फिलिप्पियां 3 - ओङ राजपूतसच्ची धार्मिकता 1 ऐवास्ते हे माये भऊ ते ब़ेहणीया, प्रभु मां आनन्द मनाते रिहा। वे ही बाता बार-बार लिखणे मां मनु तां कुई कष्ट ना हुवी, कांकि ऐचे लारे तम्चा बचाव छै। 2 कुत्ता चे समान बन्दा कनु चौकस रेहजा, वां बुरे काम करने आला कनु चौकस रिहा, वां कटती करने आला कनु चौकस रिहा। 3 कांकि सच्चे खतने आले तां अम्ही ही छिऊं जको नरीकारा ची आत्मा ची अगुवाई लारे उपासना करु, ते मसीह ईशु उपर गर्व करु, ते शरीरा चे खतने जिसड़ी बाता पर भरोसा ना राखु। 4 पर मैं तां शरीरा उपर वी भरोसा राख सग़े। अगर कानु नेरा नु शरीरा उपर भरोसा राखणे चा विचार छै, तां मैं ओकनु वी बढ़ती कर राख सग़े। 5 आठवें ङिओ माया खतना हुला, इस्राएल चे वंश, ते बिन्यामीन चे गोत्र चा छै, मैं इब्रानी आई-ब़ा कनु पैदा हुला आला हेक इब्रानी छै। मूसा ची व्यवस्था चे बारे मां अगर किहा तां फरीसी छै। 6 जोश चे बारे अगर किहा तां कलीसिया नु सतावणे आला, ते व्यवस्था ची धार्मिकता चे बारे अगर किहा तां मैं निर्दोष हुता। 7 पर पेहले जको-जको बाता मैं नफे वास्ते सोचता, आज़ वां बाता नु मसीह चे वास्ते मैं फायदे वास्ते कोनी समझलीया। 8 ऐकनु वी बङी बात हा छै कि मैं आपणे प्रभु ईशु मसीह चे ज्ञान ची श्रेष्टता ची वजह कनु आज़ तक सब चीजा नु फायदा चीया ना समझी। ओचे वास्ते मैं सब कोच्छ त्याग़ती ङिले ते मैं सब चीजा कनु नफरत करु लाग़ला। ताकि मसीह नु गे सग़े। 9 ते ओचे मां ही लाभे माई वे धार्मिकता ची वजह कनु ना जको व्यवस्था चे विधान उपर टिकली हुती, बल्कि वे धार्मिकता ची वजह कनु जको मसीह मां विश्वास ची वजह कनु मिले, जको नरीकारा कनु मिले ते जाया अधार विश्वास छै। 10 मैं मसीह नु जाणना चाहवे ते वे शक्ति चा ऐहसास करना चाहवे, जाये कनु ओचा पुनरुत्थान हुला, तां मैं ओचे ङुखा मां शामिल हुवणा चाहवे। ते ओही रुप गेहणा चाहवे जानु ओणे आपणी मौत लारे सेहती गेलता। 11 कि मैं किसी वी तरह मरला आला महु जीता हुवणे चे पद्द नु गे सग़े। निशाने सनु द्रोड़ने 12 हा मतलब कोनी कि मैं गेहती चुकला, जा सेद्ध हुती चुकला पर मैं वे उपलब्धि नु गेहणे वास्ते लगातार यतन करे पला। जाये वास्ते मसीह ईशु ने मनु हकारले हुते। 13 हे माये भऊ ते ब़ेहणीया! मैं ईं ना सोची कि ओनु सोती चुकला। पर वास्तव मां बात हा छै कि बीतली नु बिसारती कर जको माये सामणे छै, ओ निशाने तक पुज़णे वास्ते मैं मेहनत करता हुला, 14 निशाने सनु द्रोड़ता चाह्ला जाये, ताकि ओ इनाम गिहे जाये वास्ते नरीकारा ने मनु मसीह ईशु मां उपर स्वर्ग़ा सनु हकारले। 15 सो अम्चे महु जितने आत्मिकता ची समझ मां मजबूत हुती चुकले, हाओ विचार राखो, ते अगर कुई बाते मां तम्चे आपस मां विचार ना मिलते हो तां नरीकार ओ वी तम्चे उपर उजागर करती ङी। 16 पर याद राखा कि ऐवास्ते जिसी सच्चाई तक अम्ही पुज़ले, ओचे अनुसार दस्तुरा लारे चलु। 17 हे माये भऊ ते ब़ेहणीया, तम्ही सारे मिलती माये जिसड़ी चाल चला, जको ऐ रीति उपर चली जको नमुना अम्चे मां ङेखला ओचे सनु ध्यान ङिया। 18 कांकि ब़ोहत से इसड़ी चाल चली, जाई चर्चा मैं तम्हानु बार-बार करली, ते हमा वी रोती-रोती कर किहे पला कि वे आपणी चाल-चलन लारे मसीह चे क्रूसा चे बैरी छी। 19 वांचा नाश वांची नियत छै। वांचे ढेड्ड ही ईश्वर छै। वे लज़्ज़ा ची बाता उपर घमण्ड करी, ते धरती चे बाता उपर मन लाली रिही। 20 पर अम्ची नागरिकता स्वर्ग़ा उपर छै, ते अम्ही हेक उद्धारकर्ता प्रभु ईशु मसीह चे उठु आवणे ची खुशी लारे इंतजार ङेखु पले। 21 ओ आपणी ताकत चे ओ प्रभाव लारे, जाये जरिये ओ सारीया चीजा नु आपणे वशा मां कर सग़े, अम्ची देह नु बदलती कर, आपणी महिमा ची देह जिसड़े बणाती ङी। |
CC BY-NC-ND 4.0