2 Amanyanapụ Sịkị Mịẹaye Ma 25 - Kịrịkẹnị Baịbụl

Juda Amanyanaḅọ, Amazaya

¹ Amazaya ḅe sisọnọ-a kụra fịnjị ọ̀ nwọ la se ò ḅo amanyanaḅọ sọmẹ, gbọrị kụra fa soi ọ̀ nwọse ḅẹrẹtọn mẹ Jerusalẹm ḅie. Jerusalẹmḅọ Jẹhoadin ma anị nyọngọrọ ma-ẹ.

² Ọ̀ Nyanaḅọ Ḅe ḅụḅẹlẹ ḅara mịẹmẹ, ọkụma kuḅie laka ḅara ḅụ-ẹ.

³ Ò ḅo oria kiri ḅụ kụrọma chịẹ kirikiri, mị ọ̀ ḍawu ḅe nini fịrịtịḅịnị ma tịḅịpẹlẹye-ẹ.

⁴ Anịẹḅẹsọ inia awọma tịḅị ọ̀ pẹlẹkẹ, ọkụma Moziz Olokoma ḅie Nyanaḅọ Ḅe ḍuko ayema ọ̀ nwọ ḍukonwẹngịmẹ: “Ini ḍapụ na nyengiapụ na ḅaa ẹkẹ inia awọma mịẹasi gose, ini pịkị ḍapụ na nyengiapụ na mịẹasi gose awọmẹnịma ḅaa ẹkẹ; tomoniḅọ ḅe ḅarana mịẹ si ngẹrị anị nụḅọ mịẹse nụḅọ fị ḅie sọḅịaye-ẹ.”

Ini Ọmụ Se Idọm Mị Dapaka Mẹ

⁵ Amanyanaḅọ Amazaya ḅe ò Juda na Bẹnjamin na sẹma ḅie owuapụ mamgba nwọse owuni kụlọ kụlọ tọnmẹ, ini ḅara-wẹrịma sẹsẹ ma ḅie sime ọkụ, se ọ̀ fịrịtịḅịnị tọn kụlọ kụlọ ma damẹ, owuapụ-a mẹndẹ oyiasi fịnjị kụlọ kụlọ na pịkị sọnọasi kụlọ kụlọ na, ọ̀ nwọse ini koromamẹ. Inia ḅie si kụra la, pịkị kele ḅọrọsapụ omi-ẹ, inimgba ini tẹrẹfa poku-a mesi na kịnị oyi ẹndẹ na kịẹnḅịpị ḅụ nwọ lamẹ. Ini anị ọbịrị, pịkị iḅiọkụma angwa na agbọ na owusọ ḍin ḅụ ini sẹlẹ ọkị apụ-ẹ.

⁶ Ọ̀ pịkị ḅakama seleḅa se Izrẹl owuni ḅụ oyimaịn poku fịnjị na oyi ẹndẹ na ọkọ inia ḅụ chụamẹ.

⁷ Ọkụma gbọrị ịkịankoroḅọ amanyanaḅọ ḅe damamun se ọ̀ ḅẹmẹ, “Mịna Izrẹl owunima ini ọkị ị́ ḅụ chụama. Nyanaḅọ Ḅe, mà ọgọnọju amanyanakiri ma ḅụ ori ofori-ẹ.

⁸ Ị́ chịnḅịa na ini ị́ mịẹkụrọmaḅịa owu ḅie, ọkụma Tamụnọ Ḅe anị kụrọ nyana ọmụḅaraiḅi na ọmụḅarasi na pịrịpịrịye-ẹ, ọ̀ pịkịna mịẹḅịa ị́rị́na-tarakapụ ma ini ị́ nẹngịmaḅịa.”

⁹ Amazaya ḅe nwọse ịkịankoroḅọ ḅe gbelamẹ, “Ọkụma à se inia tịḅị ḅụ gbẹịnsa seleḅa mamgba kwanị?” Ịkịankoroḅọ ḅe nwọ pẹkẹrẹmẹ, “Nyanaḅọ Ḅe ori ineda anị nẹngịmaye se ị́ pịrịḅịa!”

¹⁰ Anị Amazaya ori ọkọ owunima ḅẹye-ẹ na ini so ama mun. Mị ḅụ ini so inia amama mun mẹ, ịganị kuḅie nyana Juda tomonima pịrịḅụ.

¹¹ Amazaya ḅe ò kuḅie mịẹkụrọma oria owu kụlọ mị se Fụn Pẹsịkiri mị ḅie mun mẹ. Se anịnyọ ini owu mị sọmẹ, se Idọm owunima ḅụ kịnị sisọnọ-a ẹndẹ fịnjị ini nwọ ḅaamẹ

¹² pịkịna jịn sisọnọ-a ẹndẹ fịnjị ini nwọ kunmẹ. Ini mịna ikoliapụma ọkị se Sila opuama tụndụ mị ọgọnọ mun mẹ, se anịnyọ ini ini suma chukuju sime ḍụparịma ọgọnọ gbinmẹ se ini fị̀mẹ.

¹³ Ḅọlọka sịkịḅụ, Amazaya ḅe na ọmụ mun ò ḅerenika Izrẹl owunima, Sameria na Bẹt Horọn ogboku sime Juda opuamama gbẹịnmachịẹmẹ se kịnị-a sọnọma ẹndẹ oyiasi fịnjị nwọ ḅaamẹ, pịkị ḅakaye nwọ ọfọịn somẹ.

¹⁴ Amazaya ḅe Idọm apụma inuma se soḅo sịkị, ori inia oru ma ọkịḅomẹ, ori àrị se chịẹma pịkị àrị tẹkẹmẹ, pịkịna insẹnsị dọkịma àrị pịrịmẹ.

¹⁵ Mịn mị Nyanaḅọ Ḅe ịganịmamẹ, anị ori ịkịankoroḅọ se Amazaya ḅe fịrịmaye-ẹ. Ịkịankoroḅọ ḅe ò gbelamẹ, “Cheye gose ị́ jịn ama oru tẹkẹ-ao anị ineda ị́ ḅara ḅie anịa tomonima ḍụakayema?”

¹⁶ Amazaya ḅe ò gbelamẹ, “Nde sịkị ngịsị wa ị́ se amanyanaḅọ ḅe tetemaḅọ mịẹ? Dachịẹ, ḅarị ọkwẹịnma, anị ofori àrị ị́ ḅaaḅịa!” Ịkịankoroḅọ ḅe ọ̀ ḅarị ọkwẹịnkẹ, ọkụma ọ̀ pịkị nwọḅẹmẹ, “Mịọkụ mị à nemiye-ẹ na Tamụnọ Ḅe ọ̀ tọnpẹlẹsam na ori ị́ famaḅịa, anịatịḅị ị́ mama mgba mịẹsam nwọḅẹ sọnị, ị́ pịkị ị̀ya tetema mị sịkịmẹ.”

Izrẹl Dapaka Ọmụ

¹⁷ Amanyanaḅọ Amazaya Judaḅọ ḅie na tetema se ọ̀ pịrịpịrịapụ ma na ḅẹrẹ ḅia Izrẹl mị pịrịmẹ. Se ori oku fịrịma Jẹhu ya Jẹhoash ya Izrẹl Amanyanaḅọ Jẹhoash ḅe sẹịnmamẹ na ori ine ḅịa ḅẹḅẹ, ò ḅo ori na ọmụgbin.

¹⁸ Jẹhoash ḅe mị pẹkẹrẹ ḅịpị mị se Amazaya ḅe sẹịnmamẹ: “Gbọrị sịkị, Lẹbanọn Tụndụ ma ḅie sime ịga chịn oku se awụ chịn mị sẹịnmamẹ: ‘Ị́ya eremeni tọkụ ma se ị̀ya owutọkụ ḅe pịrị ini sime.’ Gbọrị piri nama ḅọrọmẹ se ịga chịn nanga kiri pịrịmẹ.

¹⁹ Mịọkụ Amazaya, ị́ bomaḅẹ na ị́ Idọm apụma inumasam, ọkụma àrị ị́ tetemaḅẹ na warị ḅie sime. Ị́ cheye gose tọrụsiọrị dekiḅo ị́rị́ na ị́ya tomonima pịrịḅịa ḅụfụka nwọ wosịsẹma-ao?”

²⁰ Ọkụma Amazaya ḅe ò poki ḍụkụkẹ. Tamụnọ Ḅe anị mị ọ̀ tọnsam na Amazaya ḅe ini ọ̀ nẹngịmaḅịa, anịatịḅị ori Idọm apụ oru ma tẹkẹsam.

²¹ Anịḅụ Izrẹl Amanyanaḅọ Joash ḅe ọ̀ pakamun Amazaya Juda Amanyanaḅọ ḅe na owu mị sọmẹ. Bẹt Shimẹsh, Juda ḅie mị ini bịanmaye-ẹ,

²² ọmụ mị Juda owunima ḅara simẹ, se owunima ini mangịso ama mun mẹ.

²³ Jẹhoash ḅe Amazaya ḅe kun se ò dekiso Jerusalẹm mun mẹ. Anịju ḅụ ori opuama mị onu mị kangbinmẹ, Ifrem Ḅọkọ mị ḅụ ọkịmun Angasịkị Ḅọkọ mị lamẹ, anịa ịsụn mị kuḅu oyiasi laḅịa.

²⁴ Oputẹkẹwarị ḅie sime goli ma na seleḅa ma na mgba ọ̀ tan so Sameria mun mẹ pịkị Obẹd Idọm ḅe furo ḅie pakaḅo apụma ḍikiḍikiarị fịrịnwẹngịaye ma na, amanyanaḅọ warị ḅie ngọma na. Ọ̀ pịkị tomoni na kun somẹ.

²⁵ Jẹhoash Izrẹl Amanyanaḅọ ḅe fị ḅọrọ jie-a kụra ḅụ mị Juda Amanyanaḅọ Amazaya ḅe fịye-ẹ.

²⁶ Amazaya ḅe mịẹ jịn aye goyegoye sakị ḅụ mun kuluma la oria amada mị ḅụ, Juda apụma na Izrẹlapụma na amanyanapụ Ḅụḅẹrẹ ḍirima ḅie gịẹịn waraḅẹ.

²⁷ Ọ̀ ḅarị nyanaḅereni Nyanaḅọ Ḅe pịrịka sịkị mị ḅụ sakị, Jerusalẹm ḅie ini ḅẹrẹḅia ọ̀ pịrịpịrịmẹ. Kuluma mị ḅụ ọ̀ mangị so Lekish opuama mị mun mẹ, ọkụma ori-na-tarakapụma ini ò ḍukomun anịju ọ̀ ḅaamẹ.

²⁸ Ini asụn se oria oju mị dekiḅo Jerusalẹm lamẹ, se amanyanapụ furo iḍupuma ḅie ini ò ḍipimẹ.