Паволонь сёрмазо Колоссав 2 - Од Вейсэньлув 2006

¹ Монь мелем: содавлиде тынь, кодамо виев тюрема мон ветян тынк кисэ, ды Лаодикия ошонь кемицятнень кисэ, ды весе лиятнень кисэяк, кить монь сельмсэ эзимизь некшне.

² Тень весе мон теян сень кисэ: кемекстамс седеенк, вейсэндямс тынк вечкемань сюлмосо. Сестэ тынь пачкодтядо сехте домка ды питнейдеяк питней чарькодемантень: тынь карматадо содамонзо Пазонь ды Тетянь ды Христосонь салавачинть.

³ Сонзэ эйсэ, Христоссо, кирдевить превейчинь ды содамочинь весе кекшезь сюпавчитне.

⁴ Тень мон кортан тыненк вана мекс: кадык кияк а саласынзе тынк превенк кенгелиця соланя кельсэнзэ-валсонзо.

⁵ Кадык мон монсь аволь тынк марто, оймем жо ялатеке мартонк. Ды мон кенярдкшнан, зярдо неян тынк кеме вейсэндямонк ды Христоснэнь покш кемеманк.

Христос марто од эрямо

⁶ Секскак, бути тынь саинк эсь седеезэнк Христос Иисусонь кода Азоронть, сестэ эрядояк мартонзо вейсэндязь.

⁷ Нолдадо ундокст-корёнт Христос эйс, ды улезэ Сон тенк эрямонь юрокс. Кемекстадо прянк кемемасонть, конанень тынь тонавтозтядо. Бажадо касомс эйсэнзэ, сюкпрянь ёвтазь.

⁸ Ванодо, кияк аволидизь тапа кенгелиця философиянь чаво валтнэсэ, конатнень юрсо аштить ломанень путовт койтне-кирдатне ды мирэнть-масторонть ветиця вийтне, ансяк аволь Христос.

⁹ Христос эйсэ, Сонзэ рунгосо, эри-невтеви Пазонь весе пешксечись,

¹⁰ ды Сонзэ марто вейсэндявоманть вельде тыненккак максозь эрямонь пешксечи. Христос – весе прявтнэнь ды азорксчитнень лангсояк Покш.

¹¹ Сон тейсь тыненк керявтомаяк, ансяк аволь ломанень кедьсэ теезь киськепень керявтома. Христосонь теевть керявтоманть вельде тынк лангсто каявтозь-ёртозь колазь пежетев обуцянк.

¹² Истя, нававтомасонть-лемдемасонть тынь ульниде теке калмазь Христос марто вейсэ ды вельмевтезьгак Сонзэ марто, секс мекс тынь кемиде Пазонтень, кона Эсь вийсэнзэ вельмевтизе кулозьстэ Христосонь.

¹³ Тынь икеле ульниде кулозекс эсенк пежетенк кувалт ды сень кувалт, мекс колазь обуцянк ульнесь теке апак керявто. Ансяк ней Пазось теидизь тынк эрицякс вейсэ Христос марто. Сон нолдынзе-простинзе минек весе пежетенек.

¹⁴ Сон нардынзе минек лангс сёрмадозь долктнень весе сынст вешемаст марто, конат аштесть минек каршо. Крёст лангс вачкодеманть вельде Сон ёртынзе сынст минек кинть лангсто.

¹⁵ Теньсэ Пазось саинзе оймеялтонь весе прявтнэнь ды азорксчитнень виест ды совавтынзе сынст визьксчамас весень икеле, зярдо Сон кецязь изнинзе сынст Эсензэ вельде.

Тынь олякстомтозь ломанень теевть койтнеде-кирдатнеде

¹⁶ Кадык кияк а суди эйсэнк сень кисэ, мезде тынь ярстадо ды симтядо, ловтадо эли а ловтадо тынь иень покшчитнень, ковонь чачоматнень ды оймсема читнень.

¹⁷ Весе те ансяк сень сулеезэ, мезентень эряви самс, алкуксчись жо – те Христос.

¹⁸ Кадык тынк а судить истят ломантне, конат вечкить невтеме пряст манчемань сэтьмечисэ ды сюконямо ангелтнэнень ды кирдевить-аштить сень лангсо, мезенть сынсь эзизь нее. Стяко сынь покшкавтнить пряст эсь превейчисэст, кона ялатеке ансяк ломанень.

¹⁹ Неть ломантне уш апак сюлма Прянть марто, Христос марто, кона анды-симди весе рунгонть ды вейсэнди сонзэ сантнэнь ды эзнетнень вельде. Истя весе рунгось касы-кемексты Пазонть мелензэ коряс.

²⁰ Бути тынь кулыде Христос марто ды ней олякстомиде те масторлангонь ветиця вийтнеде, мекс эно тынь яла эрятадо кода сонзэ ломантне? Мекс тынь топавттадо истят кармавтоматнень:

²¹ «Иля сае!», «Иля ярса!», «Иля токшеве!»?

²² Те весе ёми тевс нолдамодо мейле. Неть вешематне – ансяк ломанень теевть кармавтомат ды тонавтомат.

²³ Истят кармавтоматне ансяк неявить превейкс. Сынь ялатеке ветить ломаненть эсензэ теевть сюконямос, манчемань сэтьмечис ды рунгонь муцявтомас. Секс сынь питневтеметь ды допрок а лездыть ломанентень кирдемс-онкстямс эсь колазь обуцянь мельтнень.