2 Amanyanapụ Sịkị Mịẹaye Ma 24 - Kịrịkẹnị Baịbụl

Juda Amanyanaḅọ, Joash Ḅe

¹ Joash ḅe sọnọma kụra anị ọ̀ la se ò ḅo Juda amanyanaḅọ sọye-ẹ, se kụra mesi ọ̀ nwọse Jerusalẹm ḅie amadamẹ. Nyọngọrọ Zibia ma, Biashiba opuama ḅieḅọ-ẹ.

² Nyanaḅọ Ḅe ḅụḅẹlẹye ọ̀ nwọ mịẹmẹ, Jẹhoịada agbamịẹḅọ ḅe ḍumo simearịogbo.

³ Jẹhoịada ḅe mama eremeni ọ̀ nwọ sẹlẹḅo Amanyanaḅọ Joash ḅe pịrịmẹ ori ini na sime se ini pịkị owuapụ awọ na eremeni awọ na yimẹ.

⁴ Ò ḅo amada se sịkị kele ḅọrọso, Joash ḅe ọ̀ tọnmẹ na ori Oputẹkẹwarị mị tẹlịmaḅịa.

⁵ Ori agbamịẹapụma na Livaị apụma na fịrịmamẹ ini Juda opuamama mun se tomonima ḅara ḅaka igbiki ochoḅo ini se kụrakụra ḅụ Oputẹkẹwarị tẹlịma fịrị mị nwẹngịḅịa. Ori ini ḅẹmẹ na ini giririma ye, ọkụma Livaị apụma ini anị se ọḅụ damẹ,

⁶ anị ḅụ, ò Jẹhoịada, inia tịḅịnịḅọ ḅe chịn se ò gbelamẹ, “Cheye gose ma ị́ ḍọkịḅo ọrịka na Livaị apụma, Juda na Jerusalẹm apụma na ḅara ocho igbiki mị, anị Moziz, Nyanaḅọ Ḅe fịrịnwẹngịḅọ ḅe, tomonima ḅara ḅi na ini ocho se Nyanaḅọ Ḅe pakaḅoḅo Ikowarị mị nwọ mịẹkụrọmaḅịaye mị nwọ ochoka?”

⁷ (Atalaịya, anị ḅịkị simịẹmịẹye pịrịḅọ ma, ḍukonwẹngịapụma Oputẹkẹwarị mị ini simasam, se pịkị anịa ḅie sime osiḅụ simeayema ọkịmun Beal ḅe tẹkẹtẹkẹ mẹ.)

⁸ Amanyanaḅọ ḅe tọn Livaị apụma pịrịmẹ na ini gbọrị igbe mịẹ, se igbiki ochoḅịaye, se anị se Oputẹkẹwarị odo ḅọkọ ḅụ koroma.

⁹ Ini ḅịpị ekere gbolo Jerusalẹm na Juda na kelemamẹ, na ọrụḅọḅọ mịna ocho igbiki ọkịḅo Nyanaḅọ Ḅe pịrị, anị Moziz, Tamụnọ fịrịnwẹngịḅọ ḅe, tatarị piri ele ḅie inia ḅara ocho-ocho igbiki mị.

¹⁰ Mịn mị anị tomonima na inia tịḅịnịma na ḅieḅẹlẹmamẹ, se ini inia ocho igbiki ma ọkịḅo igbe mị ḅeinmamẹ.

¹¹ Ene ḅene ḅene Livaị apụma ini igbe mị ọkịmun anịa ḅụ tịḅịda amanyanaḅọ fịrịnwẹngịḅọ ḅe pịrịḅịa. Anị ḅein sịkị ḅein sịkị, amanyanaḅọ ḍiri gịẹịnḅọ ḅe na Gele Agbamịẹḅọ ḅe tọrụḍinmaḅọ ḅe na, igbiki mị sinpakụma se igbe mị pịkịma mun anịa kiri koromaḅịa. Mị ḅụ ini ḅakama opu igbiki ochoḅomẹ.

¹² Amanyanaḅọ ḅe na Jẹhoịada ḅe na igbiki ma se tịḅịda Oputẹkẹwarị mị tẹlịmarịapụ ma pịrịḅịa, ini pịkịna ḍụparị warị namapụ na, akanị na, ikulele fịrịnwẹngịapụ na ọkọmẹ ḅo warị mị tẹlịmaḅịa ẹrẹchị.

¹³ Fịrịnwẹngịapụ mamgba tịḅịchụa fịrị mị nwẹngịmẹ se Oputẹkẹwarị mị ḅo pịkị tatarị anị sime ḅara wẹrị kụrọ gbịgbịmẹ.

¹⁴ Warị mị ini nwọ tẹlịma so sịkị, kọn goli ma na seleḅa ma na, ini se amanyanaḅọ ḅe na Jẹhoịada ḅe na pịrịmẹ, ini àrị ọkị seni Oputẹkẹwarị ḅie fịaye fịfịḅịa bọlị na pịkị jịn-a fịrịnwẹngịaye na tẹmẹmẹ. Jẹhoịada ḅe nwọ ḍumo sịkị mgba ḅụ Oputẹkẹwarị ḅie ini agbamịẹ gbasomẹ.

Jẹhoịada Ḅe Tọn Wẹrịaye Ma Ini Pịkịmẹ

¹⁵ Ori olomu ḅo kụra sonioasi oyi fịnjị la se ọ̀ fịmẹ.

¹⁶ Ọ̀ nwẹngị Izrẹlapụma na, Tamụnọ Ḅe na pịrị fịrịma na, pịkị Oputẹkẹwarị mị ḅụ ọ̀ nwẹngị-a fịrịma na inia ḅụḅẹlẹye gose, Devid Opuama mị ḅie, amanyanapụ furo iḍupuma ḅie ini ò ḍipimẹ.

¹⁷ Ọkụma Jẹhoịada ḅe fị ḅọrọso sịkị, Juda tịḅịnịma Amanyanaḅọ Joash ḅe ịkpẹịnmamẹ na ori ini ḍukoaye ma ọkị.

¹⁸ Anịḅụ tomonima ini ḅarị Oputẹkẹwarị ḅie Nyanaḅọ, inia ḅieju-aḍapụma Tamụnọ Ḅe tẹkẹtẹkẹkẹ, se sakị oru ma na ini kara Ashera eremeni oru mị na nwọ tẹkẹaḅẹ. Ini mịẹarị sima ḅe ḅẹrẹsi Nyanaḅọ Ḅe ịganị ọkịḅo Juda na Jerusalẹm na ọgọnọ gbanamẹ.

¹⁹ Nyanaḅọ Ḅe ori ịkịankoroapụ fịrịmamun inia ḅerijinemẹ na ini pịkịma ọ̀ damaḅo, ọkụma tomonima ini ò poki ḍụkụkẹ.

²⁰ Anị Tamụnọ Ḅe tẹmẹ mị Zẹkaraya, Jẹhoịada agbamịẹḅọ ḅe tọkụ ḅe ḅụgbanaye-ẹ. Tomoni ineda ori ọrịḅịa nyọ mị ọ̀ chịẹ se oloku pakụmaye-ẹ, “Nyanaḅọ Tamụnọ Ḅe nwọ gbelaḅẹ cheye gose ọ̀ tọn ayema ọ́ nwọ pokika se mịọkụ ọ́ ḅụfụka ọkịḅo ọ́mịna ḅụ pịrịaḅẹ! Ómine ò se gbinkoromamẹ, anị gose ori ó se gbinkoromasam!”

²¹ Amanyanaḅọ Joash ḅe nweni ma na ḅia se Zẹkaraya ḅe na tụḅụrụmẹ, se amanyanaḅọ ḅe kụrọ pịrị se tomonima imgbele se Zẹkaraya ḅe gbin ḅaamẹ Oputẹkẹwarị ḅẹrẹkọn odo mị ḅie.

²² Amanyanaḅọ ḅe Zẹkaraya ḍa Jẹhoịada ḅe ò ḅereni ḅụ nwẹngị ọ̀ pịrị iḅiafịrị mamgba ò se ḅieḅaramamẹ, se ọ̀ Zẹkaraya ḅe ḅaamẹ. Zẹkaraya ḅe ọ̀ fịarị sịkị, ori oloku pakụmamẹ, “Yei Nyanaḅọ Ḅe ị́ mịẹarịye mị ọrị, se fomuḅara se ị́ pịrị!”

Joash Sẹda Mị Ḅe Kuluma

²³ Anị kụra ḅie ene sịkị ḅo lasịkị mị Siria owunima owu seni Juda na Jerusalẹm na pakaye-ẹ, se ini tịḅịnị mamgba ḅaafamamẹ, ini pịkị tọn aye ọfọịn so Damaskọs mun mẹ.

²⁴ Siria owunima ini bokẹ, ọkụma Nyanaḅọ Ḅe ḅereni ini pịrị se ini ineda ḍụḅa ini nẹngị Juda owunima nẹngịmamẹ, anịatịḅị tomonima, inia olomu-aḍapụma Nyana Tamụnọ Ḅe ini ò se gbinkoromamẹ. Mịn mị ḅụ fomuḅara Amanyanaḅọ Joash ḅe lamẹ.

²⁵ Ye opuma ọ̀ lamẹ, se tarakapụ owunima ọḅụgbinma se so, anị oria fịrịnwẹngị mamapụ ḅia se ò deki mun oria mọnọye ọgọnọ ḅụ ọ̀ ḅaaye-ẹ, anị gbẹịn-fịye ḅaraḅụ ò se Jẹhoịada, agbamịẹḅọ ḅe tọkụ ḅe nini ḅara mị. Devid Opuama mị ḅie ini ò ḍipimẹ, ọkụma amanyanapụ furo iḍupuma ḅiekẹ.

²⁶ (Ḅẹrẹ ḅia se ò dekimun ḅaa apụma anị, Zebad, gbọrị Amọn eremeniḅọ, ini Shimiat nwọse chịnḅọ tọkụ na Jẹhozabad, gbọrị Moab eremeniḅọ, ini Shimrit nwọse chịnḅọ tọkụ na.)

²⁷ Amanyanapụma ḅụ ḍukoaye ma ḍiri ḅụ gịẹịn ayema ḅie sime aye anị, Joash awọma ḅụ ḅẹrẹ, ini ḍuko oria ọgọnọ gbana ịkịan ma na, pịkịna ori Oputẹkẹwarị mị nama ọkụ ḅụ ḅẹrẹ na. Oria tọkụ, Amazaya ḅe ọ̀ tịḅịḍinma amanyanaḅọ sọmẹ.