Марк 13 - Од Вейсэньлув 2006

Пингень прядовома тешкстнэ

¹ Пазонь кудостонть лисемстэ тонавтницянзо ютксто вейкесь кецязь мерсь Иисуснэнь: «Тонавтыця, вантая, кодат парт кевтне, кодат покшт кудотне!»

² Иисус каршонзо мерсь: «Несыть неть покш мазый кудотнень? Весе калавтозь улить, а кадови эйстэст кев лангс кевгак».

³ Зярдо Сон озадо аштесь Ойумарькс пандонть лангсо Пазонь кудонть каршо, сестэ Петра, Яков, Иоанн ды Андрей, конат кадовсть мартонзо ськамост, кевкстизь Сонзэ:

⁴ «Ёвтак тенек, зярдо те ули, ды кодамо тешксэнь коряс содави весе тень топавтомась?»

⁵ Иисус каршост кармась кортамо: «Ванодо, кияк аволидизь маня.

⁶ Ламот сыть кекшезь Монь лементь ало ды кармить пряст ёвтамо: “Те Мон”. Сынь ламонь ильведстьсызь-манясызь.

⁷ Зярдо марятадо маласо войнань гайть ды васоло войнадо кулят, илядо тандале, – тенень эряви улемс, ансяк те зярс аволь песь.

⁸ Раське кепедеви раськень каршо, мастор – масторонь каршо. Таркань-таркань улить модань сорномат, сыть вачо иеть ды шалномат-талномат. Неть майсематне ансяк теке чачтомань пиштематнень ушодксост.

⁹ Тынь ванодо эсь мельганк, – тынк ветятадызь судс, синагогатнесэ кармить чавомонк. Монь кисэ тыненк сави стямс прявтнэнь ды инязортнэнь икелев ды ёвтнемс сыненст Мондень.

¹⁰ Ансяк васня эряви ёвтнемс весе раськетнень ланга Кенярксов кулянть.

¹¹ Зярдо тынк макстадызь прявтнэнь кедьс, илядо мелявто икелев ды илядо арсе, мезть тенк кортамс. Ёвтынк сеть валтнэнь, конат тенк те шкастонть максовить. Эдь кортыцякс ули Пазонь Оймеялтось, аволь тынь.

¹² Лелясь макссы-мийсы куломас ялаксонзо, тетясь – эйкакшонзо, эйкакштнэ стить тетяст-аваст каршо ды кармить макснеме сынст куломас.

¹³ Монь лементь кисэ весеменень ультядо а вечкевиксэкс, кие жо весе тень цидярдсы педе пес, се ванстови-идеви.

¹⁴ Зярдо несынк аваньксчинь нулгодьксэнть, конадо кортась Даниил пазмарицясь, аштицякс тосо, косо сонензэ а улемаль – ловныцясь чарькодезэ! – сестэ сеть, конат Иудеясо, оргодест пандо лангов.

¹⁵ Кие тондавсь кудо лангс, се илязо валго алов, илязо сова эсь кудозонзо мезеньгак саеме.

¹⁶ Кие паксясо, илязо велявто мекев кудов оршамонзо кисэ.

¹⁷ Кодамо стака ули сеть читнестэ пешксесэтненень ды потесэ эйкакшонь потицятненень!

¹⁸ Ознодо, илязо уле тынк оргодемась тельня.

¹⁹ Сеть читнестэ ули истямо пиштема, кодамо арасель теевеманть ушодомсто, зярдо Пазось теинзе менельтнень-мастортнэнь, ды натой течинь чис ды зярдояк а ули.

²⁰ Бути Азорось аволинзе аламолгавто неть читнень, сестэ кияк аволь ванстово. Ансяк сетнень кисэ, конатнень Сонсь кочкинзе, аламолгавтынзе сеть читнень.

²¹ Сестэ кияк мериндеряй тенк: “Вана тесэ Пазонь кучовт Идицясь!” эли: “Вана тосо Сон!” – илядо кеме.

²² Се шкастонть кармить само кенгели христост ды кенгели пазмарицят, конат теить покш дивань тешкст ды тамашат. Сынь снартыть натой Пазонь кочкавтнэньгак ильведстемс-манямс, бути те тееви тенст.

²³ Ванстодо прянк. Вана Мон весементь ёвтыя тенк икелев.

²⁴ Сеть читнестэ, те пиштемадонть мейле, чись чополгады, ковоськак а карми максомо валдо,

²⁵ тештетнеяк прыть менельстэ, менелень вийтнеяк теить сорк.

²⁶ Сестэ несызь Ломантнень Цёранть пель лангсо самонзо покш вийсэнзэ ды иневалдосонзо.

²⁷ Сестэ Сон кучсынзе ангелтнэнь, пурнасынзе Сонсензэ кочкавтнэнь масторонь ниле ёндо, моданть чирестэ – менелень чирес.

²⁸ Тонавтнеде чарькодеме инжир чувтонть коряс: зярдо сонзэ тарадонзо чевтемить ды нолдыть лопат, сестэ содави – кизэсь маласо.

²⁹ Истя тесэяк, зярдо тынь несынк тень топавтоманть, сестэ чарькодтядо – те шкась маласо, кенкш лангсо.

³⁰ Видестэ кортан тенк: неень пингень ломантне ёмамо а кенерить, кода весе те топавтови.

³¹ Менелесь ды масторось ёмить, ансяк Монь валон а ёмить».

Чись ды часось а содавить

³² «Се чиденть эли частонть кияк а соды: менелень ангелтнэяк, Цёраськак, ансяк Тетясь.

³³ Ванодо, уледе анокт ды ознодо: а содатадо, зярдо сы те шкась.

³⁴ Те шканть самось моли истямо тев ёнов: ломанесь ки лангс туемстэ кудонзо кадсы эсь важонзо кедь лангс ды эрьвантень максы тев; орта лангсо аштицянтеньгак мери ванстомодо.

³⁵ Секскак ванодо, уледе анокт, эдь а содатадо, зярдо сы кудазорось: чокшне ланга, эли пелеве шкане, эли атякш морамо шкане, эли валске ланга.

³⁶ Апак учо самсто сон илядызь стардо тынк удомсто.

³⁷ Мезть ней тыненк кортан – тень весенень кортан: илядо удо, уледе анокт».