ᐱᓬᐃᐱᔭᓇᒃ INTRO1 - ᐅᒋᐺ ᑭᒋᒪᓯᓇᐃᑲᓐᒦ ᐅᐌ ᑫᐅᒋᓂᓯᑐᑕᒪᓐ ᐅᐅ ᐅᔑᐲᐃᑲᓐ ᑆᓬ Paul ᓴ ᑮᑭᐸᐙ ᐅᐅᐌᓂ ᑮᐅᔑᐲᐊᕽ᙮ ᑯᑕᒃ ᐃᑕᔥ ᐅᑕᓇᒥᐋᐞ ᐅᑮᑲᑴᓇᑳᔥᑲᒥᓂ ᑳᑮᐃᔑᒋᑫᒡ᙮ ᐅᑮᑭᑫᑖᓐ ᑕᔥ ᑲᔦ ᐋᓂᑕ ᐊᐎᔭᐞ ᓭᓯᒃ ᐁᑮᐃᔑᑭᑭᓄᐊᒫᑫᓯᓂᒃ ᐃᐃᒫ ᐱᓬᐃᐹᐃ Philippi ᐆᑌᓈᕽ᙮ ᔖᑰᒡ ᐃᑕᔥ ᒌᑭᑖᑾᓂᓂ ᐅᑑᔑᐲᐃᑲᓐ, ᐋᓃᔥ ᐅᑌᐺᔦᓂᒫᓐ Xᑕᓐ᙮ ᒦᓴ ᐃ ᑳᑮᐅᒋᐅᔑᐲᐊᒪᐙᒡ ᐅᐅ ᐅᑌᐺᑕᒨᐞ ᐁᑮᐃᓈᒡ ᒦᑴᒡ ᐁᑮᐐᒋᐃᑯᒡ ᐊᐲ ᑮᒪᓀᓯᒡ᙮ ᐌᐌᓂ ᑕᔥ ᑲᔦ ᐅᑲᓅᓈᐞ ᒋᑲᑴᐃᓀᑕᒥᓂᒡ ᑳᑮᐃᔑᑕᐸᓭᓂᒧᓂᒡ ᐃᓂ ᒋᓴᔅ Xᑕᓐ, ᑳᐐᓐ ᐐᓐ ᒋᑭᒋ ᐃᓀᓂᑎᓱᓂᒡ, ᒋᓈᓈᑲᑕᐌᓂᑎᓱᓯᓂᒃ ᑲᔦ ᐁᑕ᙮ ᐅᐐᑕᒪᐙᐞ ᐃᑕᔥ ᑲᔦ ᐃᐃ ᑳᐃᔑᐐᒌᐙᓂᒡ Xᑕᓐ ᐁᐅᒌᓂᒃ ᑭᔐᒪᓂᑑᓐ ᐅᑭᔐᐙᑎᓯᐎᓂᓃᕽ, ᒦ ᐋᓃᔥ ᐅᐅᒫ ᐌᒌᓂᒃ ᑌᐺ ᐅᐱᒫᑎᓯᐎᓂᐙ᙮ ᑳᐐᓐ ᐐᓐ ᐅᒌᓯᓂᓂ ᑳᐃᓇᑌᓂᒃ ᒎᐎ ᐊᓇᒥᐁᒋᑫᐎᓂᕽ᙮ ᒦᑕᔥ ᐁᔑᐊᑕᐌᓂᒫᒡ ᒋᒌᑫᑕᒥᓂᒡ, ᒋᒪᔥᑲᐎᑌᐺᑕᒥᓂᒡ, ᐱᓵᓐ ᑲᔦ ᒋᐐᒌᑎᓂᒡ, ᒋᐸᑭᒌᓯᓂᒃ ᑲᔦ᙮ ᒦᑕᔥ ᐅᐅᒫ ᐁᔑᐯᑌᓈᑾᓂᓂᒃ ᐁᓵᑭᐋᒡ ᐅᑌᐺᑕᒨᐞ᙮ ᐅᐅ ᓴ ᐱᓬᐃᐹᐃ ᐆᑌᓇ ᑮᐃᔑᐊᔮ ᐌᑎ ᒫᓯᑑᓂᔭ Macedonia ᐊᑮᕽ, ᑳᑮᐃᔑᐊᔮᒃ ᐃᔫᕒᐊᑉ Europe ᑭᒋᐊᑮᕽ᙮ ᒦᐗᒃ ᓴ ᓂᑕᒻ ᑳᑮᑌᐺᑕᒧᐙᑯᐸᓀᓐ ᒥᓍᒋᒧᐎᓐ ᐌᑎ ᐃᔫᕒᐊᑉ ᐊᑮᕽ (Acts 16.9-15)᙮ ᐁᑕᓱᐯᐸᑳᓂᐲᐃᑳᑌᒃ ᐅᐅ ᐅᔑᐲᐃᑲᓐ ᑆᓬ ᐐᓐ ᐃᑯ ᑳᑮᐃᔑᓭᒡ 1.12-26 ᐱᒫᑎᓯᐎᓐ ᐁᐐᒌᐎᓐᒡ X 1.27—2.18 ᑎᒪᑎ Timothy, ᐃᐹᐸᕒᐊᑕᐃᑕᔅ Epaphroditus ᑲᔦ ᐁᑕᔑᒥᑣ 2.19-30 ᐁᐊᔮᒀᒥᒥᑣ ᐅᑌᐺᑕᒨᒃ 3.1—4.9 ᒦᑴᒡ ᐁᑮᐃᑭᑐᒡ ᑳᑮᐃᔑᐐᒋᐃᓐᒡ 4.10-20 ᐃᔥᒀᒡ ᐅᑎᑭᑐᐎᓐ 4.21-23 |
Ojibwe Shorter Bible (Syllabic Script) © 2008 Canadian Bible Society
Canadian Bible Society