Паволонь омбоце сёрмазо Фессалоникав 2 - Од Вейсэньлув 2006

Койтемечинь ломанесь

¹ А вана ней кортатано минек Иисус Христос Азоронть самодонзо ды седе, кода минек пурнасамизь Сонензэ. Кемиця ялгат, энялдтано тенк:

² иляст сеске чаракадо превенк ды илядо талакале-тандале кодамояк пазмарицянь валдонть, тонавтомадонть эли сёрмадонть, кона, келя, минек пельде. Сынст эйсэ буто ёвтазь: «Христосонь чись уш сы».

³ Киненьгак мейсэяк илинк максо прянк ильведстемс-манямс. Эдь те чиденть икеле карми улеме покш потамо-велявтома Пазонть эйстэ ды невтьсы прянзо пежетень ломанесь, кона максозь-судязь ёмамос.

⁴ Те каршомолицясь путсы-ловсы прянзо сехте покшокс весеме лангсо, конанень мерить паз эли сюконямо тарка. Сон озы Пазонь кудос кода Паз ды яволявтсы эсь прянзо Пазокс.

⁵ Паряк тынь эзинк стувто? Мон тыненк кортакшнынь тень эйстэ уш сестэ, зярдо ульнинь тынк кедьсэ.

⁶ Тынь истя жо содатадо, мезесь кирди койтемечинь ломаненть невтемс прянзо шкадонзо икеле.

⁷ Эдь койтемечинь виесь уш важоди салава. Ансяк эряви саемс кинзэ лангсто сень, кие кирди сонзэ.

⁸ Ды сестэ лиси лангс те койтемечинь ломанесь, конань Иисус Азорось куловтсы Эсензэ кургсто лисиця оймекоштсонзо ды маштсы-ёмавтсы Эсензэ сияждомасонзо се чистэнть, зярдо Сон сы.

⁹ Койтемечинь ломаненть самось – те тевесь Сатананть. Те самось карми невтевеме эрьва кодамо вийсэ ды кенгелиця-ильведстиця тамашасо ды дивань тевсэ

¹⁰ ды эрьва кодамо авидечинь манчемасо. Неть манчематнес понгить сеть, конат ютыть ёмамос, секс мекс сыненст эзь вечкеве Пазонть видечись, конань вийсэ сынь улевельтькак идезь.

¹¹ Тень кисэ Пазось кучи лангозост манчевемань покш вий, ды секс сынь кармить кемеме кенгелемантень.

¹² Истя кармить улеме судязь весе сетне, кить эзть кеме видечинтень ды кинень вечкевсь авидечись.

Тынь кочказтядо идемас

¹³ Азоронтень вечкевикст, кемиця ялгат, миненек свал эряви ёвтамс сюкпря Пазонтень тынк кисэ. Сон тынк ушодкссто саезь кочкидизь пачкодемс идемантень, секс мекс Оймеялтось теи эйсэнк Пазонтень алтазь ломанекс ды секс мекс тынь кемтядо видечинтень.

¹⁴ Тенень Сон тердидизь тынк Кенярксов кулясонть, конань минь пачтинек тыненк. Сестэ тынь явсынк минек Иисус Христос Азоронть инексчинзэ.

¹⁵ Истямо ладсо, кемиця ялгат, аштеде-кирдеведе кеместэ се тонавтомасонть, конанень минь тынк тонавтыдизь икеленк ёвтазь валсо эли кучозь сёрмасо!

¹⁶ Ды Сонсь Иисус Христос Азоронок ды Пазось, минек Тетянок, кона минек вечксамизь ды кона Эсь чанстензэ кувалт казимизь минек пингеде пингень важдамосо-оймамосо ды паро седейнежедькссэ, –

¹⁷ кадык важдасызь-оймавтсызь седеенк ды виевгавттадызь тынк эрьва кодамо паро тевс-валс.