फिलिप्पियां 2 - ओङ राजपूत

मसीह ची दीनता ते महानता

¹ अगर मसीह मां कोच्छ शान्ति, ते प्रेम लारे हिम्मत, पवित्र आत्मा ची भईवाली, ते कोच्छ करुणा ते दया छै,

² तां माई हा खुशी पुरी करा के हेक मन रिहा, ते हेक ही प्रेम, हेक चेत्त, हेक ही मन्सा राखा।

³ आपणे स्वार्थ जा कूड़ी बढ़ाई वास्ते कहीं ना करा, पर नरमाई लारे हेके ङुजे नु आपणे कनु आच्छे समझा।

⁴ पर हर हेक आपणे बारे ची ना, बल्कि ङुजा चे बारे वी चिन्ता करा।

ईशु चा सुभाव

⁵ जिसड़ा मसीह ईशु चा सुभाव हुता उसड़ा ही तम्चा वी सुभाव हो।

⁶ जेह्णे नरीकार चे स्वरूप मां हुती कर वी नरीकारा ची बराबरी हुवणे वास्ते आपणे वशा मां राखणे ची चीज कोनी समझली

⁷ बल्कि ओणे तां आपणे सब कोच्छ त्याग़ती कर। ते हेक सेवक चा रुप धारण करती गेला, ते इन्सान हुती गेला।

⁸ तां ओणे आपणे आप नु झुकाती गेले। ते इतना आज्ञाकारी बणती गेला कि आपणे जान तक न्योछावर करती ङिली ते वा वी क्रूसा उपर।

⁹ ऐवास्ते नरीकारा ने वी ओनु ऊंचे कनु ऊंचे। जग़हा उपर भुकाणले ते ओनु ऊं नां ङिले जको सारा नांवा कनु श्रेष्ट नां छै,

¹⁰ कि जको स्वर्ग़ा मां ते धरती उपर ते पताला मां छी वे सारी ईशु चे नांवा उपर गोङे टेको,

¹¹ ते हर हेक जुबान ब़ा नरीकार ची महिमा वास्ते ग्रहण करो, कि “ईशु मसीह ही प्रभु छै। ”

संसार मां सोज़ले चमको

¹² ऐवास्ते हे प्यारे, तम्ही जिंवे माई आज्ञा चा पालन करते जिसे बेले मैं तम्चे लारे हुता हमा जबकि मैं तम्चे लारे कोनी, तां हमा तम्ही होर ज्यादा लगन लारे वांचा पालन करा। नरीकारा चे प्रति आज्ञाकारी ते पुरे कद्दर-भाव लारे आपणे उद्धार नु पूरा करने वास्ते तम्ही काम करते जावा।

¹³ कांकि ओ नरीकारा ही छै जको वां कामा ची इच्छा ते वानु पूरा करने चा कर्म, जको नरीकारा नु भावी, तम्चे मां पैदा करे।

¹⁴ सारे काम बिना बुड़कले ते बिना फसाद चे करले करा,

¹⁵ ताकि तम्ही भोले-भाले ते पवित्र बणती जावा। बल्ति टेढे ते हठीले लौका चे बीच नरीकारा ची निष्कलंक ऊलाद्ध बणती जावा। वांचे बीच मां तम्ही जीवन चा वचन चते हुले दुनिया मां तारा आलीकर चमकते ङिसा।

¹⁶ जब तम्ही जीन्दगी ङेणे आला सुसमाचार सुणावा तां तम्ही इसड़े ही करते रिहा, ताकि मसीह चे ङिओ मनु घमण्ड करने ची वजह हो कि ना माये द्रोड़ने ते ना माई मेहनत करले बेकार हुली।

¹⁷ अगर मनु तम्चे विश्‍वास रूपी बलिदान ते सेवा चे लारे आपणे लुहीं वी बाहणे पड़ो, तां वी मैं खौश छै, ते तम्चे सारा लारे मैं खुशी मनावी।

¹⁸ यूंही तम्ही वी खौश रिहा ते माये लारे आनन्द करा।

तीमुथियुस ते इपफ्रुदीतुस

¹⁹ मनु प्रभु ईशु मसीह मां आस छै कि मैं तीमुथियुस नु तम्चे गोढु भेज़ी, ताकि तम्ची हालत सुणती कर मनु शान्ति मिलो।

²⁰ माये गोढु ओचे समान कुई ङुजे बन्दे कोनी जाया सुभाव माये जिसड़ा हो ते जको तम्ची भलाई चे वास्ते सच्‍चे मना लारे फिक्र कर सग़े।

²¹ कांकि सब आपणे स्वार्थ चे बारे मां सोची, ना कि ईशु मसीह चे कामा चे बारे मां।

²² तम्ही तीमुथियुस चे चरित्र नु जाणा कि सुसमाचार चे प्रचार मां माये लारे ओणे यूंही सेवा करली, जिंवे हेक पूत आपणे ब़ा लारे करे।

²³ सो जिंवे ही मनु पता लाग़ी कि माये लारे का घटना हुवणे आली छै मैं ओनु तम्चे गोढु भेज़ती ङेणे ची आस राखे।

²⁴ ते प्रभु उपर माया भरोसा छै कि मैं खौद्द वी तम्चे गोढु जल्दी आवी।

²⁵ पर मैं इपफ्रुदीतुस नु जको माया भऊ ते भईवाल ते संगी योद्धा ते तम्चा दूत छै, ते जरुरी बाता मां माई सेवा-टहल करने आला छै, तम्चे गोढु भेज़णे जरुरी समझले।

²⁶ कांकि ओचे मन तम्चे सारा वास्ते लाग़ले रेहते, ऐवास्ते ओ उदास रेहता कांकि तम्ही ओची बिमारी चा हाल सुणला हुता।

²⁷ हा ओ बिमार तां हुता, ते ओ वी इतना कि जिंवे मरती ही जई। पर नरीकारा ने ओचे उपर दया करली। ना कि ओचे उपर बल्कि माये उपर वी ताकि मनु ङुखा उपर ङोख ना हो।

²⁸ ऐवास्ते मैं ओनु होर वी जल्दी भेज़े पला ताकि तम्ही ओनु ङेखा हेक वारी बल्ति खौश हुती जावा ते माये ङोख वी कम हुती जाओ।

²⁹ ऐवास्ते तम्ही प्रभु मां ओचे लारे घणी खुशी लारे ओचा स्वागत करा, ते इसड़ा बन्दा चा ज्यादा कनु ज्यादा कद्दर करले करा।

³⁰ कांकि ओ मसीह चे कामा वास्ते आपणे जेन्द ङुखी करती मौत चे गोढु आती गेलता ताकि जको कमी तम्चे तरफु माई सेवा मां हुली वा पुरी करो।