2 Amanyanapụ Sịkị Mịẹaye Ma 8 - Kịrịkẹnị Baịbụl

Sọlọmọn Ḅe Nwẹngị Iḅiafịrị

¹ Si kụra anị nwọse Sọlọmọn ḅe ọkịmẹ, Oputẹkẹwarị mị na, pịkị oria amanyanaḅọ warị mị na nama mị.

² Amanyanaḅọ Hiram ḅe se ọ̀ pịrị opuamama ò kpoto àrị namamẹ, se ori Izrẹlapụma ḅẹmẹ na ini mun arịa ḅie anga.

³ Ọmụ ḅie ò Hamat na Zoba na eke ma ọkịmẹ

⁴ se onwun ele ḅie sime Palmaịra opuama mị ọ̀ nwọse owuniaye kokoye mịẹse anị seni kụrọ owuni ama mịẹmẹ. Hamat mị ḅie ḅụ sime ori ngọma se jịn ama sẹịnsẹịn ngọ koko-a warịma sime opuama mamgba ò kpoto àrị namamẹ.

⁵ Sọlọmọn ḅe, Ọgọnọ Bẹt Horọn na pịkị Chuku Bẹt Horọn na ḅie sime opuamama kpoto nwọ nama se (onu nama àrị pịrị se ikulele ḅọkọ se arịaḅụ chụa se àrị seni kụrọ owuni ama mịẹmẹ),

⁶ Bealat opuama mị na, pịkị ori ngọ kokokoko opuama mamgba na pịkị oria asụnma na owuni kporokporoma sime opuamama na kpoto namamẹ, Jerusalẹm na, Lẹbanọn na pịkị ori ḅẹrẹtọn pịrịarị eke ma ḅieḅụ, ọ̀ tọn na ọ̀ namaḅịa warịma ọ̀ namamẹ.

^7-8 Izrẹlapụma Kenan mị ọkị sịkị ḅụ ini ḅaka Kenan apụma, Sọlọmọn ḅe, ọ̀ kụrọḅara nwọse ini kun fịrị ḅụ chumẹ. Mịnapụ ma anị, Hitaị apụma na Amọraị apụma na, Pẹrizaị apụma na, Hivaị apụma na, pịkị Jebus apụma na-ẹ. Inia furoḅie pakaḅo apụma, anị pa omoniapụ sọ ọkịḅo mị sịkị mị laye-ẹ.

⁹ Ini kụrọḅara se Izrẹlapụ kun fịrị ḅie chukẹ, ọkụma owuni fịrị na ọmụ tịḅịdapụ fịrị na, owuni kporokporo tịḅịda fịrị na, pịkị asụn owuni fịrị na anị ini nwẹngị-a fịrị ma-ẹ. Ini kụrọḅara ḅụ kun pẹkẹrẹ kịrịkịrị ḅụ warị nama fịrịnwẹngịapụma.

¹⁰ Kịnị oyimaịn chịn fịnjị na oyi-apụ anị fịrị tịḅịda ini pịrịye-ẹ.

¹¹ Sọlọmọn ḅe, ọ̀ tarọ, Ijipt amanyanaḅọ ḅe ḅarọma sinmẹ Devid Opuama mị ḅie, se ori á se mun ọ̀ nama á pịrị gbọrị warị ḅie chumẹ. Ọ̀ nwọḅẹmẹ, “Izrẹl Amanyanaḅọ Devid ḅe oria amanyanaḅọ warị ḅie ngịsị árị anga ẹkẹ, anịatịḅị Ọḅọkụ Igbe mị simesa nyọ goyegoye, fịafịa nyọ-ẹ.”

¹² Sọlọmọn ḅe Oputẹkẹwarị mị tọrọkọ ọ̀ nama agbamịẹ ẹbẹ mị ọgọnọ ori agbamịẹ Nyanaḅọ Ḅe pịrịpịrịmẹ.

¹³ Ọ̀ dọkịma agbamịẹ mịẹmẹ Moziz Oloko mị ḅi ḅaraḅụ anị fịafịa ene goyegoye ḅụ ini mịẹmịẹ ọkụ mị: Ịnyọsara Ene ma na, Ịwọ Akalụ Alalị ma na, pịkị kụrakụra ḅie tẹrẹ alalị ma na—Suka Fịturu Alalị mị na, Soku Sịkị Alalị mị na, pịkị Oguruguru Warị Tịḅịkikima Alalị mị na.

¹⁴ Ḍawu Devid ḅe chụa koroma olokoma ḍukonwẹngị ḅụ, ori agbamịẹapụma, eneḅeneḅene ḅụ nwẹngị-nwẹngị-a fịrịma se ọrụtọn koromamẹ, pịkị nime chu ḅarachụa agbamịẹapụma pịrịpịrị Livaị apụma inia fịrịma nwẹngịaḅẹ. Ọ̀ pịkị Oputẹkẹwarị ḍikiḍikiapụ ma se ọrụrụḅụ koromamẹ, anị eneḅeneḅene ini nwẹngị-nwẹngị, gbọrịḅọ gbọrị onu ḅọkọ, gbọrị onu ḅọkọ ini nwọ korukoru fịrị mị, Devid Tamụnọ tomoniḅọ ḅe tọnkoromasa ḅaraḅụ.

¹⁵ Devid ḅe yekokowarịma na pịkị jịn-a ḅẹrẹ na ḅụ tọn agbamịẹapụma na Livaị apụma na pịrị ayema ini ọkọ se àrị mịẹmịẹmẹ.

¹⁶ Ḅo mị sịkị lasịkị, Sọlọmọn ḅe oria fịrị mamgba karasam. Nyanaḅọ Ḅe Oputẹkẹwarị chuku sẹkẹ-ḍụparị mị ḍipi sịkị ḅụ, ọkịmun anị ḅo nama karama sịkị mị la, bebe fịrị mị mgba ini sarasarama nwẹngị somẹ.

¹⁷ Anịsịkị Sọlọmọn ḅe so Iziọngiba na Ilat na mun mẹ, anị Akaba Ẹgẹdẹ mị ḅụ onwoin arụ ma agbagba Idọm ama mị ḅie.

¹⁸ Amanyanaḅọ Hiram ḅe oria ọmụtịḅịdapụ ma ḅụ ḅọrọ onwoin arụ ma seni ọ̀ sẹịnmamẹ se tọrụdọkụ ḍinsa apụ àrị seni ḅomẹ. Sọlọmọn ọmụtịḅịdapụ ma ini na tọrụ mị ḅụ ḅọrọ mun Ọfa ama mị lamẹ, se goli opu okpokpo opu okpokpo ḅụ inein okpokpo fa si ini nwọ ọkịḅo Sọlọmọn ḅe pịrịmẹ.