

²¹ Doa worden dise Mana en äare Mauntel, Rakj un Metse un äare Kjleeda jebungen un en däm brennenden Fiaowen jeschmäten.

²² Doarom, wiels daut Wuat vom Kjennich strenj, un de Owen butajeweenlich jehett wia, de Fiaflaumen brochten jane Mana om, dee Sadrach, Mesach un Abednego doahan brochten.

²³ Un dise 3 Mana, Sadrach, Mesach un Abednego, follen jebungen en däm brennenden Fiaowen.

²⁴ Doa erschrakjt de Kjennich Nebukadnezar, un hee stunt schwind opp, funk aun un säd to siene Rotjäwa: Ha wie nich 3 Mana jebungen em Fia jeschmäten? See auntwuaden un säden to däm Kjennich: Jewess, oo Kjennich!

²⁵ Hee auntwuad un säd: Kjikj, ekj see 4 Mana frie medden em Fia waundlen, un kjeene Vebrennunk es aun an; un daut utseenen vom vieeden es aus een Sän de Jetta.

²⁶ Doa jinkj Nebukadnezar aun de Opninj von brennenden Fiaowen, funk aun un säd: Sadrach, Mesach un Abednego, jie Kjnajchts vom hechsten Gott, got rut un komt häa! Doa jinjen Sadrach, Mesach un Abednego ut däm Fia rut.

²⁷ Un daut vesaumelden sikj de Satrapen, de Stauthoola un de Launtfläaja un de Rotjäwa vom Kjennich; see sagen dise Mana, daut det Fia kjeene Macht äwa äare Liew jehaut haud: Daut Hoa opp äarem Haupt wia nich vesenjt, äare Rakj wieren nich veendat, un de Jeroch vom Fia wia nich aun an jekomen.

²⁸ Nebukadnezar funk aun un säd: Jepreist (veharlicht) es dee Gott Sadrachs, Mesachs un Abednegos, dee sienen Enjel jeschekjt un siene Kjnajchts jerat haft, dee opp am vetruden un daut Wuat det Kjennichs äwasteaje un äare Liew doahan jeewen, om kjeenem Gott to deenen noch am auntobäden, aus blooss äarem Gott!

²⁹ Un von mie woat Befäl jejäft, daut jiedret Volkj, jiedre Nazion un Sproak - wäa Orrajcht räd jäajen däm Gott Sadrachs, Mesachs un Abednegos, en Stekja vehackt, un daut sien Hus to eenem Mellhupe jemoakt woat; wiels daut kjeenen aundren Gott jeft, dee opp soo eene Oat raden kaun.

³⁰ Doaropp befodad de Kjennich Sadrach, Mesach un Abednego en de Launtschoft Babel.

Wäajens Nebukadnezar sien Huachmoot wort hee raufjesat

³¹ Nebukadnezar, de Kjennich, aule Velkja, Nazionen un Sproaken, dee opp de gaunze Ieed wonen: Fräd junt vollopp!

³² Daut haft mie jefollen, (äwa) de Tieekjen un Wunda to berechten, dee de hechsta Gott aun mie jedonen haft.

³³ Woo groot sent siene Tieekjen, un woo majchtich siene Wunda! Sien Rikj es een eewjet Rikj, un siene Harschoft es von Jeschlajcht to Jeschlajcht!