2 Amanyanapụ Sịkị Mịẹaye Ma 4 - Kịrịkẹnị Baịbụl

Oputẹkẹwarị Ḅirima Aye

¹ Amanyanaḅọ Sọlọmọn ḅe ọ̀ pịkị alapẹlẹka agbamịẹ ẹbẹ nwọ mịẹmẹ, anịa finji mị ḅụọ soi-ẹ, anịa ịsụn mị pịkị ḅụọ soi-ẹ, anịsịkị anịa gele mị jie-a ḅụọ-ẹ.

² Ọ̀ pịkị kelekele alapẹlẹka mengi kokoye sọnị nwọ tẹmẹmẹ, sọnọma ḅụọ na ikiḅa anịa gbun mị nwọ lamẹ, anịa aka mị ḅe kpokoro mị kelema mị jie-a ḅụọ-ẹ, se anịa kelekele mị sọnọ-a ḅụọ ofori sọnọfa ḅụọ-a mesi oyi fịnjị lamẹ.

³ Mengi kokoye mị ḅịpị aka mị mama ọrụḅụ ọ̀ nwọse ye se anị ḅirima kelemamẹ, gbọrị ọrụ ọgọnọḅụ ḅọrọmẹ, ísí ọrụ mị pịkị anịa chukuḅụ ḅọrọ kelemamẹ. Owoi nambulo ọkụ sime aye ọ̀ nwọse anị ḅirimamẹ, mengi kokoye mị mgba na àrị na gbọrị ḅụ ini sara pakụmamẹ.

⁴ Alapẹlẹka se mịẹ oyimaịn owoi nambulo fịnjịma ọgọnọ anị mengi kokoye mị gbana simeye-ẹ, se àrị tọrụ seni nụngọ damẹ, tẹrẹ gbọrị nyọ gbọrị nyọ tọrụ se nwọ damẹ.

⁵ Mengi kokoye mị ḅịpịḅọkọ mị ḅe kpokoro mị tẹrẹ-a inchisị lamẹ. Anịa ḅịpịḅọkọ mị ọmọngọ ḅịpịḅọkọ sime ọkụ simemẹ, anị anda pakaḅomẹ, ịwọma pakaḅoarị ngwengwe ịnyanya sime ọkụ simemẹ. Mengi kokoye mị ḅie sime mengi kongo ololo ḅụ oyigbọrị poku fịnjị na jie ẹndẹ na laḅịa.

⁶ Ini pịkị oyi-a bazini nwọ mịẹmẹ, Oputẹkẹwarị mị ḅe amaḅara anga da nyọ ḅụ, sọnọ-a bazini ini nwọse koromamẹ, pịkị sọnọ ini nwọse ereḅara anga da nyọ mị ḅụ koromamẹ. Ini àrị seni ini se dọkịma agba mịẹḅịa namama sịkịrị sịkịrịḅịa. Opu mengi kokoye mị ḅie sime mengi mị anị agbamịẹapụma seni inia ḅụ sịkịrị sịkịrịḅịaye-ẹ.

^7-8 Ini pịkị oyi-a goli-goli tọnjie gbanaye mịẹmẹ anị sime gbẹịn ḅaraḅụ, pịkị oyi-a dẹbụl na, se àrị seni Oputẹkẹwarị opu jukuru mị ḅie koromamẹ, sọnọ-a tọnjie gbanaye na sọnọ-a dẹbụl na gbọrị pẹkẹrẹ gbọrị pẹkẹrẹ ḅụ simemẹ. Ini pịkị goli-goli yefị-a bọlị ḅụ sọnọasi nwọ mịẹmẹ.

⁹ Odo mị ḅieju ini nyọ pakụma agbamịẹapụma pịrịmẹ, ini pịkị odo mị ḅie pakaḅo mị ḅụ jịn nyọ nwọ pakụmamẹ. Odo ma ogboku sime onu ḅọkọ ma alapẹlẹka ini nwọse àrị mịẹmẹ.

¹⁰ Mengi kokoye mị ini seni Oputẹkẹwarị mị ḅụ chukuju ịrụapakapaka nyọ daọrụ mị na kpekima koromamẹ.

^11-16 Huram ḅe pịkị ḅẹlẹ ma na, onwun soku ọgụ na, pịkị yefị-a bọlị na nwọ mịẹmẹ. Oputẹkẹwarị mị gose ọ̀ mịẹḅịa ọ̀ nwọ ḅereni Amanyanaḅọ Sọlọmọn ḅe pịrị ye mamgba ori àrị mịẹ karamamẹ: Mama ogbochịn ma na Mama ogbochịn ma tịḅị ọgọnọ sime yefị bọlị kịkẹ ayema na Ini seni gbọrị ogbochịn tịḅị ọgọnọ gbọrị ogbochịn tịḅị ọgọnọ ḅụ ḍori àrị ḅirima ikoli ma na Ini alapẹlẹka se tẹmẹ mgbafa ẹndẹ ma se gbọrị ogbochịn mama ọrụ mama ọrụ nwọse ḅirima ogbochịn ma na Asụn jine nwẹngị nwẹngị kiri ọgọnọ oyi arụ ma na Oyi-a bazini ma na Mengi kokoye mị pụra oyimaịn owoi nambulo fịnjịma na Ḅẹlẹ ma na, onwun soku ọgụ ma na, pịkị fọkụ ma na. Huram, iḅiọkụma ḅara fịrịnwẹngị ḍinḅọ ḅe iḅi mọnị mọnị alapẹlẹka ọ̀ nwọse maye mamgba tẹmẹmẹ, anị Amanyanaḅọ Sọlọmọn ḅe tọn na ini àrị seni Nyanaḅọ Ḅe Oputẹkẹwarị ḅie fịrịnwẹngịḅịa ẹrẹchị.

¹⁷ Amanyanaḅọ ḅe tọnmẹ na ini Sọkọt na Zẹrẹda na ogboku sime Jọdan Pẹsịkiri ḅie ini maye mamgba tẹmẹmẹ.

¹⁸ Tọn-aye ini nwọ tẹmẹmẹ, anịẹrẹchị gbọrịḅọ sọnị ini seni àrị mịẹ alapẹlẹka ma arịa iku la-ọkụ mị nemikẹ.

¹⁹ Amanyanaḅọ Sọlọmọn ḅe pịkị goli goli nyọ ḅirimaye ma nwọ mịẹ koromamẹ Oputẹkẹwarị mị gose: agbamịẹ ẹbẹ mị na ini seni ḍiepịrịaye agbamịẹ Tamụnọ Ḅe pịrị fịturu gbanaḅịa dẹbụl ma na;

²⁰ tọnjie gbanaye ma na pịkị iḅi goli-goli tọnjie ma na anị Fịafịa Tẹịn Nyọ mị tọrọkọ ḅụ kọrịḅịa yema, ini wẹrị tọnkoromasa ḅaraḅụ;

²¹ nyọ ḅirima ngwengwe ma na, tọnjie ma na, pịkị ini se ye kpapụ kpapụ ayema na;

²² tọnjie ḍikikịrịaye ma na, yefị bọlị ma na, insẹnsị chụa ẹfẹrẹ ma na, pịkị ḅụrọchụa panị ma na. Maye mamgba jokoma goli ini nwọse àrị tẹmẹmẹ. Oputẹkẹwarị ḅụ nụngọ da ḅọkọ ma na pịkị mun Fịafịa Tẹịn Nyọ laḅịa ḅọkọ ma na goli ini nwọse àrị oḅolo kelemamẹ.