Ɛfesos 3 - Ŋwaale Feyin; Kelek Kefɛɛ

Ɛyfɛl ə Bool ɛ əbtume məm

¹ Se lu bek əbnəə wɛ Feyine nɛɛyen nɛ̂ vin, mɛ wɛ Bool wɛ mɛ luun ɛ nchak bek ɛyfɛle Christ Jesus yɛ mɛ fɛ́len se ghɛn me se jeme se ghɛn ghɛ ghel əbtum.

² Mɛ ke ge ghɛn nè yiomen ka Feyine nè chamen ɛysen è vii ɛyfɛl nɛ̂ yin ɛ mɛ keghoo yɛ mɛ fɛ́len se yɛ giamtene ghɛn.

³ Mɛ kè lô nyak se ghɛn ge Feyine nè lômen din əbnəə wen se mɛ wɛ əb nè siysen ə́b se lu ɛ kenlete.

⁴ Ghɛne lóó jaŋe ŋwaale yin, è me yɛn ge mɛ ke əbnəə wɛ əb luun ɛ kenlete kum Christ.

⁵ Nè lu se mbiy nɛ Feyine báà nɛɛy ge wele-mesoŋ keele chəm nɛ̂ yì, se lu ɛ leenen nɛ Keyioy ə wene nɛɛymen ghɛ́ ntum nə Christ ghɛ əb nè choken gese nɛ̀ ghɛ́ ntum nə wene keele.

⁶ Kenəə nɛ̂ kin kɛ ke nè luun ɛ kenlete lu ge: Sakghɛ əbjuŋ lu nɛ əb nɛɛy, ghel əbtume chinten ghele Juus se kiile əbtik wɛ Feyine foon se ghon ə wene, è chinten se yɛ lu ɛybee əbghun nə Christ ɛylee, è chinten se kiile kii dii kɛ Feyine nè kaken ge Jesus Christ yî gwiy so.

⁷ Mɛ lu wel əbfɛlen ɛ məme sakghɛ nɛ̂ ghan bek ka Feyine nè chamen ɛysen, è nɛɛy nɛ̀ kediak ə wen ge mɛ yɛ lu.

⁸ Chèmè lu ka mɛ laayen chian naa kenləysene wel ɛ məm nə ghel ə Feyine, nɛ Feyine kò nè lômen din ɛykoŋ, è nɛɛy ge mɛ yɛ fekte se əbtume kum əbghaake wɛ Christe gwiyen so wɛ lòó wel jia keele se fek,

⁹ nɛɛy ge wel əbjim keele jii yɛ Feyin wɛ əb nè bomen əbfua əbjim nè siysen se fɛl nɛ̀ chəm nɛ̂ yin yɛ əb nè letemen se nguk.

¹⁰ Shii ə Feyin nè lu se chia əbghun nə kenchintene ghel ɛbeemene se din əbfee ə wen wɛ əb luun ɛ jiise jiise se ghɛ ɛ́ saken gese nɛ̀ ghɛ ɛ́ kiin əbtaawe ɛyyio.

¹¹ Feyine nè nɛɛy əbnəə nɛ̂ vin kɛn ka əb nè yimen siyse se kenkɛɛte, nɛ əb nè nɛɛy chia əbghun nə Báàba ə wɛsen Christ Jesus.

¹² Lu bek ka ghɛsen luun kefaa kemok ghɛsen nɛ̀ ghe Christ gese nɛ̀ ka ghɛsen foon ɛytem se wen wɛ ghɛsen kiin jii sɛ yɛ gwiy se Feyine nɛ̀ ɛyteme bo fane wiy kefaa.

¹³ Mɛ me se lone ge ghàà ghɛn koosen nken bek ngɛk yɛ mɛ yɛ́nen fɛn bek ghɛn. Mɛ yɛne ngɛk lɛ ka ghɛne yɛ koknen.

Bool jem se ghele Ɛfesose

¹⁴ Lu bek əbnəə nɛ̂ vin wɛ mɛ təmen ɛləy ɛ Bay ɛyshiɛ è se jeme.

¹⁵ Lu wen wɛ əb luun Bay se tekfəə tejim ɛ ɛyyio nɛ se ketuu ntiɛ.

¹⁶ Mɛ jeme ge Feyin wɛ əb kiin əbghaake əbchio əbyúméné kô nɛɛy é Keyioy Kelanene fó kediak se ghɛn ka ghɛne yɛ taa ɛ ghɛne tetem.

¹⁷ Jeme ge ghɛn yɛ loote ki ɛytem se Feyine, ka Christe yɛ chii ɛ ghɛne məm, lone ge ghɛn yɛ loote ki ɛykoŋ nɛ ɛy loote yiɛte əbghun ɛ ghɛne tetem,

¹⁸ ka ghɛne ghel ə Feyine ɛjime chinten è yɛ ki əbtaawe se keele jii yɛ ɛykoŋe Christ luun ɛ ten jii sejim nɛ lòó wel jia fek.

¹⁹ Mɛ jeme ge ghɛn keele ɛykoŋ Christ nɛ̂ yi, ɛykoŋ nɛ lòó wele-mesoŋ jia keele, ka nchiine ə Feyine me loote kok è lun ɛ ghɛne tetem.

²⁰ Ghɛsen fó ɛykokse se Feyin wɛ əb fɛ́len ɛ ghɛsene məm nɛ̀ əbtaawe ə wene. Lu wen wɛ lòó əb nɛɛy əbnəə əbjim wɛ ghɛsen bifen se wen è nɛɛy naa è chia ka ghɛsen kè lòó ɛ́ yɛ ki ɛ ghɛsen ɛykwaate.

²¹ Ɛykokse yɛ lu se Feyine bek kenone ghel ɛbeemene ghene ghe Christ ntem sejim, nɛ̀ se əbliy əbjim nɛ ɛymɛye wiy. Amen.