Марк 9 - Од Вейсэньлув 2006

¹ Иисус мерсь тенст: «Видестэ кортан тенк: конат-конат тесэ аштицятнень эйстэ куломо а кенерить, кода несызь Пазонь Инязорксчинь самонть весе вийсэнзэ».

Иисусонь лиякстомась

² Кото чинь ютазь Иисус саинзе мартонзо Петрань, Яковонь ды Иоаннонь, кустинзе сынст сэрей пандо пряс, косо ульнесть ськамост. Тосо икелест Сон лиякстомсь.

³ Оршамопелензэ теевсть кувтолдыцякс, пек ашокс, теке лов, конат масторлангсо кодамояк ашолгавтыцянень истя а ашолгавтовить.

⁴ Лиссть тенст Илия марто Моисейть, конат кортасть Иисус марто.

⁵ Сестэ Петра мерсь Иисуснэнь: «Тонавтыця! Кода паро миненек тесэ улемс. Эрьга, тейтяно колмо кудынеть: вейкенть Тонеть, вейкенть Моисейнень, вейкенть Илиянень».

⁶ Эдь сон сонськак эзь сода, мезть кортамс, эдь сынь пек тандадозельть.

⁷ Лиссь пель, вельтинзе сынст, ды пеленть потсто каятотсь вайгель: «Те Монь вечкевикс Цёрам, кунсолодо Сонзэ».

⁸ Тонавтницятне сеске варштасть пертьпельга, киньгак ваксстост, Иисусто башка, эзть нее.

⁹ Пандонть прясто валгомсто Иисус кармавтсь тенст: «Киненьгак илядо ёвтне неезденть Ломантнень Цёранть кулозьстэ вельмемазонзо».

¹⁰ Сынь Иисусонь валтнэнь кирдсть мельсэст, ды эсь ютковаст кортнесть, мезе те кулозьстэ вельмемась.

¹¹ Мейле тонавтницянзо кевкстизь сонзэ: «Мекс Койс тонавтыцятне кортыть, васняяк эряви самс Илиянень?»

¹² Сон мерсь каршост: «Те виде, Илиянень васняяк эряви самс ды весементь аравтомс эсь тарказонзо. Ломантнень Цёрантень, кода сёрмадозь Сонзэ эйстэ, ламо сави пиштемс ды кирдемс нарьгамот.

¹³ Ансяк кортан тенк: Илиясь сакшнось, ды ломантне тейсть мартонзо эсест мелест коряс, кода ёвтазельгак пазмарицятнень вельде».

Аванькс оймеялтсо колазь цёрынень шумбралгавтомась

¹⁴ Мейле Иисус сась лия тонавтницянзо ваксс, несь перькаст ламо ломанть ды Койс тонавтыцят, конат пелькстасть мартост.

¹⁵ Иисусонь неезь, весе ломантне дивазь капшазевсть каршозонзо, шумбракстнесть мартонзо.

¹⁶ Сон кевкстинзе Койс тонавтыцятнень: «Мезень кувалма тесэ пелькстамось?»

¹⁷ Ломантнень ютксто вейкесь мерсь каршонзо: «Тонавтыця, мон ветякшныя Теть цёрам, сонзэ эйсэ аванькс оймеялт, кона теизе акортыцякс.

¹⁸ Косто а кундасы сонзэ, ёртсы масторов, сон карми човонь нолдамо, пейсэнзэ чикордомо, весе чувтоми мик. Мон вешинь Тонь тонавтницятнень пельде панемс аванькс оймеялтонть, ансяк эзь паневе тенст».

¹⁹ Сон мерсь каршозонзо: «Вай, неень пингень акемиця ломанть! Зярс Монень эряви улемс тынк марто? Зярс Тень кирдемс коронк? Ветинк цёрыненть Монень».

²⁰ Ветизь сонзэ Иисуснэнь. Аванькс оймеялтсо колазесь ансяк неизе Сонзэ, оймеялтось сеске цёрыненть рестедизе: сон прась масторов, кеверькшнесь ды пансь човт.

²¹ Иисус кевкстизе тетянзо: «Умок-аволь истямокс теевсь?» Сон ёвтась: «Эйкакш пингестэ.

²² Сонзэ ёмавтомань кисэ аванькс оймеялтось ламоксть кайсизе толскак, натой ведьскак. Бути саты виеть мезеяк теемс, ульть седеймарикс, лездак тенек».

²³ Иисус мерсь тензэ: «Бути саты виеть теемс»? «Весемесь тееви сенень, кие кеми».

²⁴ Эйкакшонть тетязо сеске сельведь марто серьгедсь: «Кеман, Азоро! Лездак монь кемеманть виензамо!»

²⁵ Зярдо Иисус несь, промить седеяк ламо ломанть, кардызе аванькс оймеялтонть, мерсь: «Тон акортыцякс ды амарицякс теиця оймеялт! Кортан теть: лиссть эйстэнзэ ды икелепелев зярдояк иля совсе эйзэнзэ».

²⁶ Оймеялтось серьгедезь, цёрыненть пек сорновтозь, лиссь. Цёрынесь теевсь теке кулозекс, ламот мик кортасть, сон кулось.

²⁷ Иисус саизе кедте, кепедизе сонзэ, ды сон стясь.

²⁸ Мейле, зярдо Иисус совась кудос, ды кадовсь тонавтницянзо марто ськамонзо, сынь кевкстизь Сонзэ: «Мекс миненек оймеялтось эзь паневе?»

²⁹ Сон ёвтась тенст: «Истямо оймеялтось кодаяк лиякс а паневи, ансяк озномасо ды постонь кирдемасо».

³⁰ Иисус ды тонавтницянзо кадызь те тарканть ды тусть Галилеянь трокс. Сонзэ ульнесь мелезэ, кияк теде аволь сода,

³¹ эдь Сонензэ эрявсь тонавтомс тонавтницянзо. Сон кортась тенст: «Ломантнень Цёрась ули максозь-миезь ломантнень кедь алов, маштсызь Сонзэ, ды маштомадо мейле колмоце чистэ Сон кулозьстэ вельми».

³² Ансяк сынь эзизь чарькоде неть валтнэнь смустест, кевкстнемензэ жо пельсть.

Кие весемеде покш?

³³ Иисус сась Капернаум ошс. Зярдо Сон ульнесь тонавтницянзо марто кудосо, кевкстинзе сынст: «Мезде тынь ки лангсо эсь юткованк кортыде?»

³⁴ Сынь чатьмонсть: ки лангсо сынь эсь ютковаст пелькстасть – кие эйстэст весемеде покшось.

³⁵ Иисус озась, тердинзе кемгавтовонест, мерсь тенст: «Кинь мелезэ покшокс улемс, се улезэ весемеде вишкине ды весенень урекс».

³⁶ Мейле Иисус сайсь эйкакш, аравтызе тонавтницянзо куншкас, кутмордызе ды кортась тенст:

³⁷ «Кие саи эстензэ Монь лемем кисэ вейке истямо эйкакш, се Монь сайсамам. Кие Монь сайсамам, се аволь ансяк Монь, Кучицямгак сайсы».

Кие аволь минек каршо, се минек кисэ

³⁸ Иоанн каршонзо мерсь: «Тонавтыця! Минь неинек ломань, кона Тонь лемсэ идемевсть панси, ансяк сонсь мартонок а яки. Минь кардынек сонзэ, мекс сон минек марто а яки».

³⁹ Иисус мерсь: «Илинк карда сонзэ: кие Монь лемсэ тамашат теи, сенень Мондень берянь вал а ёвтави.

⁴⁰ Кие аволь тынк каршо, се тынк кисэ.

⁴¹ Кемеде Монень: кие максы тенк ведь кече секс, мекс тынь Христосонь, се питнень пандомавтомо а кадови.

⁴² А вана кие совавты пежетьс куш вейкешка неть Монень кемиця вишкинетнень-асодавикстнэнь ютксто, сенень седе паро улевель, поводевельть кирьгазонзо яжамо покш кев ды ёртовлизь иневедьс.

⁴³ Бути тонь кедеть совавты эйсэть пежетьс, керик сонзэ. Ве кедтеме пингеде пингень эрямонтень совамось ули теть седе паро, кавто кедь марто тоначинь амадниця толс ёртомадонть,

⁴⁴ косо сынст сэви суксосткак а кулыть ды толоськак а мадни.

⁴⁵ Бути тонь пильгеть совавты эйсэть пежетьс, керик сонзэ. Ёколдозь пингеде пингень эрямонтень совамось ули теть седе паро, кавто пильге марто тоначинь амадниця толс ёртомадонть,

⁴⁶ косо сынст сэви суксосткак а кулыть ды толоськак а мадни.

⁴⁷ Бути тонь сельметь совавты эйсэть пежетьс, таргик сонзэ. Ве сельме марто Пазонь Инязорксчинтень совамось ули теть седе паро, кавто сельме марто тоначинь амадниця толс ёртомадонть,

⁴⁸ косо сынст сэви суксосткак а кулыть ды толоськак а мадни.

⁴⁹ Эрьвась салтови толонь пачк ютазь ды эрьва аноксоськак салтови салсо.

⁵⁰ Салось лезэв, ёмавтындерясы вана сон растонзо, сестэ кода тейсак одов саловокс? Ванстынк эсенк эйсэ салонть ды эрядо ялгаксчисэ эсь юткованк».