Марк 16 - Од Вейсэньлув 2006

Иисусонь кулозьстэ вельмемазо

¹ Оймсема чинть ютамодо мейле Магдалань Мария, Яковонь авазо Мария ды Саломия рамасть тантей чине ойть Иисусонь уловонть ваднемс.

² Недлячистэнть, чинь лисема шкане, сынь сыргасть калмонзо лангс.

³ Ютамсто кортасть эсь ютковаст: «Кие сявордсы тенек кевенть калмонтень совамо таркастонть?»

⁴ Зярдо пачкодсть калмонтень, неизь: кевесь, те ульнесь вельть покш кев, айгезель совамо таркастонть.

⁵ Сынь совасть калмонтень ды несть вить пеле озадо аштиця од цёра, конань лангсо ульнесть ашо кувака оршамот. Сынь пек тандадсть.

⁶ Цёрась мерсь тенст: «Илядо пеле. Тынь вешнетядо Назаретэнь Иисусонь, кона вачкодезель крёст лангс. Сон вельмесь, тесэ арась. Вана таркась, козонь Сон путозель.

⁷ Азёдо, нейке ёвтадо тонавтницянстэнь ды Петраненьгак истя: Сон тынденк икеле моли Галилеяв, тосо тынь несынккак Сонзэ, кода теде Сонсь тенк ёвтакшнось».

⁸ Сынь лиссть, сорнозь ды талнозь, чиезь тусть калмонть эйстэ, тандадомадонть киненьгак мезеяк эзть ёвта.

Кулозьстэ вельмезь Иисус марто вастома

⁹ Иисус вельмесь кулозьстэ недлячинь валске. Васняяк Сон прянзо невтизе Магдалань Мариянень, конаньстэ панекшнесь сисем идемевсть.

¹⁰ Мария тусь ды ёвтась сетненень, конат яксекшнесть Иисус марто ды конат ней авардсть ды мелявтсть.

¹¹ Сынь кодаяк эзть кемезеве, зярдо марясть, келя Иисус эри, ды Мария неизе Сонзэ.

¹² Теде мейле Иисус невтизе прянзо лия чачосо эйстэст кавтотненень, конат ютыльть велев.

¹³ Сетне велявтсть ды ёвтнесть лия тонавтницятненень, ялатеке сыненсткак эзть кеме.

¹⁴ Меельце пелев Иисус невтизе прянзо кевейкее тонавтницянстэнь, зярдо сынь ярсыльть. Сон сялгавтнинзе сынст акемемаст ды калгодо седеест кисэ, мекс сынь эзть кеме кулозьстэ вельмемадо мейле Сонзэ неицятненень.

¹⁵ Сон мерсь тенст: «Азёдо весе масторлангонть келес, эрьва ломанентень ёвтнеде Кенярксов кулянть.

¹⁶ Се, кие кеми ды ули нававтозь, идеви; кие а кеми, се судязь ули.

¹⁷ Кемицятненень кармить тейневеме истят тешкст: Монь лемсэ кармить пансеме идемевсть, кортазевить од кельсэ.

¹⁸ Сынь кармить кедьсэ гуень сайнеме, ды симиндеряйть кодамояк куловтома ядто – берянь тенст а тееви; кармить путнеме кедест сэредиця лангс, сеть шумбралгадыть».

¹⁹ Тонавтницятнень марто истя кортамодонть мейле Азорось ульсь кепедезь менельс ды озась Пазонть вить ёнов.

²⁰ Тонавтницянзо тусть ды эрьва косо пачтясть паро кулянть. Азорось важодсь сынст марто ды кемекстась валост мельгаст молиця тамашань тешкссэ. Аминь.