फिलिप्पियां 1 - ओङ राजपूत1 मसीह ईशु चा दास पौलुस ते तीमुथियुस ची तरफु, सब पवित्र लौका चे नांवे जको मसीह ईशु मां हुती कर फिलिप्पी मां रिही, मुखिया ते सेवका समेत। 2 अम्चे ब़ा नरीकार ते प्रभु ईशु मसीह ची ओर कनु तम्हानु अनुग्रह ते शान्ति मिलो। पौलुस ची प्राथना ते धन्यवाद 3 मैं जब-जब तम्हानु याद करे, तब-तब आपणे नरीकारा चा धन्यवाद करे। 4 ते जिसे बेले कङी तम्चे सब वास्ते विनती करे, तां सदा खुशी लारे विनती करता रिहे। 5 कांकि पेहले ङिओ कनु आज़ तक तम्ही सुसमाचार चे प्रचार मां माये लारे शामिल रेहले। 6 मनु पूरा भरोसा छै कि ओ नरीकार जेह्णे तम्चे मां आच्छे काम शुरु करले ऊंही काम मसीह ईशु चे ङिओ तक नरीकार पुरे करी। 7 माया हा विचार तम्चे वास्ते ठीक छै, कांकि तम्ही माये दिला मां बसती गेले, ते माई कैद मां ते सुसमाचार चे वास्ते उत्तर ते प्रमाण ङेणे मां तम्ही सारे माये लारे अनुग्रह मां भईवाल छिवा। 8 “नरीकार माया ग़वाह छै” मैं तम्हानु सच्च किहे पला कि मसीह ईशु जिसड़ा प्रेम करती तम्हा सारा वास्ते ललचावें। 9 मैं हाओ प्राथना करता रिहे कि आपस मां तम्चा सच्चा प्रेम, ज्ञान, ते पुरी समझ सहित ओर वी बधता जाओ, 10 इठे तक कि तम्ही आच्छीया महु आच्छीया बाता नु प्रिय जाणा ते मसीह आणे चे ङिओ तक सच्चे, पवित्र, ते बिना कसूरा चे बणले रिहा, ते ठोकर ना खावा, 11 धार्मिकता चे आच्छे गोण जको ईशु मसीह कनु मिले ओचे लारे तम्ही भरीले रिहा जाये कनु नरीकारा ची महिमा ते स्तुति हुती रिहो। पौलुस कनु सुसमाचार ची उन्नति 12 हे माये भऊ ते ब़ेहणीया, मैं हा चाहवे कि तम्ही जाणती गिहा कि माये लारे जको कोच्छ बीतले, ओचे लारे सुसमाचार नु ही बढावा मिड़ला। 13 इठे तक कि कैसर राज़ ची पलटन ते बाकि सारे लौका मां ईं उजागर हुती गेले कि मैं मसीह वास्ते कैद छै, 14 ते प्रभु मां जको भऊ छी वांचे महु अधिकतर माये कैद हुवणे ची वजह कनु हिम्मत ब़ांहती कर नरीकारा चा वचन बेधड़क हुती कर होर वी होंसला करी ते सुणावी। 15 कोच्छ तां गैरत ते झग़ड़े ची वजह कनु मसीह चा प्रचार करी ते कोच्छ भली मन्सा लारे। 16 जको बन्दी प्रेम ची वजह कनु इसड़े करी कांकि ये जाणी कि नरीकारा ने सुसमाचार चे बचाव वास्ते ही मनु इठे कैदखाने मां राखले। 17 पर कहीं नेरे लौक तां सच्चाई लारे ना बल्कि स्वार्थ लारे मसीह चा प्रचार करी कांकि वे सोची कि इसड़े करने लारे कैदखाने मां माये वास्ते क्लेश पैदा करो। 18 पर ऐचे लारे कुई फर्क ना पड़ी, जरुरी तां ईं छै कि चाहे बहाने लारे चाहे सच्चाई लारे प्रचार तां मसीह चा ही हुवे, ऐकनु मनु आनन्द मिले ते मिलता ही रिही। 19 कांकि मैं जाणे कि तम्ची विनती चे जरिये, ते ईशु मसीह ची आत्मा चे दान चे जरिये, मैं कैदखाने कनु आजाद हुती जई। 20 मैं तां हाओ दिला ची लालसा ते आस राखे कि मैं कुई बाते मां शर्मिन्दा ना हुवे, पर जिंवे माई बङी हिम्मत चे जरिये मसीह ची बढ़ाई माये शरीरा चे जरिये सदा हुती रेहली, यूंही हमा वी हो, चाहे मैं जीता रिहे जा मरती जाये। 21 कांकि माये वास्ते जीते रेहणे मसीह छै, ते मरणे माये वास्ते फायदेमन्द छै। 22 अगर शरीरा मां जीते रेहणे ही माये कामा वास्ते फायदेमन्द छै तां मैं ना जाणी कि कानु चुणे। 23 कांकि मैं ङुंहु चे आधे मां अधर लटकला पला, जी तां चाहवे कि आपणे जीवना कनु विदा हुती कर मसीह चे गोढु चाह्ला जाये। कांकि ईं माये वास्ते घणे आच्छे छै। 24 पर माये शरीरा मां जीते रेहणे तम्चे वास्ते होर वी जरुरी छै। 25 मनु भरोसा छै कि मैं जीता रिही ते तम्चे लारे रिही जाये कनु तम्ही विश्वास मां मजबूत हुती जावा ते खौश रिहा, 26 जको घमण्ड तम्ही माये बारे मां करा, ताकि जिसे बेले मैं वापिस तम्चे गोढु आवी ते माये रेहते हुले, ईशु मसीह ची संगति मां तम्ची खुशी होर वी ज्यादा बढ़ती जाओ। 27 तम्चा चाल-चलन ईशु मसीह चे सुसमाचार चे लायक हो, चाहे मैं आवे चाहे ना आवे, तम्चे बारे मां ईं सुणे कि तम्ही हेक ही पवित्र आत्मा मां मजबूत छिवा, हेक ही मन हुती कर सुसमाचार चे विश्वास चे वास्ते मेहनत करते रिहा। 28 ते किसी बाते मां विरोधीया चा भय ना खावा। हा वांचे वास्ते नाश हुवणे ची पक्की निशानी छै, पर तम्चे वास्ते उद्धार चा, ते हा नरीकारा ची तरफु इशारा छै, 29 कांकि मसीह ची वजह कनु तम्हानु हा मौका मिड़ला, सेर्फ हेको ब़स ओचे उपर विश्वास करा, पर ओचे वास्ते ङोख वी चवा। 30 ते तम्ही इसड़ी मेहनत करा जिंवे तम्ही मनु करते ङेखले, ते हमा वी सुणा कि मैं उसड़े ही करे। |
CC BY-NC-ND 4.0