फिलिप्पियां 4 - ओङ राजपूतपौलुस चा सनेसा जा निर्देश 1 ऐवास्ते माये प्यारे भऊ ते ब़ेहणीया, तम्ही जको माई खुशी ते माया मान-समान छिवा। तम्हानु ङेखणे चे वास्ते माये मन तरसे पले, जिसड़े मैं तम्हानु बावड़ले यूंही प्रभु मां टिकले रिहा। 2 मैं यहूदिया ते संतुखे कनु बिनती करे पला के तम्ही प्रभु मां हेक समान विचार बणाली राखा। 3 हे सच्चा भईवाल, मैं दुधे कनु वी बिनती करे पला कि तु वां असतरीया ची सहायता कर। कांकि वाणे माये लारे सुसमाचार प्रचार करने मां, क्लेमेन्स ते माये नेरे भईवाला समेत मेहनत करली, जाये नां जीवन ची किताबे मां लिखले पले। 4 मैं किहे पला प्रभु मां सदा खौश रिहा, ते मैं दुबारा किहे पला कि प्रभु मां खौश रिहा। 5 तम्ची नरमाई लारे भरीली आली आत्मा चा ज्ञान सारा बन्दा उपर हो प्रभु चे आणे गोढु छै। 6 कुई बाता ची चिन्ता ना करा, बल्ति हर हेक बाते मां नरीकारा कनु प्राथना ते बिनती चे लारे धन्यवाद ङिती रिहा। 7 तब नरीकारा ची शान्ति, जको सारी समझ कनु परुं छै, तम्चे दिला नु ते तम्चे विचारा नु मसीह ईशु मां सम्भालती राखी। 8 हे भऊ ते ब़ेहणीया, जको-जको बाता सच्च छी, ते जको-जको बाता आदरमान चा छी, ते जको-जको बाता वाजिब छी। ते जको-जको पवित्र छी,ते जको-जको बाता सुहावनीया छी, ते जको-जको बाता मन भावनीया छी। यानि जको सदगुण ते प्रशंसा चीया बाता छी, वांचे उपर ध्यान लाले करा। 9 जको बाता तम्ही माये कनु सिखलीया, ङेखलीया, सुणलीया, मनलीया वांचा तम्ही पालन करा। शान्ति ङेणे आला नरीकारा तम्चे लारे रिही। मैं प्रभु मां खौश छै। दान चे वास्ते धन्यवाद 10 मैं प्रभु मां ब़ोहत खौश छै कि इतने ङिहां चे बाद माये वास्ते तम्ही बल्ति कनु चिन्ता करु लाग़ले ऐचे मां कुई शक्क कोनी कि पेहले वी तम्हानु माई फिक्र ते हुती, पर ङिखाणने चा मौका कोनी मिड़ला। 11 हा कोनी कि मैं आपणी कमी चे अनुसार किहे। कांकि जिसी दशा मां मैं रिहे मैं सब्र करने सिखती गेले। 12 मैं घटी कमी मां रेहणे चा भेद वी जाणे, ते हा वी जाणे जिसे बेले सारे कोच्छ हो ते किवें रेहले जाये वे, किसड़ा वी समय हो किसड़ी वी दशा हो चाहे ढेड्ड भरीले आले हो चाहे भुक्के हो, चाहे ब़ोहत हो जा ते बल्ति कहीं वी ना हो, मैं वा सारा मां खौश हुवणे चा भेद सिखती गेला। 13 मसीह, जको मनु ताकत ङिये ओचे मां मैं सारीया दशा चा सामना कर सग़े। 14 तां वी तम्ही भले करले ते माये ङुखा मां तम्ही शामिल हुती कर तम्ही आच्छे करले। 15 हे फिलिप्पी, तम्ही वी जाणा कि सुसमाचार प्रचार चे शुरु मां, जिसे बेले मैं मकिदुनिया कनु विदा हुला, तब तम्हानु छोड़ती नेरी कुई कलीसिया ने लेन-देन चे बारे मां माई सहायता कोनी करली। 16 जिसे बेले मैं थिस्सलुनिके शहरा मां हुता माई जरुरत पुरी करने चे वास्ते तम्ही बार-बार मनु सहायता भेज़ली हुती। 17 हा बात कोनी कि मैं दान चाहवे, बल्कि तम्चे मां इसड़ी आशीष ङेखणा चाहवे जको दान ङेणे लारे आवे। 18 माये कनु ब़ोहत कोच्छ छै, इपफ्रुदीतुस चे हाथु जको दान तम्ही भेज़ला हुता ओनु मैं गेहती कर ब़ोहत खौश छै, ओ दान जको दिला आली महक ओर मनणे लायक बलिदान छै जाकनु नरीकार खौश हुती जाये। 19 ते माया नरीकार आपणे अपार धन चे अनुसार जको घणी महिमा लारे मसीह ईशु मां छै तम्ची हर हेक घटी पुरी करी 20 अम्चे ब़ा ते नरीकारा ची महिमा युगानयुग हुती रिहो। आमीन। आखरी नमस्कार 21 हर हेक पवित्र जन नु, जको ईशु मसीह मां छी नमस्कार किहा। जको भऊ माये लारे छी, वे तम्हानु नमस्कार किही पले। 22 नरीकारा चे सब पवित्र लौक, खास करती कर जको कैसर राजे चे घराणे चे छी, तम्हानु नमस्कार किही पले। 23 अम्चे प्रभु ईशु मसीह चा अनुग्रह तम्ची आत्मा चे लारे रिहो। |
CC BY-NC-ND 4.0