فِلِپّیوں 4 - پنجابی نواں عہد نامہ نظرثانی شدہ چھپائی

ہدایات

¹ ایس لئی میرے پیارے بھراؤ! جِنہاں دی مَینُوں چاہ اے۔ تے جیہڑے میری خُوشی تے تاج ہو۔ میرے پیاریو! خُداوند وِچ پکّے رہو۔

² مَیں یُوؤدیہ نُوں وی نصِیحت کرنا آں تے سنُتخے نُوں وی پئی اوہ خُداوند وِچ اِک دِل ہون۔

³ ہَلا اَے میرے سَچّے ساتھی تیرے اگّے وی عرض کرنا آں۔ پئی تُوں اوہناں زنانِیاں دی مدد کر کیوں جو اوہناں میرے نال خُوشخبری سُنان وِچ کلیمینس تے میرے اوہناں باقی ساتھِیاں سَنے جان مار کے محنت کِیتی۔ جِنہاں دے ناں زِندگی دی کتاب وِچ لِکھے ہوئے نیں۔

⁴ خُداوند وِچ ہرویلے خُوش رہو۔ فیر آکھنا آں۔ پئی خُوش رہو۔

⁵ تُہاڈی نرم دِلی ساریاں اُتّے ظاہر ہوئے۔ خُداوند نیڑے اے۔

⁶ کِسے گلّ دی فِکر نا کرو۔ سگوں سارِیاں گلّاں وِچ دُعا تے مِنّت کر کے اپنیاں عرضاں شُکر گُزاری نال خُدا دے اگّے کرو۔

⁷ تے خُدا دی تسلّی جیہڑی سمجھ توں بالکل باہر اے۔ تُہاڈے دِلاں تے خیالاں دی مسِیح یِسُوع وِچ رکھوالی کرے گی۔

⁸ بھراؤ! ہور ایہہ گلّ اے جیہڑیاں گلّاں سَچیاں نیں جیہڑیاں عِزّت جوگیاں نیں جیہڑیاں نیک نیں۔ جیہڑیاں سُدّھ نیں۔ جیہڑیاں پیاریاں نیں۔ جیہڑیاں بھلیاں نیں۔ جیہڑیاں گُن دِیاں نیں تے جیہڑیاں تعرِیف دِیاں نیں اوہناں اُتّے دھیان رکھو۔

⁹ جیہڑیاں گلّاں تُساں مَیتھوں سِکھیاں تے پائیاں تے سُنیاں تے میرے وِچ ویکھیاں نیں اوہناں اُتّے عمل کرو۔ تے جیہڑا تسلّی دا خُدا اے۔ تُہاڈے نال رہے گا۔

امداد دے لئی شُکریہ

¹⁰ مَیں خُداوند وِچ بُہت خُوش آں۔ پئی اینے چِر پِچّھوں تُساں مُڑ میرا خیال کِیتا۔ آں پہلاں وی تُہانوں ایہدا خیال سی۔ پر موقع نا مِلیا۔

¹¹ مَیں ایس لئی نئیں آکھدا کہ مَینُوں لوڑ ایہہ۔ کیوں جو مَیں ایہہ سِکھیا اے۔ پئی جیہڑے حال وِچ ہوواں اوسے وِچ راضی رہواں۔

¹² مَیں گھٹناں وی جاننا آں تے وَدھنا وی۔ سارِیاں گلّاں تے ہر حالت وِچ مَیں رجناں تے بُھکھیاں رہنا تے وَدھنا گھٹنا سِکھ لیا اے۔

¹³ جیہڑا مَینُوں طاقت دیندا اے اوہدے سببّوں مَیں سبھ کُجھ کر سکنا آں۔

¹⁴ فیر وی تُساں چَنگا کِیتا۔ پئی میری تنگی وِچ تُساں میرا ساتھ دِتّا۔

¹⁵ تے فِلِپّیو! تُسی آپ وی جان دے ہو۔ پئی خُوشخبری دے شُروع وِچ جد مَیں مَکِدُنیہ وِچوں ٹُرپیا۔ تُہاڈے باہجوں کِسے کلِیسیا لین دین وِچ میری مدد نا کِیتی۔

¹⁶ تھِسّلُنِیکے وِچ میری تُھڑ پُوری کرن لئی اِکّو واری نئیں سگوں دو واری کُجھ گھلّیا۔

¹⁷ ایہہ نئیں پئی اِنعام منگنا آں پر اجیہا پَھل چاہناں آں۔ جیہڑا تُہاڈے لیکھے وِچ وَدّھ ہو جائے۔

¹⁸ میرے کول سبھو کُجھ اے۔ سگوں بُہت وَدّھ اے۔ تُہاڈیاں گھلّیاں ہویاں شیواں اِپفُردِتُس دے ہتھّوں لے کے مَیں رَجّ گیا آں۔ اوہ اِک خُوشبوئی تے اجیہی قُربانی نیں۔ جیہڑی قبول ہوئی تے خُدا نُوں پسند اے۔

¹⁹ میرا خُدا اپنی دَولت دے سببّوں مسِیح یِسُوع وِچ تُہاڈی ہر اِک تُھڑ اپنے جلال نال پُوری کرے گا۔

²⁰ ساڈے خُدا تے باپ دی وڈیائی سدا تِیکر ہوندی رہے۔ آمِین۔

اخِیر تے سلام

²¹ ہر اِک پاک نُوں جیہڑا مسِیح یِسُوع وِچ اے۔ سلام آکھو۔ جیہڑے بھرا میرے نال نیں تُہانوں سلام آکھدے نیں۔

²² سارے پاک لوک خاص کر قَیصر دے گھر والے تُہانوں سلام آکھدے نیں۔

²³ خُداوند یِسُوع مسِیح دا فضل تُہاڈی رُوح دے نال رہے۔