2 Amanyanapụ Sịkị Mịẹaye Ma 22 - Kịrịkẹnị Baịbụl

Ehaziya Juda Amanyanaḅọ Ḅe

¹ Arab apụma ḅie dapụ owu se mun Amanyanaḅọ Jẹhoram owuapụ awọ mamgba ḅaafamamẹ, inia ḅie bokatẹịn Ehaziya ḅe sikima. Anị ḅụ mịọkụ, Jerusalẹm apụma Ehaziya ḅe se ḍawu ḅe kiri ḍinmamẹ amanyanaḅọ ḅaraḅụ.

^2-3 Ehaziya ḅe simaịn kụra fịnjị ọ̀ nwọ lase ò ḅo amanyanaḅọ sọmẹ, se gbọrị kụra ọ̀ nwọse Jerusalẹm ḅie ḅẹrẹtọnmẹ. Ehaziya ḅe Amanyanaḅọ Ehab furo mịẹmịẹye mị ò ḍiki mịẹye-ẹ, nyọngọrọ Atalaịya ma nwọ Amanyanaḅọ Ehab ḅe ḅarọ ma-ẹ, árịa opuḍaḅọ anị pịkị Izrẹl Amanyanaḅọ Omraị ḅe-ẹ ḅẹsịkị, árị ò tetema mun si-ḅie-chumẹ.

⁴ Nyanaḅọ Ḅe ḅụ ò si mịẹmẹ anịatịḅị ḍawu ḅe fị ḅọrọ sịkị, Amanyanaḅọ Ehab furo mị ḅie jịn apụ ḅo ò tetemapụ sọmẹ, ini anị pịkị ọ̀ damun oria ḅịkị mị ḅie chuye-ẹ.

⁵ Inia tetema ma ḍukonwẹngị ḅụ, ori Izrẹl Amanyanaḅọ, Joram ḅe ḅụ sọ se owu se Siria amanyanaḅọ, Hazaẹl ḅe pakamẹ. Owuni ma Remọt Giledị ḅie mị ini doniaye-ẹ, se ye Joram ḅe lamẹ owu ḅie.

⁶ Ọ̀ pịkịmaḅo Jezriẹl opuama mị lamẹ, ọ̀ laye ma gwọḅịa ẹrẹchị, anịḅụ Ehaziya ḅe mun ọ̀ lamẹ.

⁷ Mịẹse Ehaziya ḅe ḅịkịḅịaye gose, mị Tamụnọ Ḅe mịẹse Joram ḅe mun ọ̀ laye-ẹ. Ehaziya ḅe na Joram ḅe na anịju simearịogbo, Nimshaị ḅe oria gbọrị owutọkụ, ini Jẹhu se chịnḅọ, ini dapakamẹ, ori anị Nyanaḅọ Ḅe sẹlẹọkị na Ehab amada ḅụọ mị famaḅịaḅọ ḅe-ẹ.

⁸ Jẹhu ḅe, Ehaziya furo mị ḅụ, Tamụnọ Ḅe ḍuko ọ̀ pịrịye mị mịẹarịogbo, Juda apụ tịḅịnị ogbo na pịkị Ehaziya ḅe oria mịnapụ awọ na, ọ̀ ḅụ sọ mun Joram ḅe la-ẹmuapụ, Jẹhu ḅe na bịanmamẹ. Jẹhu ḅe, inimgba ori ini ḅaafamamẹ.

⁹ Ehaziya ḅe ini ọ̀ ḍọkịmẹ, se Sameria ḅie ọ̀ ḅọị sime nyọ ini ori ọrịmẹ. Ini ori ọkị Jẹhu ḅe damamun se ori ọ̀ ḅaamẹ. Ọkụma ini oria ojuakpakpa mị ḍipimẹ, kụn se oria opuḍaḅọ, amanyana Jẹhoshafat ḅe pịrịḅụ, anị oria ịnyọ la-ọkụ se fịrịnwẹngị Nyanaḅọ Ḅe pịrịḅọ ḅe. Ehaziya furo ḅie sẹ mị daḅịa gbọrịḅọ sọnị ḅarị ofori-ẹ.

Atalaịya Juda Amanyanaḅọ Eremeniḅọ

¹⁰ Amanyanaḅọ Ehaziya nyengi, Atalaịya ma naamẹ na ini árịa tọkụ ḅe ninisam nwọḅẹ kirikiri, mị á kụrọ pịrịye-ẹ na, ini Juda amanyanaḅọ furo ḅie apụ goyegoye nwọ ḅaa.

¹¹ Ehaziya ḅe, na gbọrị ḍaḅọ yi eremeni mịnaḅọ omi-ẹ, árịa ẹrẹ Jẹhoshẹba, gbọrị agbamịẹḅọ, Jẹhoịada ini nwọse chịnḅọ árị na simemẹ. Á ḅọịma Ehaziya ḅe oria gbọrị owutọkụ, Joash ḅe ḍụamẹ. Ini ísí amanyanaḅọ owuapụ awọma nini-ẹtọn àrị sịkị mị ḅụ, árị ori na pịkị gbọrị tọkụ-ḍẹkịḅịaḅọ na nwọse mun Oputẹkẹwarị gbọrị jukuru ḅie ḅọịmẹ. Atalaịya ma ḅaraḅie, á fịḅụ oria ḍumo mị ḍụamẹ, á nwọ ọ̀ ḅọị ye mị.

¹² Sonio-a kụra ọ̀ nwọse anịnyọ ḅọịsimemẹ, Atalaịya ma amanyana eremeniḅọ ḅara nwọse sẹ mị darị sịkị mị ḅụ.