Паволонь омбоце сёрмазо Фессалоникав 3 - Од Вейсэньлув 2006

Павол терди озномо

¹ Ды меельцекс, кемиця ялгат, ознодо минек кисэ. Кадык Азоронть валось куроксто пачкодевель эрьва ков ды улевель шназь лиятнень ютксояк, кода тынк ютксо.

² Ознодо сень кисэяк, кадык Пазось ванстсамизь минек апаро ды зыянонь кандыця ломантнеде, эдь аволь весень ули кемемаст.

³ А вана Азорось кемевикс. Сон виевгавттадызь ды вансттадызь апародонть.

⁴ Азорось миненек максы кемема тынк лангс: тынь топавттадо ды карматадояк топавтомо сень, мезе минь тыненк кармавттано.

⁵ Ды кадык Азорось аравтсынзе-ветясынзе тынк седеенк Пазонь вечкемантень ды Христосонь цидярдомантень.

Превспутомат нузякстнэнь туртов

⁶ Кемиця ялгат, Иисус Христос Азоронок лемсэ кармавттано тенк: кирдеведе ве ёно эрьва кемиця ялганть эйстэ, конась эри нузякссто, тевтеме ды а моли минек максовт тонавтоманть мельга.

⁷ Тынь тынсь содатадо, кода тыненк эряви теемс минек ладсо. Тынк кедьсэ минь тевтеме эзинек аштекшне.

⁸ Кинь кедьсэяк кши сускомне стяко эзинек сэве, мекевланк, важодинек чинек-венек, виень апак жаля, а улемс киненьгак тыненк кирьгасо кевекс.

⁹ Куш минек ульнесь азорксчинек вешемс пельденк лезкс, ансяк минь истя ялатеке эзинек тее, эдь минек ульнесь меленек максомс тыненк невтевкс. Кадык эрьвась эйстэнк тейневель минек ладсо.

¹⁰ Зярдо минь ульнинек тынк кедьсэ, сестэ уш минь тыненк кармавтнинек: кинь арась мелезэ важодемс, се кадык а ярсыяк.

¹¹ Минь теде кортатано вана мекс: минь марятано, тынк улить зярыя ломаненк, конат нузялдыть, важодемскак а важодить, а эсь пряст эцить эрьва тевс.

¹² Неть ломантнень минь кармавттано ды тердтяно минек Иисус Христос Азоронть лемсэ сэтьместэ важодеме ды эсест вийсэ пряст трямо.

¹³ Тынь жо, кемиця ялгат, паронь теемстэ илядо сода сизема.

¹⁴ Бути кияк а кунсолы сень, мезде минь сёрмадтано те сёрмасонть, сестэ кундынк сонзэ эсенк мельс: илядо пшкале тензэ ды кадык сонензэ карми улеме визькс!

¹⁵ Ялатеке илядо лово сонзэ эсенк ятокс, мекевланк, путодо эйсэнзэ превс кода кемиця ялганк.

Меельце паро мельть-арсемат

¹⁶ Кадык Сонсь Азорось, седейоймамонь лисьмапрясь, максы тенк седейоймамо, свал ды эрьва кода. Улезэ Азорось весеменк тынк марто!

¹⁷ Шумбракстнеманть мон, Павол, сёрмалян тезэнь эсень кедьсэ. Истя тешкстнян эрьва сёрмам.

¹⁸ Минек Иисус Христос Азоронть чанстесь улезэ весеменк тынк марто! Аминь.