Марк 7 - Од Вейсэньлув 2006

Пазонь кармавтовкстнэ ды ломанень койтне-кирдатне

¹ Фарисейтне ды конат-конат Койс тонавтыцятне састь Ерусалимстэ ды пурнавсть Иисусонь перька.

² Сынь неизь, кода конат-конат Сонзэ тонавтницятнень ютксто ярснить аванькс кедьсэ эли кедень апак шля, ды мурнизь-коризь тень кисэ.

³ Тевесь сеньсэ, фарисейтне ды весе лия еврейтне, покштянь койтнень-кирдатнень кирдезь, а озыльть ярсамо ваньксстэ кедест апак шля.

⁴ Базарсто кандозь ярсамопельдентькак апак шля а ярснить. Ламо лия койтькак сынь топавтнесть, кода ваканонь, кечень ды пижестэ теезь лия кирдемапелень ды озамотаркань шлякшноманть.

⁵ Фарисейтне Койс тонавтыцятнень марто кевкстизь Иисусонь: «Мекс Тонь тонавтницятне минек покштянь койтнень-кирдатнень а ванстыть, ярснить кедень апак шлякшно?»

⁶ Иисус мерсь каршост: «Парсте тынк ланга, чачонь полавтницят, Исайя пазмарицясь икелев ёвтась, кода сёрмадозь: “Неть ломантне валсост ловить Эйсэнь, ансяк седеест васоло аштить Монь эйстэ.

⁷ Сынь стяко сюконить Монень, эдь сынь тонавтыть ломанень теевть кармавтовкстнэнень, теке Монсетненень”.

⁸ Тынь кадынк Пазонь кармавтовксонть, кирдтядо ансяк ломанень теевть койтнень-кирдатнень, кода ваканонь, кечень шлякшномат ды лияткак ламо тень кондят тейнетядо».

⁹ Сон поладсь тенст: «Тынь маштадо колсто полавтомо Пазонь кармавтовксонть эсенк теевть койсэ-кирдасо!

¹⁰ Моисей ёвтызе тенк: “Ловт ломанькс тетять-авать”, ды “Кие покорды тетянзо эли аванзо, сенень кулома”.

¹¹ А вана тынь кортатадо, кие мериндеряй тетянстэнь эли аванстэнь: “Мезе тонь туртов эряволь максомс монь пельде – се корбан*, лиякс меремс, – Пазнэнь максыя”.

¹² Истя теньсэ тынь а мертядо ломантненень мезеяк теемс эсь тетяст-аваст туртов.

¹³ Вана истя тынь Пазонь валонть полавтнесынк тынсенк теевть койсэ-кирдасо ды лияткак ламо тень кондят тейнетядо».

Ванькс ды аванькс

¹⁴ Иисус тердинзе весе ломантнень, кортась тенст: «Кунсолодо Монь эйсэ весе ды чарькодеде.

¹⁵ Мезеяк истямо, кона сови ломаненть потс ушосто, аваньксэкс а тейсы сонзэ; аваньксэкс тейсы сонзэ се, мезе лиси ломаненть эйстэ.

¹⁶ Кинь улить мариця пилензэ, – кунсолозо».

¹⁷ Зярдо Иисус ломантнень вакссто совась кудос, тонавтницянзо кевкстизь Сонзэ те валвелявксонть смусттензэ.

¹⁸ Сон мерсь тенст: «Нать тыньгак истят а чарькодицят! Нать а чарькодтядо: мезе ушосто сови ломаненть потс, сенень сон кодаяк аваньксэкс а тееви?

¹⁹ Се сови аволь седеезэнзэ, сови пекезэнзэ, косто мейле ёртови ушов». Теньсэ Иисус яволявтызе весе ярсамопеленть ваньксэкс.

²⁰ Иисус поладсь: «Мезе ломаненть эйстэ лиси, ансяк се аваньксэкс ломаненть теи.

²¹ Эдь потсто, ломаненть седейстэ, тукшныть апаро арсемат, ускурямот-усксевемат, ломанень маштомат,

²² саламот, сюпавчис правтомат, кежть, манчема, визькс тевть, сельмень сявадома, сялдомат-покордамот, эсь прянь верьга кандома, пеляскалема-ормазкалема.

²³ Весе неть зыянтнэ потсто лисить ды теить ломаненть аваньксэкс».

Лия раськень авань кемемась

²⁴ Галилеясто Иисус тусь Тир ды Сидон ошонь модатнес. Тосо Сон лоткась ве кудос, ды мелезэ ульнесь, кияк илязо сода Сонзэ самодо. Ансяк те Сонензэ эзь кекшеве.

^25-26 Эйстэнзэ марясь ве ава, конань тейтерезэ кирдевсь аванькс оймеялтсо. Авась сась ды прась Иисусонь пильгес, энялдсь Тензэ панемс тейтерензэ эйстэ идемевсенть. Се авась ульнесь аволь евреень, чачозель Сирофиникиясо.

²⁷ Иисус мерсь тензэ: «Васняяк эрявить андомс эйкакштнэ, – аволь вадря саемс кшинть эйкакшонь кедьстэ ды каямс киска левкснэнь».

²⁸ Авась каршонзо мерсь: «Те виде, Азоро, ансяк кискатнеяк ярсыть столь ало эйкакшонь правтовт паморькстнэде».

²⁹ Иисус мерсь тензэ: «Те валот кисэ азё седейоймамо марто; идемевсесь лиссь тейтереть эйстэ».

³⁰ Авась сась кудов, неи: тейтерезэ мадезь тарка лангсо, идемевсесь кадызе сонзэ.

Амарицянь ды акортыцянь шумбралгавтомась

³¹ Иисус тусь Тир ды Сидон ошонь модатнестэ ды таго мольсь Кемень ошонь модатнень трокс Галилеянь эрькенть ёнов.

³² Тосо ветясть Тензэ амариця ды кундатозь кель ломань, энялдсть Иисуснэнь путомс лангозонзо кедензэ.

³³ Иисус саизе сонзэ ломантнеде ве ёнов, путынзе суронзо пилезэнзэ, сельгсь ды токизе келензэ.

³⁴ Мейле варштась менельс, стакасто укстась ды мерсь: «Эффата», тень смустезэ: “Панжовт”.

³⁵ Сеске панжтотсть сонзэ пилензэ, ды менсь келезэ, кармась ваньксстэ кортамо.

³⁶ Иисус кардынзе сынст теде ёвтнемадо. Ансяк, кода Сон а кардыль, сынь седеяк пек ёвтнильть.

³⁷ Сынь пек дивсесть ды кортасть: «Весемесь, мезенть Сон теи, пек паро: натой амарицятненьгак теи марицякс, акортыцятненьгак – кортыцякс».