Марк 8 - Од Вейсэньлув 2006

Ниле тёжань андома

¹ Неть читнестэ, зярдо промсть вельть ламо ломанть, ды а мезде ульнесь сыненст ярсамс, Иисус тердинзе эстензэ тонавтницянзо ды мерсь тенст:

² «Седеем сянгорды ломантнень кисэ. Сынь натой колмо чить аштить Монь вакссо, ярсамс тенст а мезде.

³ Нолдындерясынь вачодо кудов, лавшомить ки лангсо, конат-конат эйстэст васолдо састь».

⁴ Тонавтницянзо кортасть каршонзо: «Кие тесэ, чаво таркасо, сынст андомс муи кшить?»

⁵ Сон кевкстинзе сынст: «Зяро тынк кшинк?» Сынь мерсть: «Сисем».

⁶ Иисус кармавтынзе ломантнень ойсеме мода лангс. Саинзе сисем кшитнень, ёвтась Пазонтень сюкпря, синтринзе ды максынзе эсь тонавтницянстэнь явшемс. Сынь явшизь ломантненень.

⁷ Ульнесть сынст зярыя вишкине калнэсткак. Иисус чанстинзе-баславинзе, сынсткак мерсь явшемадо.

⁸ Ломантне ярсасть пешкедемазост, кадовозь сускомотнеде пурнасть сисем кептереть.

⁹ Ярсыцятнеде ульнесть тосо нилешка тёжа. Иисус нолдынзе ломантнень.

¹⁰ Сонсь сеске тонавтницянзо марто озась венчес ды тусь Далманутань ёнксов.

Иисусонь пельде тешксэнь вешема

¹¹ Тосо Иисуснэнь састь фарисейтне, кармасть мартонзо пелькстамо ды Сонзэ снартнемань-варчавтнемань кисэ вешсть невтемс менельстэ тамашань тешкс.

¹² Сон, кувакасто укстазь, мерсь: «Мезень кисэ неень пингень ломантне вешить тешкс? Видестэ мерян тенк, сыненст тешкс максозь а ули».

¹³ Сон кадынзе сынст тоско, таго озась венчес ды тусь эрькенть омбоце чирев.

Иродонь ды фарисеень чапавтомась

¹⁴ Тонавтницянзо стувтсть мартост саемс кши, венчсэнть ульнесь мартост ансяк вейке сюкоро.

¹⁵ Иисус кармавтсь тенст: «Ванодо, ванстодо прянк фарисеень ды Иродонь чапавтомадонть*».

¹⁶ Тонавтницятне кортасть теде эсь ютковаст: «Улема, те ёвтазь секс, мекс минек марто арась кши?»

¹⁷ Иисус содась, мезде сынь кортасть, мерсь тенст: «Мекс кортнетядо кшинь аразденть? Арази тынь нейгак яла а чарькодтядо ды а нетядо? Арази кевензазь яла седеенк?

¹⁸ Сельме мартояк а нетядо? Пиле мартояк а марятадо? Нать мельсэнккак а ашти:

¹⁹ Зярдо Мон вете кшить синтринь вете тёжанень, зяро пешксе куйметь тынь пурныде кадовозь сускомотнеде?» Ёвтасть тензэ: «Кемгавтово».

²⁰ «Зярдо сисем кшисэ ниле тёжат андынь, зяро кептереть тынь пурныде кадовозь сускомотнеде?» Мерсть: «Сисем».

²¹ «Кода эно тынь а чарькодтядо?» – Иисус таго кевкстинзе.

Бетсаидасо сокоронь шумбралгавтомась

²² Сынь састь Бетсаидас. Тосо ветясть Иисуснэнь сокор, энялдсть путомс лангозонзо кедензэ.

²³ Иисус сокоронть саизе кедте, ливтизе сонзэ велестэнть, сельгинзе сельмензэ, путынзе лангозонзо кедензэ, кевкстизе сонзэ: «Неят-арась мезеяк?»

²⁴ Сон варштась ды мерсь: «Неян ломанть, конат теке чувтт, ансяк сынь ютыть».

²⁵ Иисус таго путынзе кедензэ сельмензэ лангс, ды кармавтсь тензэ варштамс. Сон пичкась, кармась весень ваньксстэ нееме.

²⁶ Мейле Иисус кучизе сонзэ кудов, кармавтсь: «Велентень иля совсе ды киненьгак велесэ теде иля ёвтне».

Петрань видькстамозо

²⁷ Иисус тусь тонавтницянзо марто Филипень Кесариянь перька велетнес. Ки лангсо Сон кевкстинзе Эсь тонавтницянзо: «Киекс ловить Монь эйсэ ломантне?»

²⁸ Сынь мерсть каршозонзо: «Веенст Нававтыця Иоаннокс, омбонст Илиякс, лият пазмарицятнень эйстэ вейкекс».

²⁹ Сон кевкстинзе сынст: «Вана тынь киекс Монь ловсамизь?» Петра мерсь каршозонзо: «Тон Пазонь кучовт Идицят».

³⁰ Сестэ Сон кардынзе сынст, киненьгак теде ёвтнемадо.

Иисус ёвты икелев пиштемадонзо ды вельмемадонзо

³¹ Мейле Иисус кармась тонавтомо эйсэст, кода Ломантнень Цёрантень ламо сави пиштемс. Прявтнэ, попонь покштнэ, Койс тонавтыцятне велявтыть Эйстэнзэ. Сон карми улеме маштозь, ансяк мейле колмоце чистэ Сон кулозьстэ вельми.

³² Теде Сон видьстэ ёвтнесь. Сестэ Петра тердизе Сонзэ ве ёнов, кармась каршонзо кортамо.

³³ Иисус велявтсь ды варштась тонавтницятнень лангс, Петрань кардазь, мерсь: «Оргодть Монь вакссто, Сатана! Тонь арсемат ломанень пельде, аволь Пазонь пельде».

³⁴ Мейле тердинзе ломантнень тонавтницянзо марто, мерсь тенст: «Кинь ули мелезэ молемс Монь мельга, се стувтозо эсь прянзо, саезэ эсь крёстонзо ды молезэ мельган.

³⁵ Кинь ули мелезэ эсь эрямонзо ванстомс, се ёмавтсы сонзэ. Кие жо ёмавтсы эсь эрямонзо Монь ды Евангелиянть кисэ, се ванстсы сонзэ.

³⁶ Кодамо лезэ ули ломанентень, бути сон сайсы эстензэ весе масторлангонть, теке марто вана эрямонзо ёмавтсы?

³⁷ Эли кодамо питне мейле максы ломанесь эсь эрямонзо идемань-рамамонь кисэ?

³⁸ Визделгадындеряй кияк Монь эйстэ ды Монь валтнэде неть авидечисэтнень ды пежетев неень пингень ломантнень икеле, седе визделгады Ломантнень Цёраськак, зярдо Сон сы Эсь Тетянзо инексчисэ иневанькс ангелтнэнь марто».