Danịẹl 7 - Kịrịkẹnị Baịbụl

DANỊẸL ḄE TẸMẸ ḄU ORI ỌRỊAYEMA SIME ỌKỤ ḌUKOMẸ (7.1—12.13) Danịẹl Ḅe Tẹmẹ Ḅụ Ọrị Inein-a Nama Ma

¹ Bẹlshaza ḅe Babilọn amanyanaḅọ sọ tatarị kụra mị ḅie, à gbọrị ḍawọ nwọ kọnmẹ, se ḍin ḅie, à tẹmẹ ḅụ gbọrịye ọrịmẹ. À ḍawọ mị gịẹịn koromamẹ,

² mị anị à gịẹịn koromaye mịẹ anị ḍin mị ḅụ àrị ọrịaye ma: Fọrụ ịkọlị ịkọlị mamgba ḅụ fieaḅẹ, se ambura pakaḅo abaji mengi mị fiemamẹ.

³ Inein-a opu nama abaji mị ḅie pakaḅomẹ, àrị jịnye jịnye ḅụ kịrịmẹ.

⁴ Tatarị wu ḅe ọ̀ chịrịḅa kịkẹmẹ, ọkụma ọ̀ pamba chụamẹ igo sime ọkụ. À ḍikima mun ọkụma pamba ma kanịsosam. Nama ḅe, ini ò deki se tomoniḅọ ḅara se ọ̀ chịẹmasam. Se tomoniḅọ koroma ini nwọse ọ̀ ḅụ chụamẹ.

⁵ Maịn karama nama ḅe ò tun sime ọkụ simemẹ, ọḅụju-a ḅụọma ọ̀ nwọse chịẹmẹ. Oria aka ma ọ̀ nwọse tẹrẹ-a agaga imgbe ọlọ waraḅẹ se gbọrị pụkọ nwọse ọ̀ ḅẹmẹ, “Sịsẹ mun, ị́ ḅie tọnḅara se nama pẹị!”

⁶ À ḍikima mun ọkụma jịn nama tolupakasam, ọ̀ chịrị kịkẹmẹ, ọkụma ò koku inein-a pamba omi-ẹ feni pamba sime ọkụ, ọ̀ pịkị inein-a tịḅị nwọ nyanamẹ. Ori opuma kụrọ nyana ḅara simemẹ.

⁷ À ḍikima mun ọkụma inein karama nama tolupakasam. Ori opuma kụrọmẹ pịkị ḅalafamamẹ. Oria opu ikulele aka ma ọ̀ nwọse ò kunḅọ kunḅọ kọsịma se iniḅọ nanga-dẹkịdẹkịmamẹ. Ísí namama simeka ḅara ọ̀ nwọse oyi-a ịvalị chụamẹ.

⁸ À keinma ịvalị ma ḍiki ọkụma, à kala ịvalị nwọ ọrịmẹ ịvalị ma ogboku, anị sẹnị pakaḅoaḅẹ. Anị tatarị sime ịvalị ma ḅụ tẹrẹ-a ịvalị nwọ kanị sinmẹ. Mị ịvalị mị, anị tomoni-a tọrụmgbọlụ na ḅịpị na nwọ nyanamẹ, anị se opuaye mịẹḅaraḅụ ḅụboma aḅẹ.

Ḍumogbasoarị Gbọrịḅọ Ḅụ Àrị Ọrị Tẹmẹ Ḅụ Ye Mị

⁹ À ḍikima mun ọkụma, ini emine se kirikiri ḅụ koromamẹ, se olomu sịkị ḍumogbaso gbọrịḅọ emine ma ḅụ gbọrịye ọgọnọ kpọnjị simemẹ. Oria ḅụchụayema kpo ene mgbọlụ ḅịa ọkụ ḅịamẹ, pịkị ọ̀ tịḅị inime ma jokoma wulu kịkẹmẹ. Oria emine mị deki kporokporoma fịnị arịa ḅụ kọrịaḅẹ,

¹⁰ pịkị anịa ḅie fịnị ideri mengi ḅara se kọrị pakaḅo aḅẹ. Anịnyọ mẹndẹ-oyiasi fịnjị fịnjị laḅịa apụ omi-ẹ fịrịnwẹngị ọ̀ pịrịḅịa ẹrẹchị pịkị tomoni poku-a sonio asi sọnọ-a poku fịnjị ọ̀ tọrọkọ chịẹmẹ. Ḅẹrẹkọn warị mị sakịmẹ se ḍiri ma pịkị finjimẹ.

¹¹ À ḍikima mun ọkụma, à pa kala ịvalị mị ḅụbomarịọkụ nwọ naamẹ. À ḍiki sịkị, inein karama nama ḅe ini ọ̀ ḅaasam, se ini oria oju mị se kọrị fịnị ḅie gbin se anị dọkịmamẹ.

¹² Ini ísí-a namama arịa kụrọ nwọ ọkị sinmẹ, ọkụma ini ḅereni àrị pịrịmẹ na àrị kalasịkị nwọse kele ḍumo.

¹³ Mị tẹmẹḅụ ḅọịye mị ḅụ, ḍin ḅie, tomoniḅọ kịkẹ gbọrịye à nwọ ọrịmẹ. Ori ị̀ damaḅo aḅẹ, soḅuno ò kelemamẹ, ọ̀ pịkịna sime gbaso ḅọ ḅe damamunmẹ se ini ọ̀ ḅọrọma ọ̀ pịrịmẹ.

¹⁴ Ọ̀ ḅẹrẹtọn kụrọ na osi na pịkị amanyana kụrọ na se ọ̀ pịrịmẹ mịẹso sịkị sẹ mamgba ḅe-a tomonima na, ama ama na pịkị ọkwẹịn ḅẹlẹ kịrịkịrị apụma na fịrịnwẹngị ọ̀ pịrịḅịa ọkụ. Oria ḅẹrẹtọn kụrọ mị sime gbasoḅịa, se oria amanyanakiri mị kuluma nyana ẹkẹ.

Tẹmẹ Ḅie Ọrịaye Ma Ini Nwọ Pufinjimẹ

¹⁵ Àrị ọrị tẹmẹḅụ ayema ị̀ ḅụgbiripumamẹ, se à pịkị iḅiọkụma ḅụḅalaḅala nyanamẹ.

¹⁶ À so anị nyọ chịẹ apụma ḅụ gbọrịḅọ damamunmẹ, se àrị ọ̀ ḅẹmẹ na ori anị pufinji ị̀ pịrị. Anị ori anị fiearịye mị ḍuko ị̀ pịrịye-ẹ.

¹⁷ Ọ̀ nwọ ḅẹmẹ, “Ma inein-a opu-a namama, anị tomonikiri mị ḅie pakaḅo kiri ọkịḅịa inein-a sẹ ma-ẹ.

¹⁸ Se Geletẹịn Tamụnọ Ḅe-a tomonima, amanyana kụrọ ọkịḅịa, pịkị anị koko mun ḅene-ḅene laḅịa.”

¹⁹ Anịsịkị à jịnye nemi ḍọkịmẹ inein karama nama ḅe ḅụ, anị ísí-a namama kịkẹka wu ḅe—ḅalafama nama ḅe, anị oria alapẹlẹka ḅaratụmgbalị inime ma na ikulele aka ma na, se ò kun apụma nanga kọsịma wu ḅe.

²⁰ À pịkị ọ̀ tịḅị sime oyi-a-ịvalị ma gbolomaye nwọ nemi ḍọkịmẹ, pịkị sẹnịḅo tẹrẹ-a ịvalị ma sumagbin ịvalị mị na, anị tọrụmgbọlụ na ḅịpị na nyanamẹ anị pịkị opuayemịẹ ḅaraḅụ mịnaḅụ boma pịkị ḅalafamatẹịn ísí-a ye mamgba nẹngịmẹ.

²¹ À ḍikima mun-arịogbo, anị ịvalị mị owu se Tamụnọ-a tomonima pakamẹ, se ini inumamẹ.

²² Anịsịkị sime gbasoarịḅọ ḅe ḅo ḅẹrẹpẹlẹ Geletẹịn Tamụnọ Ḅe-a tomonima ḅara iḅimamẹ. Tamụnọ-a tomonima ḅo amanyana kụrọ mị ọkịḅịa sịkị mị ḅo lasam.

²³ Mịn anị ò pufinji se ị̀ pịrịye mị-ẹ. “Inein karama nama ḅe anị pịkị inein karama sẹ mị-ẹ tomonikiri ḅie, anị pịkị ísí-a sẹ mamgba ḅụ kịrịḅịa. Anị bebe tomonikiri mị mgba nanga kiri pịrịḅịa.

²⁴ Oyi-a ịvalị ma, anị ḅẹrẹtọn anị sẹ mị pịrịḅịa oyi-a amanyanapụ ma-ẹ. Anịsịkị jịn amanyanaḅọ pakaḅoḅịa; ísí tatarị apụma ḅụ ori opuma kịrịḅịa, ọ̀ pịkị tẹrẹ-a amanyanapụ sumagbinḅịa.

²⁵ Ò Geletẹịn Tamụnọ Ḅe na tụḅụrụḅịa se Tamụnọ-a tomonima pụndaḅịa. Ori inia olokoma na alalị enema na ḍinmaḅịa ọkụ ḍọkịḅịa, se tẹrẹ-a kụra na pẹkẹrẹ ḅụ Tamụnọ-a tomonima ini oria kụrọ chuku ḅie simeḅịa.

²⁶ Anịsịkị soḅie ḅẹrẹkọn warị mị ḅo ḅẹrẹkọn ḅụ sọḅịa, se oria kụrọ mị ọkịsinḅịa, pịkị ọ̀ kọsịma famaḅịa.

²⁷ Tomonikiri mị ḅie sime amanyanakiri mamgba ḅie kụrọ na opu na, ini àrị se Geletẹịn Tamụnọ Ḅe-a tomonima pịrịḅịa. Inia amanyana kụrọ mị kuluma nyana ẹkẹ, pịkị tomonikiri mị ḅie sime ḅẹrẹtọn apụ mamgba fịrịnwẹngị ini pịrị pịkị inia ḅịpị pokiḅịa.”

²⁸ Mịn anị ḅẹrẹ mị anịa kuluma-ẹ. Anị opuma ị̀ ḅalafamaso ọkụma à pomaḅịamẹ; à pịkị ye mamgba se ị̀ ḅie wẹrịmẹ.