Марк 2 - Од Вейсэньлув 2006

Катардыцянь шумбралгавтомась

¹ Зярыя чинь ютазь, Иисус таго сась Капернаумс. Кулясь кудов Сонзэ велявтомадо куроксто срадсь ошканть.

² Курок пурнавсть истя ламо ломанть, натой кудонть потсояк, ушосояк эзь кадово тарка. Сон кортась тенст Кенярксов кулядонть.

³ Те шкастонть ниле ломанть кандсть Тензэ катар ормасо сэредиця.

⁴ Ламо ломантнень улемадо сынь Иисусонь малав эзть ютаво, секс кузсть кудонть лангс, штавтызь вельтявксонть, тейсть варя Иисусонь аштема тарканть коряс ды мадезь аштиця сэредицянть ацамонек-мезнек верде нолдызь Сонзэ икелев.

⁵ Зярдо Иисус неизе сынст кемемаст, Сон мерсь сэредицянтень: «Эйдем, нолдазь тонь пежететь».

⁶ Сесэ ульнесть озадо зярыя Койс тонавтыцят, конат арсесть эськаст:

⁷ «Мекс Сон истя Пазонть нарьги-покорды? Кинень, Паздонть башка, нолдавить пежетне?»

⁸ Иисус оймесэнзэ марясь, мезде сынь арсить, ды мерсь тенст: «Мекс тынь истя эсь седейсэнк арсетядо?

⁹ Мезесь седе шождыне, меремс катардыцянтень: “Нолдавить тонь пежететь”, эли меремс: “Стяк, саик ацамот, ды якак”?

¹⁰ Истя тынь содадо, масторлангсо Ломантнень Цёранть ули азорксчизэ пежетень нолдамскак». Теде мейле пшкадсь катардыцянтень:

¹¹ «Кортан теть: стяк, саить ацамот ды азё кудов».

¹² Вана цёрась сеске стясь, саинзе ацамонзо, тусь весень сельме икеле. Секс весе пек дивсесть, шнасть Пазонть, кортасть: «Минь пингезэнек истямо эзинек некшне!»

Иисус тердизе Левинь

¹³ Иисус таго лиссь эрьке чирес. Ламо ломанть састь мельганзо, ды Сон тонавтсь эйсэст.

¹⁴ Ки ланга ютамсто Сон неизе Левинь, Алфеень цёранзо, кона аштесь озадо каявксонь пурнамо кудонть вакссо. Иисус мерсь тензэ: «Мольть Монь мельга». Се стясь ды тусь мельганзо.

¹⁵ Мейле Иисус ярсась Левинь кудосо. Столь экшсэ Сонзэ ды тонавтницянзо марто аштесть каявксонь ламо пурныцяткак ды пежетев лия ломантькак. Сонзэ свал ульнесть мельганзо ламо молицят.

¹⁶ Койс тонавтыцятне ды фарисейтне неизь Иисусонь каявксонь пурныця ды пежетев ломань марто ярсамсто. Сестэ сынь мерсть тонавтницянстэнь: «Кода истя Сон ярсы-сими каявксонь пурныця ды лия пежетев ломань марто вейсэ?»

¹⁷ Тень марязь, Иисус мерсь тенст: «Ормаменстиця эряви сэредицянень, аволь шумбра ломаннень. Мон сынь тердеме велявтомс Пазонтень пежетевтнень, аволь видечисэтнень».

Постонь кирдемадо ды оймсема чиде кевкстематне

¹⁸ Иоаннонь тонавтницятне ды фарисеенсетнеяк постовасть. Ламот сакшность Иисуснэнь ды кевкстнесть: «Мекс Иоаннонь ды фарисеень тонавтницятне постовить, теке шкастонть Тонь тонавтницят пост а кирдить?»

¹⁹ Иисус мерсь тенст: «Нать кирдеви пост свадьбань инжетненень, зярс урьвакстыцясь мартост? Зярдо мартост урьвакстыцясь, сестэ сынь а постовавить.

²⁰ Сы шка, зярдо урьвакстыцясь ули саезь юткстост, сестэ, сеть читнестэ, сыньгак кармить постовамо.

²¹ Кияк ташто оршамос а панды апак озавто од коцтонь панкс, – истямо панксось сезьсы таштонть, ды тееви седеяк покш варя.

²² Од винаяк кияк а кайси ташто кедень кескавс. Бути истя теят, сестэ винась сезьсы кеденть, винаськак, кескавоськак ёмить. Секскак од винась эряви каямс од кедень кескавс».

²³ Весть савсь Иисуснэнь оймсема чистэ ютамс сюро паксява. Сонзэ тонавтницятне ки ланга молемстэ кармасть сезнеме сюропрят.

²⁴ Фарисейтне кевкстизь Сонзэ: «Вант, мекс сынь оймсема чине теить сень, мезе а мереви теемс те чистэнть?»

²⁵ Сон кевкстинзе сынст: «Тынь нать зярдояк эзиде ловно седе, мезе тейсь Давид инязорось, зярдо сон ды сонзэ мартонзотнеяк вачомкшность, арасель ярсамопелест?

²⁶ Сон Авиатар попонь прявтонть пингестэ совась Пазонь кудос ды ярсась тосо Пазонть икелев путозь кшитнеде ды макссь мартонзотнененьгак, куш сындест, попто башка, киненьгак а меревиль ярсамс».

²⁷ Мейле мерсь тенст: «Оймсема чись теезь ломанень кисэ, аволь ломанесь оймсема чинь кисэ.

²⁸ Тень кувалма Ломантнень Цёрась оймсема чинть лангсояк азоро».